ବଳଙ୍ଗା : ବଳଙ୍ଗା ଥାନା ବେରବୋଇ ଗ୍ରାମର ଜଣେ ନାବାଳକ ପୋଖରୀରେ ଗାଧୋଉଥିବାବେଳେ ବୁଡ଼ି ଯିବାରୁ ତା’ର ମୃତ୍ୟୁ ହୋଇଛି। ମୃତ ନାବାଳକ ଜଣକ ଗ୍ରାମର ଗୌତମ ରାଉତଙ୍କ ପୁଅ ଶତ୍ରୁଘ୍ନ ରାଉତ (୧୫) ବୋଲି ଜଣାପଡ଼ିଛି । ଏ ସମ୍ପର୍କରେ ମୃତ ନାବାଳକର ଦାଦା ଧ୍ରୁବ ଚରଣ ରାଉତଙ୍କ ପକ୍ଷରୁ ବଳଙ୍ଗା ଥାନାରେ ଲିଖିତ ଅଭିଯୋଗ କରାଯାଇଛି । ଅଭିଯୋଗ ଆଧାରରେ ଏକ ଅପମୃତ୍ୟୁ ମାମଲା ରୁଜୁ କରାଯିବା ସହ ବଳଙ୍ଗା ଥାନା ଅଧିକାରୀ ସମରେନ୍ଦ୍ର ପାଇକରାୟ ଘଟଣାସ୍ଥଳରେ ପହଞ୍ଚି ଶବ ଜବତ କରି ବ୍ୟବଚ୍ଛେଦ ନିମନ୍ତେ ଚାରିଛକ ମେଡିକାଲକୁ ପଠାଇ ଘଟଣାର ତଦନ୍ତ ଆରମ୍ଭ କରିଛନ୍ତି ।
ଗତକାଲି ଗ୍ରାମର ଏକ ପୋଖରୀରେ ଗ୍ରାମବାସୀ ରାତିରେ ମାଛ ଧରୁଥିବା ବେଳେ ଶତ୍ରୁଘ୍ନ ସେମାନଙ୍କ ସହ ରାତି ଅନିଦ୍ରା ହୋଇ ମାଛ ଧରିଥିଲା । ତେବେ ଆଜି ସକାଳୁ ନିଜ ବୋଉଙ୍କ ସହ ଗ୍ରାମର ଅନ୍ୟ ଏକ ପୋଖରୀରେ ଗାଧୋଉଥିବା ବେଳେ ବୋଉ ଜଲଦି ଗାଧୋଇ ଘରକୁ ଆସିବାକୁ ଶତ୍ରୁଘ୍ନଙ୍କୁ କହିଥିଲେ । ଶତ୍ରୁଘ୍ନଙ୍କ ସହ ଗ୍ରାମର ଅନ୍ୟ ୩ଜଣ ପିଲା ମଧ୍ୟ ପୋଖରୀରେ ଗାଧୋଉ ଥିଲେ । ତେବେ ଏହି ସମୟରେ ଶତ୍ରୁଘ୍ନ ହଠାତ ପାଣିରେ ବୁଡିଯାଇଥିଲେ । ଅନ୍ୟ ପିଲା ମାନେ ଗାଁକୁ ଆସି ଶତ୍ରୁଘ୍ନଙ୍କ ପରିବାର ଲୋକଙ୍କୁ ଜଣାଇବାରେ ପରିବାର ଲୋକେ ପୋଖରୀ ନିକଟରେ ପହଞ୍ଚି ଶତ୍ରୁଘ୍ନକୁ ପାଣି ଭିତରୁ ଉଦ୍ଧାର କରି ଚିକିତ୍ସା ନିମନ୍ତେ ବଳଙ୍ଗା ଡାକ୍ତରଖାନାକୁ ନେଇଥିଲେ ସେଠାରେ ଡାକ୍ତର ଶତ୍ରୁଘ୍ନକୁ ମୃତ ଘୋଷଣା କରିଥିଲେ ।