ବର ବିବାହରେ ମାଗିଲା କ୍ରେଟା କାର, କନ୍ୟା ବାହାଘର ବନ୍ଦ କରି ଥାନାରେ ଦେଲା ଏତଲା….

.ନୂଆଦିଲ୍ଲୀ: ବାହାଘର ଚୂଡାନ୍ତ ହୋଇ ସାରିଥିଲା । ସେଥିପାଇଁ ବର ଏବଂ କନ୍ୟା ପକ୍ଷଙ୍କ ତରଫରୁ ପ୍ରସ୍ତୁତି ଜୋରସୋରରେ ଚାଲିଥିଲା । ତେବେ ଅଚାନକ ବର ଘର ପକ୍ଷରୁ ଯୌତୁକ ଦାବି ବଢିବାରେ ଲାଗିଲା । ବର ପକ୍ଷ ଯୌତୁକରେ କ୍ରେଟା କାର ଦାବି କରିଥିଲେ । ଏହାକୁ ପ୍ରତିବାଦ କରି କନ୍ୟା ଘର ପକ୍ଷ ଥାନାରେ ଅଭିଯୋଗ କରିଛନ୍ତି । ଏହି ଘଟଣା ପଞ୍ଜାବର କରନାଲର । ଯୁବତୀଙ୍କ ପରିବାର ଲୋକେ କୁଞ୍ଜପୁରା ଥାନାରେ ଅଭିଯୋଗ କରିବା ସହ ବିବାହ ବନ୍ଦ କରି ଦେଇଛନ୍ତି । ଥାନାରେ ଅଭିଯୋଗ କରିଛନ୍ତି ଯେ, ବର ଘର ପକ୍ଷରୁ ଯୌତୁକର ତାଲିକା ବଢିବାରେ ଲାଗିଥିଲା । ଅଭିଯୋଗ ମଧ୍ୟ ହୋଇଛି ଯେ, ସେମାନେ ହ୍ୟୁଣ୍ଡାଇ କ୍ରେଟା ବ୍ୟତୀତ ସୁନା ଏବଂ ଅନ୍ୟ ସାମଗ୍ରୀ ଦାବି କରୁଛନ୍ତି । କଲବେହାରୀ ଗାଁ ନିବାସୀ କନ୍ୟାଙ୍କ ପିତା ଅଭିଯୋଗ କରିଛନ୍ତି, ତାଙ୍କ ଝିଅଙ୍କ ବିବାହ ପ୍ରାୟ ଛଅ ମାସ ପୂର୍ବେ ସୋନିପତ ଜିଲ୍ଲାର ଦତୌଲି ଗାଁର ସାଲିନ୍ଦରଙ୍କ ସହ ସ୍ଥିର ହୋଇଥିଲା । ବର ବିଦ୍ୟୁତ୍ ବିଭାଗରେ କିରାଣୀ ଅଛନ୍ତି । କୌଣସି ଯୌତୁକ ଦରକାର ନାହିଁ ବୋଲି ସେମାନେ ପ୍ରଥମେ ପ୍ରତିଶ୍ରୁତି ଦେଇଥିଲେ । ବିବାହ ଫେବୃଆରୀ ୧୧ରେ ନିର୍ଦ୍ଧାରିତ ହୋଇଥିଲା । ମାତ୍ର ଜାନୁଆରୀ ୨୪ରେ ବର ଘର ପକ୍ଷ ଏସୟୁଭି କାର, ବାଇକ୍ ଏବଂ ଉଚ୍ଚ ଗୁଣବତ୍ତାର ଫର୍ଣ୍ଣିଚର ସାମଗ୍ରୀ ଦାବି କରିଥିଲେ । ପୋଲିସ କହିଛି ଯେ, ଅଭିଯୋଗକ୍ରମେ ବର ସାଲିନ୍ଦର ଏବଂ ତାଙ୍କ ପରିବାରର ଛଅ ସଦସ୍ୟଙ୍କ ବିରୋଧରେ ଯୌତୁକ ନିଷେଧ ଅଧିନିୟମର ଧାରା ୩ ଏବଂ ୪ ଆଧାରରେ ମାମଲା ରୁଜୁ କରାଯାଇଛି । ତଦନ୍ତ ଜାରି ରହିଛି ଏବଂ ଏହା ପରେ ଉଚିତ୍ କାର୍ଯ୍ୟାନୁଷ୍ଠାନ ନିଆଯିବ ।