ନୂଆଦିଲ୍ଲୀ: କିଛି ଦିନ ପୂର୍ବରୁ ଜନ୍ସନ୍ ଆଣ୍ଡ୍ ଜନ୍ସନ୍ କମ୍ପାନୀ ଏହାର କରୋନା ଟିକାକୁ ମଞ୍ଜୁର କରିବାକୁ ଭାରତ ସରକାରଙ୍କୁ ପ୍ରସ୍ତାବ ଦେଇଥିଲା । କିନ୍ତୁ ବର୍ତ୍ତମାନ କମ୍ପାନୀ ଏହାର ପ୍ରସ୍ତାବ ପ୍ରତ୍ୟାହାର କରି ନେଇଛି । ତେବେ କମ୍ପାନୀର ଏହି ପଦକ୍ଷେପ ପଛର କାରଣ କ’ଣ ତାହା ଏପର୍ଯ୍ୟନ୍ତ ଜଣା ପଡି ନାହିଁ । ଏହି ସୂଚନା ଡ୍ରଗ୍ କଣ୍ଟ୍ରୋଲର୍ ଜେନେରାଲ୍ ଅଫ୍ ଇଣ୍ଡିଆର ଉତ୍ସରୁ ଜଣାପଡିଛି । ବିଦେଶୀ ଟିକା ଆମଦାନି କରି କରୋନା ମହାମାରୀରୁ ମୁକୁଳିବା ପାଇଁ ଭାରତ ଏକ ବଡ ଧରଣର ପ୍ରସ୍ତୁତି କରୁଥିବା ବେଳେ ବର୍ତ୍ତମାନ ଜନ୍ସନ୍ ଆଣ୍ଡ୍ ଜନ୍ସନ୍ ତରଫରୁ ଟିକା ପ୍ରସ୍ତାବ ପ୍ରତ୍ୟାହାର ନେଇ ଭାରତକୁ ଏକ ବଡ଼ ଧରଣର ଝଟ୍କା ଲାଗିପାରେ । ପ୍ରକାଶଥାଉ ଯେ ବର୍ତ୍ତମାନ ଦେଶରେ କରୋନା ବିରୋଧରେ କେବଳ ଗୋଟିଏ ବିଦେଶୀ ଟିକା ବ୍ୟବହାର କରାଯାଉଛି, ତାହା ହେଉଛି ଋଷର ସ୍ପୁଟନିକ୍ ଭି । ଏହାପୂର୍ବରୁ, ଜନ୍ସନ୍ ଆଣ୍ଡ୍ ଜନ୍ସନ୍ ଦାବି କରିଥିଲା ଯେ ଏହାର ଟିକାର ପ୍ରଥମ ଡୋଜ୍ କରୋନା ବିରୋଧରେ ୮୫ ପ୍ରତିଶତ ପ୍ରଭାବଶାଳୀ ଅଟେ ।
ସୂଚନାଯୋଗ୍ୟ ଯେ ଆମେରିକାର ଜନ୍ସନ୍ ଆଣ୍ଡ୍ ଜନ୍ସନ୍ ଚଳିତ ବର୍ଷ ଏପ୍ରିଲରେ ଭାରତରେ କୋଭିଡ୍ ଟିକା ପରୀକ୍ଷା ପାଇଁ ଆବେଦନ କରିଥିଲା । ତେବେ, ସେହି ସମୟରେ ଆମେରିକାରେ ଟିକାକରଣ ଯୋଗୁଁ ରକ୍ତ ଜମାଟ ବାନ୍ଧିବା ଅଭିଯୋଗ ପରେ ଏହାର ପରୀକ୍ଷା ବନ୍ଦ ହୋଇଯାଇଥିଲା । କମ୍ପାନୀ ସେହି ସମୟରେ ଏହାର ଅଫର ପ୍ରତ୍ୟାହାର କରିନେଲା ଯେତେବେଳେ ଭାରତ ଅନ୍ୟ ଏକ ବିଦେଶୀ ଟିକା ସହିତ ଆଇନଗତ ପ୍ରସଙ୍ଗରେ ଜଡିତ ହେଲା । ଆମେରିକାର ଭିତ୍ତିକ କମ୍ପାନି ଜନ୍ସନ୍ ଆଣ୍ଡ୍ ଜନ୍ସନ୍ ଭାରତରେ ନିଜ କୋଭିଡ୍ -୧୯ ଟିକାର ବ୍ରିଜିଙ୍ଗ କ୍ଲିନିକାଲ୍ ଅଧ୍ୟୟନ ପାଇଁ ଏପ୍ରିଲରେ ଅନୁମୋଦନ ଲୋଡିଥିଲା । ପୂର୍ବରୁ ଏହା ମଧ୍ୟ ସୂଚନା ମିଳିଥିଲା ଯେ, ଜନ୍ସନ୍ ଆଣ୍ଡ୍ ଜନ୍ସନ୍ ଟିକାର ହଜାରେ ଡୋଜ ଜୁଲାଇରେ ଭାରତରେ ପହଞ୍ଚିପାରେ । ଏବେ ହଠାତ ଜନ୍ସନ୍ ଆଣ୍ଡ୍ ଜନ୍ସନ୍ ଅନୁମୋଦନ ପ୍ରସ୍ତାବ ପ୍ରତ୍ୟାହାର କରିନେବା ଖବର ଚର୍ଚ୍ଚାର ବିଷୟ ପାଲଟିଥିବା ବେଳେ ଏହାର କାରଣ ଜଣାପଡ଼ିନାହିଁ । ଟିକା ଆମଦାନୀ ପ୍ରସ୍ତାବରେ ସମ୍ମୁଖୀନ ହୋଇଥିବା ସମସ୍ୟା ସମ୍ପର୍କରେ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରୀ ଭାରତୀ ପ୍ରବୀଣ ପାୱାର କହିଛନ୍ତି ଯେ ଟିକାକରଣ ସମୟରେ ଟିକା ସହ ଜଡିତ ସମସ୍ୟାର ସମାଧାନ ପାଇଁ ଏକ ଟିମ୍ ଗଠନ କରାଯାଇଛି । ସେ ଏହା ମଧ୍ୟ କହିଛନ୍ତି ଯେ ଏହି ଟିମ୍ ଫାଇଜର, ଜନ୍ସନ୍ ଆଣ୍ଡ୍ ଜନ୍ସନ୍ ଏବଂ ମର୍ଡନା କମ୍ପାନୀଗୁଡିକ ସହିତ ନିରନ୍ତର ଆଲୋଚନା କରୁଛି ।
