ସାବାଡ୍ ହେବେ ନକଲି ଡାକ୍ତର

ଭୁବନେଶ୍ବର : ସାବାଡ୍ ହେବେ ନକଲି ଡାକ୍ତର । ରାଜ୍ୟରେ ନକଲି ଡାକ୍ତରଙ୍କୁ ଧରିବା ପାଇଁ ଗଠନ ହେଲା ସ୍ବାସ୍ଥ୍ୟ ବିଭାଗର ଆଣ୍ଟି-କ୍ବାକେରି ସେଲ । ପ୍ରତି ଜିଲ୍ଲାରେ ଏହି ସେଲ କାର୍ୟ୍ୟ କରିବ । ୫ ଜଣିଆ ଆଣ୍ଟି- ୱାକେରୀ ସେଲରେ ଜିଲ୍ଲାପାଳଙ୍କ ପ୍ରତିନିଧି, ଏସପିଙ୍କ ପ୍ରତିନିଧି, ସିଡିଏମଓ, ଜିଲ୍ଲା ନ୍ୟାୟିକ ସେବା ପ୍ରାଧିକରଣର ପ୍ରତିନିଧି ଏବଂ ଭାରତୀୟ ମେଡିକାଲ ଆସୋସିଏସନର ଜଣେ ସଦସ୍ୟ ପ୍ରତିନିଧି ସାମିଲ ରହିଛନ୍ତି । ପ୍ରତି ୧୫ ଦିନରେ ଥରେ ସେଲ ଜିଲ୍ଲାରେ ନକଲି ଡାକ୍ତରଙ୍କ ଉପରେ କାର୍ୟ୍ୟନୁଷ୍ଠାନ ସମ୍ପର୍କିତ ରିପୋର୍ଟ ସ୍ୱାସ୍ଥ୍ୟ ବିଭାଗକୁ ପ୍ରଦାନ କରିବେ ।କୌଣସି ସ୍ଥାନରେ ନକଲି ଡାକ୍ତରଙ୍କ ଚିକିତ୍ସା ସମ୍ପର୍କରେ ଅଭିଯୋଗ ମିଳିଲେ ତୁରନ୍ତ ଚଢ଼ାଉ କରାଯିବ । ଏହାବାଦ୍ ସାଧାରଣ ଲୋକଙ୍କ ଅଭିଯୋଗ କିମ୍ବା ସୋସିଆଲ ମିଡ଼ିଆରୁ କାର୍ୟ୍ୟରତ ନକଲି ଡ଼ାକ୍ତର ସମ୍ପର୍କରେ ଜଣାପଡିଲେ ଆଣ୍ଟି- ୱାକେରୀ ସେଲ ପଦକ୍ଷେପ ନେବା ସହ କାର୍ୟ୍ୟନୁଷ୍ଠାନ ମଧ୍ୟ ଗ୍ରହଣ କରାଯିବ । ନକଲି ଡାକ୍ତରଙ୍କ ‌ପାଇଁ ରାଜ୍ୟରେ ନିରୀହ ଲୋକ ଯେପରି ହଇରାଣ ନ ହୁଅନ୍ତି, ସେନେଇ ଦୃଢ଼ ପଦକ୍ଷେପ ନେଉଛି ସ୍ୱାସ୍ଥ୍ୟ ବିଭାଗ । ସୂଚନା ଥାଉକି, ବୈଧ ଡିଗ୍ରୀ ଅଥବା ପ୍ରମାଣପତ୍ର ନଥାଇ ଜଣେ ବ୍ୟକ୍ତି ନିଜକୁ ଡାକ୍ତର ବୋଲି ଦର୍ଶାଇ କାର୍ୟ୍ୟ କରିବା ଏକ ଫୌଜଦାରୀ ଅପରାଧ ଅଟେ । କିନ୍ତୁ ଏଭଳି ଘଟଣା ରାଜ୍ୟରେ ଅନେକବାର ସାମ୍ନାକୁ ଆସୁଛି । ଯାହାକୁ ନେଇ ବିଭିନ୍ନ ସମୟରେ ମାମଲା ମଧ୍ୟ ରୁଜୁ ହୋଇଛି ।