ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦିଲ୍ଲୀରେ ଚାଲିଥିବା ‘ହୁନର ହାଟ’କୁ ବୁଧବାର ଅପରାହ୍ନରେ ଅଚାନକ ପହଞ୍ଚିଥିଲେ । ହୁନର ହାଟରେ ମୋଦୀ ବ୍ୟବସାୟୀ ଏବଂ ଶିଳ୍ପକାରଙ୍କ ସହ କଥା ହେବା ସହ ମଧ୍ୟାହ୍ନ ଭୋଜନରେ ଲିଟ୍ଟି ଚୋଖା ଖାଇଥିଲେ ଏବଂ ମାଟି କପରେ ଚା’ ପିଇଥିଲେ । କେନ୍ଦ୍ର କ୍ୟାବିନେଟ୍ ବୈଠକର ଅଧ୍ୟକ୍ଷତା କରିବା ପରେ ପ୍ରଧାନମନ୍ତ୍ରୀ ଆଜି ସିଧାସଳଖ ଯାଇ ‘ହୁନର ହାଟ’ରେ ପହଞ୍ଚି ଯାଇଥିଲେ । ମୋଦୀଙ୍କ ଗସ୍ତକୁ ନେଇ ଅନ୍ୟ ଅଧିକାରୀମାନେ ଆଶ୍ଚର୍ଯ୍ୟ ହୋଇଥିଲେ । ସଂଖ୍ୟାଲଘୁ ବ୍ୟାପାର ମନ୍ତ୍ରାଳୟ ଦ୍ବାରା ଆୟୋଜିତ ଏହି ହୁନର ହାଟରେ ମୋଦୀ ପ୍ରାୟ ୫୦ ମିନିଟ୍ ଅତିବାହିତ କରିଥିଲେ । ପୂର୍ବ ଉତ୍ତରପ୍ରଦେଶ, ବିହାର ଏବଂ ଝାଡ଼ଖଣ୍ଡରେ ଲୋକପ୍ରିୟ ଖାଦ୍ୟ ଲିଟ୍ଟି ଚୋଖା ଖାଇବା ପାଇଁ ମୋଦୀ ୧୨୦ ଟଙ୍କା ଦେଇଥିଲେ । ମୋଦୀ ସଂଖ୍ୟାଲଘୁ ବ୍ୟାପାର ମନ୍ତ୍ରୀ ମୁଖତାର ଅବ୍ବାସ ନକଭୀଙ୍କ ସହ ଚା’ ପିଇଥିଲେ ଏବଂ ୨ କପ୍ ଚା’ ପାଇଁ ୪୦ ଟଙ୍କା ଦେଇଥିଲେ । ହୁନର ହାଟ କାର୍ଯ୍ୟକ୍ରମରେ ସାମିଲ ହୋଇଥିବା ଶିଳ୍ପୀମାନେ କହିଛନ୍ତି, ପାରମ୍ପରିକ କାରୁକାର୍ଯ୍ୟ ଧୀରେଧୀରେ ଲୋପ ପାଉଥିବା ବେଳେ ‘ହୁନର ହାଟ’ କାର୍ଯ୍ୟକ୍ରମ ଏହାକୁ ଜୀବିତ ରଖିବାରେ ସହାୟକ ହେଉଛି । ଆସନ୍ତା ୨୩ ତାରିଖ ପର୍ଯ୍ୟନ୍ତ ଏହି ହୁନର ହାଟ କାର୍ଯ୍ୟକ୍ରମ ଚାଲିବ । ଏଥିରେ ମୋଦି ବିହାରର ଲୋକପ୍ରିୟ ଖାଦ୍ୟ ଲିଟ୍ଟି-ଚୋଖା ଖାଇବା ସହ ସ୍ୱାଦିଷ୍ଟ ମଧ୍ୟାହ୍ନ ଭୋଜନ ସମ୍ପର୍କରେ ତାଙ୍କ ଟ୍ୱିଟ୍ ହ୍ୟାଣ୍ଡଲରେ ମଧ୍ୟ ସେୟାର କରିଛନ୍ତି ।
ଏଥିରେ ମୋଦି ମଧ୍ୟାହ୍ନ ଭୋଜନ ଲାଗି ଚା ସହ ସ୍ୱାଦିଷ୍ଟ ଲିଟ୍ଟି-ଚୋଖାବି ଖାଇବାକୁ ମିଳିଲା ବୋଲି ଉଲ୍ଲେଖ କରିଛନ୍ତି । ଏହା ସହ ହୁନର ହାଟରେ ପ୍ରଦର୍ଶିତ ହେଉଥିବା ବିଭିନ୍ନ ଷ୍ଟଲ ସମ୍ପର୍କରେ ବି ଉଲ୍ଲେଖ କରିଛନ୍ତି । ଯେଉଁଥିରେ ହସ୍ତଶିଳ୍ପଠୁ ଆରମ୍ଭ କରି ଟେକ୍ସଟାଇଲ ଓ ଅନେକ ସାମଗ୍ରୀ ପ୍ରଦର୍ଶିତ ହେଉଥିବା ଉଲ୍ଲେଖ କରିବା ସହ ଏଠାକାର ଷ୍ଟଲରେ ମିଳୁଥିବା ମଜାଦାର ଖାଦ୍ୟର ବି ବର୍ଣ୍ଣନା କରିଛନ୍ତି । ଯାହାର ଲିଟ୍ଟି-ଚୋଖା ଏକ ଉଦାହରଣ ।
ପ୍ରଧାନମନ୍ତ୍ରୀ ମୋଦୀ ପେଣ୍ଟିଂ ପ୍ରସ୍ତୁତ କରୁଥିବା ଦିବ୍ୟାଙ୍ଗ ମହିଳାଙ୍କ ଭିଡିଓ ନିଜେ ସେୟାର କରିଥିଲେ । ଏଥିରେ ମହିଳା ମୋଦୀଙ୍କୁ କହୁଛନ୍ତି, ସେ ପେଣ୍ଟିଂ କରୁଛନ୍ତି । ମହିଳା ମୋଦୀଙ୍କୁ କହିଛନ୍ତି କି ସେ କୌଣସି ତାଲିମ ନେଇ ନାହାନ୍ତି । ଏହି କଥା ଶୁଣି ମୋଦୀ ଆଶ୍ଚର୍ଯ୍ୟ ହୋଇଯାଇଛନ୍ତି । ମହିଳା ଜଣକ କହିଛନ୍ତି କି, ଆରମ୍ଭରୁ ସେ ଦିଲ୍ଲୀ ହାଟ ବାହାରେ ଫୁଟପାଥରେ ପେଟିଂ ବିକ୍ରି କରୁଥିଲେ । ସେହି ସମୟରେ ଗୋଟିଏ ପେଣ୍ଟିଂର ମୂଲ୍ୟ ୧୦୦ ଟଙ୍କା ଥିଲା । ଧୀରେ ଧୀରେ କାମ ଆଗକୁ ବଢ଼ିଲା ଏବଂ ପେଣ୍ଟିଂ ବିକ୍ରିକରି ସେ ଏବେ ଏକ ଘର କରିଛନ୍ତି ।
ଏକ ଦୋକାନ ପରିଚାଳନା କରୁଥିବା ବ୍ୟକ୍ତି ମଧ୍ୟ ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିଛନ୍ତି । ରହମାନ ନାମରେ ବରିଷ୍ଠ ବ୍ୟକ୍ତି କହିଛନ୍ତି କି ମୋଦୀଙ୍କୁ ଭେଟି ବହୁତ ଖୁସି ଅନୁଭବ କରୁଛି । ଜୀବନରେ ପ୍ରଥମ ଥର କୌଣସି ଜଣେ ପ୍ରଧାନମନ୍ତ୍ରୀଙ୍କ ସହ ହାତ ମିଶାଇଛି ।
‘ହୁନର ହାଟ’ ରେ ମଧ୍ୟାହ୍ନ ଭୋଜନରେ ଲିଟ୍ଟି ଚୋଖା ଏବଂ ମାଟି କପରେ ଚା’ ପିଇଲେ ମୋଦୀ
