ନୂଆଦିଲ୍ଲୀ : ନୂଆ ସୋସିଆଲ ମିଡିଆ ପ୍ଲାଟଫର୍ମ Hoote app ଲଞ୍ଚ କଲେ ତାମିଲ ସିନେମା ସୁପରଷ୍ଟାର ରଜନୀକାନ୍ତ । ଏହା ଏକ ଭଏସ୍ ଆଧାରିତ ସୋସିଆଲ୍ ମିଡିଆ ଆପ୍, ଯାହା ତାଙ୍କ ଝିଅ ସୌନ୍ଦର୍ଯ୍ୟାଙ୍କ ଦ୍ୱାରା ପ୍ରତିଷ୍ଠିତ। ଆପର ବିଶେଷତ୍ୱ ହେଉଛି, ଆପଣ ଭଏସ୍ ନୋଟ୍ ମାଧ୍ୟମରେ ଆପଣଙ୍କର ଭାବନାକୁ ପ୍ରକାଶ କରିପାରିବେ। ଆପଣଙ୍କ ପୋଷ୍ଟକୁ ଉତ୍ତମ କରିବା ପାଇଁ ଆପଣ ବ୍ୟାକଗ୍ରାଉଣ୍ଡ୍ ମ୍ୟୁଜିକ୍ ମଧ୍ୟ ବ୍ୟବହାର କରିପାରିବେ। ଏହି ଆପ୍ ତାମିଲ, ହିନ୍ଦୀ, ତେଲୁଗୁ, ମରାଠୀ, ମାଲାୟାଲମ୍, କନ୍ନଡ, ବଙ୍ଗାଳୀ ଏବଂ ଗୁଜୁରାଟୀ ସହିତ ୮ ଟି ଭାରତୀୟ ଭାଷା ଏବଂ ୩ ଟି ଆନ୍ତର୍ଜାତୀୟ ଭାଷାକୁ ସପୋର୍ଟ କରେ।
Hoote app ଗୁଗୁଲ୍ ପ୍ଲେ ଷ୍ଟୋରରେ ମାଗଣା ଡାଉନଲୋଡ୍ ପାଇଁ ଉପଲବ୍ଧ। ଏହି ଆପ୍ ପ୍ରଥମେ ଆପଣଙ୍କୁ ଭାରତୀୟ କିମ୍ବା ଆନ୍ତର୍ଜାତୀୟ ଭାଷା ବାଛିବା ପାଇଁ କହିଥାଏ, ତାପରେ ଆପଣଙ୍କୁ ସିଧାସଳଖ ପଞ୍ଜୀକରଣ ପ୍ରକ୍ରିୟାକୁ ନେଇଯାଏ। ଏହି ଆପ୍ ଆପଣଙ୍କୁ ସୁପରଷ୍ଟାର ରଜନୀକାନ୍ତ, ଗୌତମ ଗମ୍ଭୀରଙ୍କ ପରି ସେଲିବ୍ରିଟି, ନ୍ୟୁଜ୍ ଚ୍ୟାନେଲ, ରାଜନେତା ଏବଂ ଫ୍ୟାନ୍ସ ପେଜକୁ ଫଲୋ କରିବାକୁ ସୁବିଧା ଦେଇଥାଏ। ଆପଣ ଯାହାକୁ ଅନୁସରଣ କରିବେ, ତାଙ୍କର Hoote ପୋଷ୍ଟଗୁଡିକ ଆପଣଙ୍କୁ ଦେଖାଯିବ। ଏହି ଆପ୍ ଦ୍ୱାରା ଆପଣ ୬୦ ସେକେଣ୍ଡ୍ ପର୍ଯ୍ୟନ୍ତ ଏକ ଭଏସ୍ ନୋଟ୍ ପଠାଇବାକୁ ସୁବିଧା ପାଇବେ। ଥରେ ରେକର୍ଡିଂ ସଂପୂର୍ଣ୍ଣ ହୋଇଗଲେ, ୟୁଜର୍ସ ପୋଷ୍ଟରେ କ୍ୟାପସନ୍, ବ୍ୟାକଗ୍ରାଉଣ୍ଡ୍ ମ୍ୟୁଜିକ୍ ଏବଂ ଏକ ଇମେଜ୍ ଯୋଡିପାରିବେ। ଆପଣଙ୍କୁ ଅନେକ ସଂଗୀତ ବାଛିବା ପାଇଁ ବିକଳ୍ପ ଦିଆଯାଇଛି। ଥରେ ଆପଣ ସଂଗୀତ ଚୟନ କରିବା ପରେ, ଆପଣ ଏହାର ପ୍ରୀଭ୍ୟୁ ମଧ୍ୟ ଶୁଣିପାରିବେ। ପୋଷ୍ଟର କ୍ୟାପସନ୍ ୧୨୦ ଶବ୍ଦ କିମ୍ବା ତା’ଠାରୁ କମ୍ ହେବା ଜରୁରୀ। ୟୁଜର୍ସ ପ୍ରୋଫାଇଲ୍ ଆଇକନ୍ ଉପରେ ଟ୍ୟାପ୍ କରି ସହଜରେ ସେମାନଙ୍କର ହୁଟ୍ ପୋଷ୍ଟଗୁଡିକ ଡିଲିଟ୍ ବି କରିପାରିବେ। ଅନ୍ୟାନ୍ୟ ସୋସିଆଲ୍ ମିଡିଆ ଆପ୍ ପରି, ଆପଣ ମଧ୍ୟ ଏହି ଆପରେ ପୋଷ୍ଟଗୁଡିକ ଲାଇକ୍, ରିପୋଷ୍ଟ ଏବଂ ସେୟାର କରିପାରିବେ।
