ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅପରାହ୍ନ 5 ଟାରେ ଦେଶକୁ ସମ୍ବୋଧିତ କରିବେ। PMO ଟୁଇଟ୍ କରି ଏ ବିଷୟରେ ସୂଚନା ଦେଇଛନ୍ତି। PMO ଙ୍କ ଆକାଉଣ୍ଟରୁ ଏହା ଟୁଇଟ୍ କରାଯାଇଛି ଯେ – ‘ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଦେଶକୁ ସମ୍ବୋଧିତ କରିବେ ଅର୍ଥାତ୍ ଜୁନ୍ 7 ରେ ଅପରାହ୍ନ 5 ଟାରେ ।’ ତେବେ କେଉଁ ପ୍ରସଙ୍ଗରେ ପ୍ରଧାନମନ୍ତ୍ରୀ ମୋଦୀ ଦେଶ ସହ ନିଜର ମତ ବାଣ୍ଟିବେ, ଏପର୍ଯ୍ୟନ୍ତ କୌଣସି ସଠିକ ସୂଚନା ପ୍ରକାଶ ପାଇନାହିଁ । ତେବେ ପ୍ରଧାନ ମନ୍ତ୍ରୀ କରୋନା ଭାଇରସ ଓ ଟୀକାକରଣ ନେଇ ବାର୍ତା ରଖିପାରନ୍ତି ବୋଲି ଆଶଙ୍କା କରାଯାଉଛି । କରୋନା ସଙ୍କଟ ସମୟରେ ଦୁର୍ବଳ ଅର୍ଥନୀତିକୁ ଧ୍ୟାନରେ ରଖି ପିଏମ ମୋଦୀ ଏକ ବଡ ଘୋଷଣା କରିପାରନ୍ତି । ଏହା ବ୍ୟତୀତ ପିଏମ ମୋଦୀ ଅନଲକ୍ 2.0 ବିଷୟରେ ମଧ୍ୟ ଆଲୋଚନା କରିପାରନ୍ତି ।
Prime Minister Shri @narendramodi will address the nation at 5 PM today, 7th June.
— PMO India (@PMOIndia) June 7, 2021
ସୂଚନାଯୋଗ୍ୟ , ଗତ ୨୪ ଘଣ୍ଟା ମଧ୍ୟରେ ଦେଶରେ କରୋନାମହାମାରୀ ସଂକ୍ରମଣ ସଂଖ୍ୟା ୧ ଲକ୍ଷରୁ ସାମାନ୍ୟ ଅଧିକ ଥିବା ବେଳେ ମୃତ୍ୟୁସଂଖ୍ୟା ଅଢ଼େଇ ହଜାର ତଳକୁ ରହିଛି। ଗତ ୨ ମାସ ମଧ୍ୟରେ ଆଜି ସର୍ବନିମ୍ନ ଦୈନିକ ସଂକ୍ରମଣ ରିପୋର୍ଟ ହୋଇଛି। କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟ ତଥ୍ୟ ଅନୁସାରେ, ସମଗ୍ର ଦେଶରେ ୨୪ ଘଣ୍ଟା ମଧ୍ୟରେ ୧,୦୦,୬୩୬ କରୋନାଭାଇରସ୍ଜନିତ ନୂତନ ସଂକ୍ରମଣ ଓ ୨,୪୨୭ ମୃତ୍ୟୁ ରେକର୍ଡ କରାଯାଇଛି। ଏହି ତଥ୍ୟକୁ ମିଶାଇ ଭାରତରେ ସମୁଦାୟ କୋଭିଡ୍ ସଂକ୍ରମଣ ମାମଲା ୨,୮୯,୦୯,୯୭୫ ଓ ମୃତ୍ୟୁସଂଖ୍ୟା ୩,୪୯,୧୮୬ରେ ପହଞ୍ଚିଛି।
ସେହିଭଳି, ଗତ ୨୪ ଘଣ୍ଟା ମଧ୍ୟରେ ୧,୭୪,୩୯୯ ଆକ୍ରାନ୍ତ ସୁସ୍ଥ ହୋଇ ଫେରିବା ସହ ସମୁଦାୟ ସୁସ୍ଥତା ସଂଖ୍ୟା ୨,୭୧,୫୯,୧୮୦ରେ ପହଞ୍ଚିଛି। ଏବେ ଦେଶରେ ସମୁଦାୟ ସକ୍ରିୟ ଆକ୍ରାନ୍ତଙ୍କ ସଂଖ୍ୟା ହେଉଛି ୧୪,୦୧,୬୦୯। କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟ ତଥ୍ୟ ଅନୁସାରେ, ଗତକାଲି ସନ୍ଧ୍ୟା ୬ଟା ସୁଦ୍ଧା ସମୁଦାୟ ୨୩,୨୭,୮୬,୪୮୨ଜଣ ହିତାଧିକାରୀଙ୍କୁ ଟିକା ଦିଆଯାଇଛି। ‘ଆଇସିଏମ୍ଆର୍’ କହିବା ଅନୁସାରେ, ଏହି ଭୂତାଣୁଜନିତ ରୋଗ ଚିହ୍ନଟ ପାଇଁ ଜୁନ୍ ୬ ତାରିଖ ସୁଦ୍ଧା ସମୁଦାୟ ୩୬,୬୩,୩୪,୧୧୧ ନମୁନା ପରୀକ୍ଷା ସରିଛି। ଗତକାଲି ପରୀକ୍ଷା ହୋଇଛି ୧୫,୮୭,୫୮୯ଟି ନମୁନା।