ନୂଆଦିଲ୍ଲୀ: ରାଜ୍ୟଗୋଷ୍ଠୀ କ୍ରୀଡାରେ କ୍ରିକେଟର ପ୍ରତ୍ୟାବର୍ତ୍ତନ ପରେ କ୍ରିକେଟକୁ ଅଲିମ୍ପିକରେ ଅନ୍ତର୍ଭୁକ୍ତ କରାଯିବା ନେଇ ଚର୍ଚ୍ଚା ଜୋର ଧରିଛି। ଅନ୍ତର୍ଜାତୀୟ ଅଲିମ୍ପିକ କମିଟି କ୍ରିକେଟ୍ ସହିତ ଆଠ ଅନ୍ୟ କ୍ରୀଡାକୁ ଅଲିମ୍ପିକର ୨୦୨୮ ସଂସ୍କରଣରେ ସାମିଲ୍ କରାଯିବା ଉପରେ ସମୀକ୍ଷା କରିବ। ୨୦୨୮ ଅଲିମ୍ପିକ ଲସ ଏଞ୍ଜେଲ୍ସ ଆୟୋଜିତ ହେବ। ୨୦୨୮ ଲସ ଏଞ୍ଜେଲ୍ସ ଅଲିମ୍ପିକ କମିଟିର ଆୟୋଜନ କମିଟି ଆଇସିସିକୁ ନିଜର ପକ୍ଷ ରଖିବାକୁ କହିଛି। କ୍ରିକେଟକୁ ଅଲିମ୍ପିକରେ ସାମିଲ୍ କରାଯିବା ନେଇ ଚୂଡାନ୍ତ ନିର୍ଣ୍ଣୟ ୨୦୨୩ରେ ନିଆଯିବ। ଆଇସିସି ଏବଂ ଇଂଲଣ୍ଡ କ୍ରିକେଟ୍ ବୋର୍ଡର ଉଦ୍ୟମରୁ ୨୦୨୨ ରାଜ୍ୟଗୋଷ୍ଠୀ କ୍ରୀଡାରେ କ୍ରିକେଟକୁ ସାମିଲ୍ କରାଯାଇଛି।