ଭୁବନେଶ୍ୱର : ରାଜ୍ୟ ସରକାରଙ୍କ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା( ବିଏସ୍କେୱାଇ) ଓ କେନ୍ଦ୍ର ସରକାରଙ୍କ ଆୟୁଷ୍ମାନ୍ ଭାରତ ସ୍ୱାସ୍ଥ୍ୟ ଯୋଜନାକୁ ନେଇ ବିଜେପି – ବିଜେଡି ଭିତରେ ରାଜନୈତିକ ବୟାନ ବାଜି ଓ ଅକ୍ଷେପ ଓ ପ୍ରତିଆକ୍ଷେପ ଦୀର୍ଘଦିନ ହେଲା ଜାରି ରହିଛି । ବିଜୁ ସ୍ୱାସ୍ଥ୍ୟ ଯୋଜନାକୁ ଅଧିକ ବ୍ୟାପକ କରିବା ପାଇଁ ଏଥିରେ ସହାୟତା ରାଶି ଓ କେତେକ ଦିଗକୁ ପରିବର୍ତ୍ତନ କରି ପୁଣି ନୂଆ ଢ଼ଙ୍ଗରେ ରାଜ୍ୟ ସରକାର ଆରମ୍ଭ କରିଛନ୍ତି । ମୁଖ୍ୟମନ୍ତ୍ରୀ ଏହି ଯୋଜନା ଆରମ୍ଭ କରିବାକୁ ଯାଉଥିବା ନେଇ ଖବର ପ୍ରକାଶ ପରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଟ୍ୱିଟ୍ କରି କେନ୍ଦ୍ର ସରକାରଙ୍କ ଆୟୁଷ୍ମାନ ଯୋଜନାକୁ ମୁଖ୍ୟମନ୍ତ୍ରୀ ଗ୍ରହଣ କରିବା ଲାଗି ପ୍ରସ୍ତାବ ରଖିଥିଲେ । ଏହାର ଯବାବ ଦେବାକୁ ଯାଇ ବିଜେଡିର ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସ ପାଲଟା ଟ୍ୱିଟ୍ କରି ବିଜୁ ସ୍ୱାସ୍ଥ୍ୟ ଯୋଜନା ଯଥେଷ୍ଟ ଭଲ ବୋଲି ଧର୍ମେନ୍ଦ୍ରଙ୍କୁ ଯବାବ ଦେଇଛନ୍ତି ।
ଦୁଇ ଦଳ ଭିତରେ ଏହି ସ୍ୱାସ୍ଥ୍ୟ ଯୋଜନାକୁ ନେଇ ବିବାଦ ତୁଟୁ ନାହିଁ । ଗତ ନିର୍ବାଚନରେ ମଧ୍ୟ ବିଜେପି ଏହାକୁ ପ୍ରସଙ୍ଗ କରିଥିଲା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଜୁ ସ୍ୱାସ୍ଥ୍ୟ କଳ୍ୟାଣ ଯୋଜନା ଲାଗୁକରିବା ପରଠାରୁ ବିଜେପି ନେତାମାନେ ବାରମ୍ବାର ସମାଲୋଚନା କରି ଆସୁଛନ୍ତି । ଆୟୁଷ୍ମାନ ଯୋଜନା ସର୍ବଭାରତୀୟ ସ୍ତରର ହୋଇଥିବାରୁ ଓଡ଼ିଶା ବାସୀଙ୍କ ସ୍ୱାସ୍ଥ୍ୟକୁ ଦୃଷ୍ଟିରେ ରଖି ଏହାକୁ ଗ୍ରହଣ କରିବା ପାଇଁ ବିଜେପି ପକ୍ଷରୁ ଏହାକୁ ଦାବି କରାଯାଇ ଆସୁଛି । ଏପରିକି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ସ୍ୱାରାଷ୍ଟ୍ର ମନ୍ତ୍ରୀ ଅମିତ୍ ଶାହ ଓ ଅନ୍ୟ ବିଜେପିର ବରିଷ୍ଠ ନେତାମାନେ ଆୟୁଷ୍ମାନ ଯୋଜନା ଲାଗୁ କରିବା ପାଇଁ ମୁଖ୍ୟମନ୍ତ୍ରୀଙ୍କୁ ଅନୁରୋଧ କରି ଆସୁଛନ୍ତି । କିନ୍ତୁ ମୁଖ୍ୟମନ୍ତ୍ରୀ ଏହାକୁ ଗ୍ରହଣ କରି ନାହାଁନ୍ତି । ବରଂ ଯୋଜନାକୁ ସଂଶୋଧିତ କରି ଏହାକୁ ଅଧିକ ଲୋକାଭିମୁଖି କରିବା ପାଇଁ ଉଦ୍ୟମ କରୁଥିବା କୁହାଯାଉଛି ।
ବିଜେପି ପକ୍ଷରୁ ଯୁକ୍ତି ଦର୍ଶାଯାଉଛି ବିଜୁ ସ୍ୱାସ୍ଥ୍ୟ ଯୋଜନାରେ ରାଜ୍ୟ ବାହାରେ ଥିବା ଓଡ଼ିଆମାନେ ସୁବିଧା ପାଇ ପାରୁ ନାହାଁନ୍ତି । ରାଜ୍ୟ ସରକାରଙ୍କ ଯୋଜନା କେବଳ ଏକ ଲୋକ ଦେଖାଣିଆ ବୋଲି ସେମାନେ କହୁଛନ୍ତି । ପ୍ରକୃତରେ ଗରିବ ଲୋକମାନେ ଏଥିରେ ଉପକୃତ ହୋଇ ପାରୁ ନାହାଁନ୍ତି । କିନ୍ତୁ ବିଜେଡି ଏକଥା ମାନିବାକୁ ନାରାଜ । ପାଲଟା ସମାଲୋଚନା କରି ଆୟୁଷ୍ମାନ ଅପେକ୍ଷା ବିଜୁ ସ୍ୱାସ୍ଥ୍ୟ ଯୋଜନା ଢ଼େର୍ ଗୁଣରେ ଭଲ ବୋଲି ଯୁକ୍ତି ଦର୍ଶାଇଛନ୍ତି । ବାସ୍ତବରେ ବିଜୁ ସ୍ୱାସ୍ଥ୍ୟ ଯୋଜନାରେ ଗରିବ ଲୋକମାନେ ଉପକୃତ ହେଉଛନ୍ତି ବୋଲି ବିଜେଡି ନେତାମାନେ କହିଛନ୍ତି । ଏହି ବାଦବିବାଦ ଭିତରେ ଉଭୟ ସକରାରଙ୍କ ସ୍ୱାସ୍ଥ୍ୟ ଯୋଜନା ଚାଲିଛି । ଓଡ଼ିଶାରେ ନବୀନ ଏହି ଯୋଜନାକୁ ଲାଗୁ କରାଇ ଦେବା ସପକ୍ଷରେ ନାହାଁନ୍ତି । କଂଗ୍ରେସ ଏଥିରେ ଉଭୟ ଦଳର ଯୋଜନାକୁ ସମାଲୋଚନା କରି ଭୋଟ୍ ରାଜନୀତି ପାଇଁ ଏପରି କରାଯାଉଥିବା କହୁଛି ।
କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଟ୍ୱିଟ୍ କରି କହିଛନ୍ତି ଯେ,
ଧର୍ମେନ୍ଦ୍ରଙ୍କ ଏହି ଟ୍ୱିଟ୍ ପରେ ତାଙ୍କୁ ଯବାବ ଦେବାକୁ ଯାଇ ବିଜେଡି ସଂଗଠନ ସଂପାଦକ ପ୍ରଣବ ପ୍ରକାଶ ପାଲଟା ଟ୍ୱିଟ୍ରେ କହିଛନ୍ତି ଯେ,
ଭାଇ @dpradhanbjp ଆୟୁଷ୍ମାନ ଭାରତ ନେବେ କି? ଆୟୁଷ୍ମାନ ଭାରତର ହିତାଧିକାରୀ ୬୦ ଲକ୍ଷରେ ସୀମିତ କିନ୍ତୁ #BSKY ର ହିତାଧିକାରୀ 96 ଲକ୍ଷ ପରିବାର, ଯାହା ପ୍ରାୟ ଶତ ପ୍ରତିଶତ। ଆୟୁଷ୍ମାନ ଭାରତର କଭରେଜ ସରକାରୀ ହସ୍ପିଟାଲ୍ ସମେତ ମାତ୍ର ₹୫ ଲକ୍ଷ, କିନ୍ତୁ #BSKY ଯୋଜନାରେ ସରକାରୀ ହସ୍ପିଟାଲ ରେ କୌଣସି ସୀମା ନାହିଁ।
— Pranab Prakash Das (@pranabpdas) August 20, 2021
ଆୟୁଷ୍ମାନ ଭାରତରେ ନିର୍ଦ୍ଦିଷ୍ଟଭାବେ ମା'ମାନଙ୍କ ପାଇଁ ଶୂନ୍ୟ ସୁବିଧା ରହିଛି। କିନ୍ତୁ #BSKY ରେ ସ୍ୱତନ୍ତ୍ର ଭାବେ ₹୧୦ ଲକ୍ଷ ପର୍ଯ୍ୟନ୍ତ ବ୍ୟବସ୍ଥା ରହିଛି। ଆୟୁଷ୍ମାନରେ ଆପୋଲୋ, ଫର୍ଟିଜ ଭଳି ହସ୍ପିଟାଲ ଅନ୍ତର୍ଭୁକ୍ତ ନୁହେଁ କିନ୍ତୁ #BSKY ରେ ଆପୋଲୋ, ଫର୍ଟିଜ ସହ ପ୍ରାୟ ସମସ୍ତ ବଡ଼ ବଡ଼ ହସ୍ପିଟାଲ ଅନ୍ତର୍ଭୁକ୍ତ।
— Pranab Prakash Das (@pranabpdas) August 20, 2021
ଆୟୁଷ୍ମାନ ଭାରତ ହେଉଛି ଏକ ଇନ୍ସୁରାନ୍ସ କିନ୍ତୁ #BSKY ହେଉଛି ଏସୁରାନ୍ସ, ସମ୍ପୂର୍ଣ୍ଣ ସ୍ୱାସ୍ଥ୍ୟସେବାର ଭରସା। @dpradhanbjp ଭାଇ ଆମେ ମମତା ଯୋଜନା କଲୁ ଆପଣ କଲେ, ଆମେ କାଳିଆ ଯୋଜନା କଲୁ ଆପଣ କଲେ। ଆମେ #BSKY କରୁଛୁ, ମୁ ସୁନିଶ୍ଚିତ ଆପଣବି କରିବେ।
All the best— Pranab Prakash Das (@pranabpdas) August 20, 2021
ଏହି ବିବାଦ ଭିତରେ ମୁଖ୍ୟମନ୍ତ୍ରୀ ଶୁକ୍ରବାର ମାଲକାନଗିରିରୁ ଏହି ସଂଶୋଧିତ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଆରମ୍ଭ କରିଛନ୍ତି । ଏଥିରେ ୯୬ଲକ୍ଷ ପରିବାରଙ୍କୁ ଅନ୍ତର୍ଭୁକ୍ତ କରାଯିବ ବୋଲି ଘୋଷଣା କରିଛନ୍ତି ।
