ତେଲକୋଇ : ହାତୀ କରିଡର ନିକଟରେ ପଥର କ୍ରସର ନିର୍ମାଣ ଯୋଗୁଁ ଗଜରାଜ ଏବେ ଗାଁ ମୁହାଁ । ତେଲକୋଇ ବନାଞ୍ଚଳରେ ହାତୀଙ୍କ ଚଳପ୍ରଚଳ ଅଧିକ ଥିବାବେଳେ ଏଠାରେ ଷ୍ଟୋନ କ୍ରସର ସଂଖ୍ୟା ମଧ୍ୟ ଅଧିକ ରହିଛି । କ୍ରସର ୟୁନିଟ ପାଇଁ ପଥରର ଆବଶ୍ୟକତା ଥିବାବେଳେ ଜଙ୍ଗଲରେ ଥିବା ପାହାଡରେ ରାତି ଦିନ ଅହରହ ବ୍ଲାଷ୍ଟିଙ୍ଗ କରାଯାଉଛି । ଯାଫଳରେ ସାଧାରଣ ଲୋକଙ୍କ ସହିତ ବନ୍ୟଯନ୍ତୁ ମଧ୍ୟ ପ୍ରଭାବିତ ହେଉଥିବା ଅଭିଯୋଗ ହେଉଛି । ଗତିପଥ ବଦଳାଇ ହାତୀ ପଲ ଗାଁ ମୁହାଁ ହୋଇ ବହୁ କ୍ଷୟକ୍ଷତି ଘଟାଉଥିବା ଦେଖିବାକୁ ମିଳିଛି । ଏଭଳି ଘଟଣା ଦେଖିବାକୁ ମିଳିଛି ତେଲକୋଇ ଅଞ୍ଚଳରେ ।
ତେଲକୋଇ ତହସିଲ ଓ ବାଶଂପାଳ ତହସିଲ ଅଞ୍ଚଳରେ ରହିଛି ପାଞ୍ଚଟି କ୍ରସର ୟୁନିଟ । ଯାହାପାଇଁ ଦୈନିକ ହଜାର ହଜାର ଟନର ପଥରର ଆବଶ୍ୟକ ପଡିଥାଏ । ସେଥିପାଇଁ ପାହାଡରେ ବ୍ଲାଷ୍ଟିଙ୍ଗ କରାଯାଉଛି ଏବଂ ସେସବୁ ପଥରକୁ ୧୦ ଚକିଆ ହାଇଓ୍ବା ଗାଡ଼ିରେ କ୍ରସରକୁ ବୁହାଯାଉଛି । ଦୈନିକ ଶହ ଶହ ଟ୍ରିପ ପଥର ଗାଁ ରାସ୍ତାରେ ବୁହା ଯାଉଥିବାରୁ ରାସ୍ତାର ଅବସ୍ଥା ମଧ୍ୟ ଖରାପ ହୋଇପଡୁଛି । ବ୍ଲାଷ୍ଟିଙ୍ଗ ଦ୍ବାରା ବନ୍ୟଯନ୍ତୁ ପ୍ରଭାବିତ ହେବା ସହିତ ପାଖ ଗାଁ ଗୁଡିକରେ ଥିବା ଘର ମଧ୍ୟ ଦୋହଲି ଯାଉଛି । ହାତୀ ପଲ ଗତିପଥ ବଦଳାଇ ଗାଁ ମୁହାଁ ହୋଇ ବ୍ୟାପକ ଫସଲ ନଷ୍ଟ କରିବା ସହ ଘର ଭାଙ୍ଗୁଛନ୍ତି । ବେଳେ ବେଳେ ହାତୀ ଆକ୍ରମଣର ଶିକାର ହେଉଛନ୍ତି ସାଧାରଣ ଲୋକେ ।
ସେହିଭଳି ତେଲକୋଇ ତହସିଲ ସିମା ଓ ବାଶଂପାଳ ତହସିଲ ସିମାନ୍ତ ଅନ୍ତର୍ଗତ କାକୁଡିଅମ୍ବା ଗାଁ ନିକଟ ଲୁକାଚୁପି ପାହାଡରେ ରହିଛି ଏକ ପଥର କ୍ରସର । କ୍ରସର ନିକଟରେ ରହିଛି ତେଲକୋଇ -ପାଲ୍ଲଲହଡା ହାତୀ କରିଡର । ସେଠାରେ ଦିନବେଳା ବ୍ଲାଷ୍ଟିଙ୍ଗ ହେବା ଫଳରେ ଗାଇ ଓ ଛେଳି ଚରାଳିଙ୍କ ଦେହରେ ମଧ୍ୟ ପଥର ବାଜୁଥିବା ଅଭିଯୋଗ ଆଣିଛନ୍ତି ଗ୍ରାମବାସୀ । ରାତ୍ରି ସମୟରେ ବ୍ଲାଷ୍ଟିଙ୍ଗ ଯୋଗୁଁ ହାତୀମାନେ ମଧ୍ୟ ଗତିପଥ ବଦଳାଇ ଗାଁ ମୁହାଁ ହୋଇ ବ୍ୟାପକ କ୍ଷୟକ୍ଷତି ଘଟାଉଛନ୍ତି । କ୍ରସରକୁ ଆସୁଥିବା ଭାରିଯାନ ଯୋଗୁଁ ଗାଁ ରାସ୍ତାର ଅବସ୍ଥା ଶୋଚନୀୟ ହୋଇ ପଡିଛି । ରାସ୍ତାର ପିଚୁ ଉଠିଯାଇ ମେଣ୍ଟାଲ ଦେଖାଯାଉଛି । ଯାତାୟାତରେ ବହୁତ ଅସୁବିଧା ହେଉଛି । ଏହାକୁ ନେଇ ଜିଲ୍ଲାପାଳଙ୍କୁ ବାରମ୍ବାର ଅଭିଯୋଗ ପରେ ମଧ୍ୟ ଫଳଶୂନ ହେବାରୁ ଏହାକୁ ବିରୋଧ କରି କାକୁଡିଅମ୍ବା ଗ୍ରାମବାସୀ ଆଜି ରୁଗୁଡିହ -କାକୁଡିଅମ୍ବା ରାସ୍ତାକୁ ଅନିର୍ଦ୍ଦିଷ୍ଟ ସମୟ ପର୍ଯ୍ୟନ୍ତ ଅବରୋଧ କରିଛନ୍ତି । ସମସ୍ୟାର ସମାଧାନ ନହେବା ଯାଏ ଆନ୍ଦୋଳନରୁ ନ ହଟିବା ପାଇଁ ନିଷ୍ପତ୍ତି ନେଇଛନ୍ତି ଗ୍ରାମବାସୀ ।
ହାତୀ କରିଡରରେ କ୍ରସର ୟୁନିଟ, ବାରମ୍ବାର ବ୍ଲାଷ୍ଟିଙ୍ଗ ଯୋଗୁଁ ଗତିପଥ ବଦଳାଇ ହାତୀ ପଲ ଗାଁ ମୁହାଁ
