ନ୍ୟୁୟର୍କ : ଆମେରିକାର ଫେଡେରାଲ୍ ବ୍ୟୁରୋ ଅଫ୍ ଇନ୍ଭେଷ୍ଟିଗେସ୍ (ଏଫ୍ବିଆଇ) ପକ୍ଷରୁ ବିଶ୍ୱସ୍ତରୀୟ ୧୦ ମୋଷ୍ଟ ୱାଣ୍ଟେଡ୍ ଅପରାଧୀଙ୍କ ଏକ ତାଲିକା ଜାରି କରାଯାଇଛି । ତେବେ ଏହି ୧୦ ମୋଷ୍ଟ ୱାଣ୍ଟେଡ୍ଙ୍କ ମଧ୍ୟରେ ଜଣେ ଭାରତୀୟ ନାଗରିକ ମଧ୍ୟ ସାମିଲ ଥିବା ଜଣାପଡିଛି । ଏଫ୍ବିଆଇ ତାଲିକାରେ ନାମିତ ଏହି ଭାରତୀୟ ଯୁବକଙ୍କ ନାମ ଭଦ୍ରେଶ କୁମାର ଚେତନଭାଇ ପଟେଲ ଏବଂ ତାଙ୍କ ଘର ଗୁଜରାଟ ଅହମ୍ମଦାବାଦ୍ର ବିରାମଗାମ ଅଞ୍ଚଳରେ ବୋଲି ଜଣାପଡିଛି । ଏଫ୍ବିଆଇ ପକ୍ଷରୁ ତାଙ୍କ ନାମରେ ୨,୫୦,୦୦୦ ଡଲାର ଅର୍ଥାତ୍ ୨.୧ କୋଟି ଟଙ୍କା ପୁରସ୍କାର ରାଶି ଘୋଷଣା କରିଛି ।
ଏଫ୍ବିଆଇ ପକ୍ଷରୁ ସୋସିଆଲ ମିଡିଆ ଏକ୍ସ’ରେ ଏହି ସୂଚନା ଦିଆଯାଇଛି । ଭଦ୍ରେଶ କୁମାର ଚେତନଭାଇ ପଟେଲ୍ଙ୍କ ବିରୋଧରେ ଅଭିଯୋଗ ହେଉଛି ଯେ, ସେ ନିଜ ୨୧ ବର୍ଷୀୟା ପତ୍ନୀ ପଲକ୍ଙ୍କୁ ହତ୍ୟା କରି ଫେରାର ହୋଇଯାଇଛନ୍ତି । ଉଭୟ ମେରିଲାଣ୍ଡ୍ର ହାନୋବର୍ ଅଞ୍ଚଳରେ ଥିବା ଏକ କଫି ସପ୍ରେ କାମ କରୁଥିଲେ । କିନ୍ତୁ କିଛି ସମୟ ଧରି ଉଭୟ ସ୍ୱାମୀ ସ୍ତ୍ରୀଙ୍କ ମଧ୍ୟରେ ଭାରତ ଫେରିବାକୁ ନେଇ ପାଟିତୁଣ୍ଡ ହେଉଥିବା ସ୍ଥାନୀୟ କର୍ମଚାରୀ କହିଛନ୍ତି । ତେବେ ଏକ ନାଇଟ୍ ସିଫ୍ଟରେ ଉଭୟ କାମ କରୁଥିବା ବେଳେ ଭଦ୍ରେଶ, ପଲକ୍ଙ୍କୁ ବାରମ୍ବାର ଛୁରାମାଡ଼ କରିଥିଲେ ଏବଂ ଘଟଣାସ୍ଥଳରୁ ଫେରାର ହୋଇଯାଇଥିଲେ । ସିସିଟିଭିରେ ସମସ୍ତ ଘଟଣା କଏଦ ହୋଇଯାଇଥିଲା । ଏହାକୁ ଆଧାର କରି ଏଫ୍ବିଆଇ ଏପ୍ରିଲ୍ ୨୦୧୫ରୁ ଏପର୍ଯ୍ୟନ୍ତ ଭଦ୍ରେଶଙ୍କୁ ଖୋଜା ଜାରି ରଖିଛି । ତେବେ ଭ୍ରଦେଶଙ୍କୁ ଗିରଫ କରିବା ପାଇଁ ଏଫ୍ବିଆଇର ଏକ ଟିମ୍ ଭାରତ ଗସ୍ତରେ ଆସିପାରନ୍ତି ବୋଲି ଅନୁମାନ କରାଯାଉଛି ।
