କଟକ : ସାରଦା ଚିଟ୍ଫଣ୍ଡ ଘଟଣାରେ ବଙ୍ଗଳାର ପ୍ରସିଦ୍ଧ ଦୈନିକ ଖବର କାଗଜ ‘’ଇ ସମୟ’’ ର ସମ୍ପାଦକ ତଥା ଦିଶା ପ୍ରଡକ୍ସନ୍ ଏଣ୍ଡ୍ ମିଡିଆ ପ୍ରାଇଭେଟ୍ ଲିମିଟେଡ୍ର ପୂର୍ବତନ ନିର୍ଦ୍ଦେଶକ ବରିଷ୍ଠ ସାମ୍ବାଦିକ ସୁମନ ଚଟ୍ଟୋପାଧ୍ୟାୟଙ୍କ ଆଗୁଆ ଜାମିନ ଆବେଦନ ମାମଲା ହାଇକୋର୍ଟରେ ଖାରଜ ହୋଇଯାଇଛି । ହାଇକୋର୍ଟର ବିଚାରପତି ଏସ୍. ପୂଜାହାରୀଙ୍କ ଖଣ୍ଡପୀଠ ତାଙ୍କ ଜାମିନ ଆବେଦନକୁ ଖାରଜ କରିଛନ୍ତି । ଆବେଦନକାରୀ ସୁମନ ଚଟୋପାଧୟଙ୍କ ପକ୍ଷରୁ ହାଇକୋର୍ଟରେ ଏହି ମାମଲାକୁ ଆଇନଜୀବୀ ଦେବାଶୀଷ ପଣ୍ଡା ପରିଚାଳନା କରୁଥିବାବେଳେ ସିବିଆଇ ପକ୍ଷରୁ ଏହି ମାମଲାକୁ ସ୍ୱତନ୍ତ୍ର ପବ୍ଲିକ୍ ପ୍ରସିକ୍ୟୁଟର ସାର୍ଥକ ନାୟକ ପରିଚାଳନା କରୁଥିଲେ ।
ଶ୍ରୀ ଚଟୋପାଧ୍ୟାୟ ସାରଦା ଚିଟ୍ଫଣ୍ଡ ଘଟଣାରେ ଆଗୁଆ ଆବେଦନ କରିଥିଲେ । ଅଦାଲତ ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ ନାହିଁ ବୋଲି ଦର୍ଶାଇ ଗତ ୨୦୨୦ ଅଗଷ୍ଟ ୧୪ ତାରିଖ ପର୍ଯ୍ୟନ୍ତ ତାଙ୍କୁ ଅନ୍ତରୀଣ ସୁରକ୍ଷା ଦେଇଥିଲେ । ସୂଚନା ଥାଉକି ଅଦାଲତ ୩ ହଜାର କୋଟି ଟଙ୍କାର ଆଇକୋର୍ ଚିଟ୍ଫଣ୍ଡ ମାମଲାରେ ଅନୁକୁଳ ମାଇତିଙ୍କୁ ପୂର୍ବରୁ ଜାମିନ ମିଳିସାରିଛି । ସର୍ବୋଚ୍ଚ ଅଦାଲତଙ୍କ ନିର୍ଦ୍ଦେଶ ଆଧାରରେ ୨୦୧୪ ମସିହାରେ ସିବିଆଇ ଏହି ସଂସ୍ଥା ବିରୋଧରେ ମାମଲା ରୁଜୁ କରିଥିଲା । ଏହା ପରେ ସିବିଆଇ ସଂସ୍ଥାର ନିର୍ଦ୍ଦେଶକ ଅନୁକୂଳ ମାଇତି ଓ ତାଙ୍କ ସ୍ତ୍ରୀ କନକା ମାଇତି ଗିରଫ ହୋଇଥିଲେ ।
ଏହି ମାମଲାରେ ପୂର୍ବରୁ ସୁମନ ଚଟ୍ଟୋପାଧ୍ୟାୟଙ୍କୁ ୨୦୧୮ ମସିହା ଡିସେମ୍ବର ୨୦ ତାରିଖରେ ଗିରଫ କରିଥିଲା । ସେ ତାଙ୍କର ଖବରକାଗଜ ଓ ମାଗାଜିନ୍ ନିମନ୍ତେ ଶାରଦା ଗୃପ୍ ସମେତ ଅନ୍ୟ ଦୁଇଟି ସଂସ୍ଥାରୁ ୫ କୋଟି ଟଙ୍କା ଋଣ ନେଇଥିଲେ । ଏହି ମାମଲାରେ ତାଙ୍କୁ ଜାମିନ ମିଳିଥିଲାବେଳେ ସାରଦା ଚିଟ୍ଫଣ୍ଡ ମାମଲାରେ ଜାମିନ ଖାରଜ ହୋଇଛି ।