ମୋ ମା ମୋତେ ଘର ଛାଡି ଦୂରକୁ ଚାଲିଯିବାକୁ କହୁଥିଲେ : ରବି କିଶନ

ମୁମ୍ବାଇ: ଜଣେ ମହାନ ଅଭିନେତା ହେବା ବ୍ୟତୀତ ସେ ଜଣେ ସଫଳ ରାଜନେତା । ଭୋଜପୁରୀ ଚଳଚ୍ଚିତ୍ର ବ୍ୟତୀତ ରବି କିଶନ ବଲିଉଡ ଇଣ୍ଡଷ୍ଟ୍ରିରେ ମଧ୍ୟ ଅନେକ ନାମ ଅର୍ଜନ କରିଛନ୍ତି। ନିକଟରେ ମୁକ୍ତିଲାଭ କରିଥିବା ଅକ୍ଷୟ କୁମାରଙ୍କ ‘ମିଶନ ରାନିଗଞ୍ଜ’ରେ ରବି କିଶନ ମଧ୍ୟ ଏକ ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିଥିଲେ। ଭୋଜପୁରୀ ଇଣ୍ଡଷ୍ଟ୍ରିର ଏହି ସୁପରଷ୍ଟାରଙ୍କୁ ତାଙ୍କ ବାପା ହତ୍ୟା କରିବାକୁ ଚାହୁଁଥିଲେ । ଏ ବିଷୟରେ ଅଭିନେତା ନିଜେ ଏକ ସାକ୍ଷାତକାରରେ ଜଣାଇଛନ୍ତି । ଛୋଟବେଳେ ସେ ନାଟକରେ ମାତା ସୀତାଙ୍କ ଅଭିନୟ କରିଥିବାରୁ ତାଙ୍କ ବାପା ରାଗିଯାଇଥିଲେ ବୋଲି କହିଛନ୍ତି ରବି । ତାଙ୍କ କହିବା ମୁତାବକ, “ଜଣେ ବ୍ରାହ୍ମଣ ହିସାବରେ ମୋ ବାପା ଚାହୁଁଥିଲେ ଯେ ମୁଁ ପୂଜାରୀ ହୁଏ, ନଚେତ ସରକାରୀ ଚାକିରି କରେ । ଯେବେ ସେ ମୋତେ ମାତା ସୀତାଙ୍କ ଭୂମିକାରେ ଅଭିନୟ କରୁଥିବାର ଦେଖିଲେ ସେବେଠାରୁ ସେ ମୋତେ ଘୃଣା କରିବା ଆରମ୍ଭ କରିଥିଲେ । ଏମିତିକି ସେ ମୋତେ ହତ୍ୟା କରିବାକୁ ବି ଚାହୁଁଥିଲେ। ସେଥିପାଇଁ ମୋ ମା ମୋତେ ଘର ଛାଡି ଦୂରକୁ ଚାଲିଯିବାକୁ କହୁଥିଲେ। ହେଲେ ମୁଁ ଘରେ ରହି ତାଙ୍କ ମାଡ଼ ଖାଇଥିଲି ଏବଂ ଜୀବନ ବିଷୟରେ ଅନେକ କିଛି ଶିଖିଥିଲି । ଆଜି ମୁଁ ଯୋଉଠି ଅଛି କେବଳ ମୋ ବାପାଙ୍କ ପାଇଁ । ସେ ମୋର ଅଭିନୟ କରିବାର ନିଷ୍ପତ୍ତିକୁ ପସନ୍ଦ କରୁନଥିଲେ ବି ପରେ ସେ ମୋ ଉପରେ ଗର୍ବିତ ବୋଲି କହିଥିଲେ ।