କୋରାପୁଟ: ଶ୍ୱଶୁରକୁ ହତ୍ୟା କଲା ଜ୍ୱାଇଁ । କୋରାପୁଟ ଜିଲ୍ଲା ନାରାୟଣପାଟଣା ଥାନା ଅନ୍ତର୍ଗତ ବାସନାପୁଟ ଗ୍ରାମରେ ଅଭାବନୀୟ ଘଟଣା ଘଟିଛି । ଝିଅକୁ ଘରେ ରଖିବାକୁ କେନ୍ଦ୍ର କରି ଶ୍ୱଶୁରଙ୍କୁ ଜ୍ୱାଇଁ ଛୁରାମାଡ କରି ହତ୍ୟା କରିଥିବା ଅଭିଯୋଗ ସାମ୍ନାକୁ ଆସିଛି । ଘଟଣାସ୍ଥଳରେ ପୋଲିସ ଓ ସାଇଣ୍ଟିଫିକ ଟିମ ପହଞ୍ଚି ଘଟଣାର ତଦନ୍ତ ଆରମ୍ଭ କରିଥିବା ବେଳେ ଫେରାର ଜ୍ୱାଇଁକୁ ଖୋଜୁଛି ପୋଲିସ । ଅନ୍ୟପଟେ ଗଜପତି ଜିଲ୍ଲା ପାରଳାଖେମୁଣ୍ଡି ଅଞ୍ଚଳରେ ଆଉ ଏକ ହତ୍ୟା ଘଟଣା ସାମ୍ନାକୁ ଆସିଛି । ବିଲ ଭିତରେ ସ୍ଥାନୀୟ ଅଞ୍ଚଳର ଜଣେ ଯୁବକଙ୍କ ମୃତଦେହ ପଡିଥିବାର ଦେଖିବାକୁ ମିଳିଛି । କେହି ତାଙ୍କୁ ହତ୍ୟା କରି ସେଠାରେ ଫିଙ୍ଗି ଦେଇଥିବା ପୋଲିସ ସନ୍ଦେହ କରିବା ସହ ଘଟଣାର ତଦନ୍ତ ଜାରି ରଖିଛି । କୋରାପୁଟ ଜିଲ୍ଲା ନାରାୟଣପାଟଣା ଥାନା ଅନ୍ତର୍ଗତ ବାସନାପୁଟ ଗ୍ରାମରେ ଏକ ଅଭାବନୀୟ ଘଟଣା ଘଟିଛି । ଗତକାଲି ବିଳମ୍ବିତ ରାତିରେ ଶ୍ୱଶୁରଙ୍କୁ ଜ୍ୱାଇଁ ହତ୍ୟା କରିଥିବା ଅଭିଯୋଗ ସାମ୍ନାକୁ ଆସିଛି । ସୂଚନା ଅନୁଯାୟୀ, ବାସନାପୁଟ ଗ୍ରାମର ରାମଚନ୍ଦ୍ରଙ୍କ ଝିଅଙ୍କୁ ସାତୁ ପ୍ରସକା ବିବାହ କରିଥିଲେ । ରାମଚନ୍ଦ୍ରଙ୍କ ଝିଅ ଗର୍ଭବତୀ ଅବସ୍ଥାରେ କୌଣସି କାରଣରୁ ନିଜ ବାପଘରକୁ ଚାଲିଆସିଥିଲେ ।
ବାପା ଘରେ ଝିଅକୁ ଆଶ୍ରୟ ଦେଇଥିବା ବେଳେ ଏଥିରେ ଉତକ୍ଷିପ୍ତ ହୋଇ ଶ୍ୱଶୁରଙ୍କ ଉପରକୁ ଆକ୍ରମଣ କରିଥିଲେ ଜ୍ୱାଇଁ । ରାମଚନ୍ଦ୍ର ନିଜ ଜୀବନ ବଞ୍ଚାଇବାକୁ ପ୍ରାଣ ବିକଳରେ ଦୌଡି ପଳାଉଥିବା ବେଳେ ନିଜ ଘର ଠାରୁ ୫୦ ମିଟର ଦୂରରେ ତାଙ୍କ ମୃତଦେହ ପଡିଥିବାର ଲୋକେ ଦେଖିବାକୁ ପାଇଥିଲେ । ଅନ୍ୟପଟେ ପୋଲିସ ଓ ସାଇଣ୍ଟିଫିକ ଟିମ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିବା ସହ ତଦନ୍ତ ଜାରି ରଖିଛନ୍ତି । ଅଭିଯୁକ୍ତ ଜ୍ୱାଇଁ ଫେରାର ହୋଇଯାଇଥିବା ବେଳେ ପୋଲିସ ଖୋଜାଖୋଜି ଜାରି ରଖିଛି । ସେହିଭଳି ଗଜପତି ଜିଲ୍ଲା ପାରଳାଖେମୁଣ୍ଡି ଅଞ୍ଚଳରୁ ନିର୍ମମ ହତ୍ୟାକାଣ୍ଡ ଘଟଣା ସାମ୍ନାକୁ ଆସିଛି । ଗଜପତି ଜିଲ୍ଲା ପାରଳାଖେମୁଣ୍ଡିରୁ ମାତ୍ର ୧୫ କିମି ଦୂର ଗୁରାଣ୍ଡି ଥାନା ଅନ୍ତର୍ଗତ ବାଟିସିରିପୁର ଗାଁର ଜଣେ ଯୁବକଙ୍କୁ ନିର୍ମମ ଭାବେ ହତ୍ୟା କରାଯାଇଛି ।
ଯୁବକ ଜଣକ ଏମ ଲିଙ୍ଗରାଜ (୨୮) । ତେବେ ଜଣେ ସ୍ଥାନୀୟ ଲୋକେ ଗାଁ ନିକଟସ୍ଥ ତୋଟାଗୁମୁଡା ଗାଁ ନିକଟ ମୁଖ୍ୟ ରାସ୍ତା କଡ ବିଲ ଭିତରେ ଏମ ଲିଙ୍ଗରାଜଙ୍କ ମୃତଦେହ ପଡିଥିବାର ଦେଖିଥିଲେ । ତୁରନ୍ତ ପରିବାର ଓ ପୋଲିସକୁ ଏନେଇ ଖବର ଦେଇଥିଲେ । ଖବର ପାଇବା ପରେ ପୋଲିସ ଟିମ୍ ଓ ଏସଡିପିଓ ମାଧବ ନନ୍ଦ ନାୟକ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଗୁରୁବାର ରାତିରେ କେହି ତାଙ୍କୁ ହତ୍ୟା କରି ଫୋଫାଡି ଦେଇଥିବା ପୋଲିସ ସନ୍ଦେହ କରୁଛି । ଏନେଇ ତଦନ୍ତ ଜାରି ରଖିଛି । ଅନ୍ୟପଟେ ପରିବାର ଲୋକଙ୍କ କହିବାନୁଯାୟୀ, ଏମ ଲିଙ୍ଗରାଜ ଗୁରୁବାର ଦିନ ଗାଁରେ ଜଣେ ସାଙ୍ଗର ବାହାଘର ପ୍ରୋସେସନ ସାମିଲ ହେବାକୁ ଯାଇଥିଲେ ।ହେଲେ କିଛି ସମୟ ପରେ ସେ ତାଙ୍କର ଦେଖା ମିଳିନଥିଲା । ଶୁକ୍ରବାର ସକାଳେ ତାଙ୍କର ମୃତଦେହ ବିଲ କଡରେ ପଡିଥିବାର ଦେଖିବାକୁ ମିଳିଥିଲା ।
