ଭୁବନେଶ୍ୱର: ମୂଲ୍ୟବୋଧ ଆଧାରିତ “ବିକଶିତ ଓଡ଼ିଶା” ଗଠନ ପାଇଁ ସାମୂହିକ ପ୍ରୟାସ କରିବାକୁ ରାଜ୍ୟପାଳ ଡ . ହରି ବାବୁ କମ୍ଭମପାଟି ଆହ୍ୱାନ ଜଣାଇଛନ୍ତି l ଅପ୍ରେଲ ୧ ତାରିଖ ବୁଧବାର ଦିନ ଲୋକଭବନର ନୂତନ ଅଭିଷେକ ହଲ୍ ଠାରେ ଆୟୋଜିତ ଓଡିଶା ଦିବସ ପାଳନ ସମାରୋହରେ ଯୋଗଦେଇ ରାଜ୍ୟପାଳ ଏହି ଆହ୍ଵାନ ଜଣାଇଛନ୍ତି l ଏହି ସମାରୋହରେ ଉଦବୋଧନ ଦେଇ ରାଜ୍ୟପାଳ କହିଛନ୍ତି ଯେ, ପ୍ରକୃତ ବିକାଶ ଭୌତିକ ଭିତ୍ତିଭୂମି ଏବଂ ଆର୍ଥିକ ଅଭିବୃଦ୍ଧିଠାରୁ ଅଧିକ ଏବଂ ସମାଜରେ ସାଧୁତା, କରୁଣା, ଶୃଙ୍ଖଳା ଏବଂ ଦାୟିତ୍ୱବୋଧରେ ପ୍ରତିଫଳିତ ହେବା ଉଚିତ। ଓଡ଼ିଶା ଦିବସ ଅବସରରେ ରାଜ୍ୟପାଳ ରାଜ୍ୟବାସୀଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଇ ଏହି ଅବସରକୁ ଓଡ଼ିଶାର ସହଭାଗୀ ପରିଚୟ, ଏକତା ଏବଂ ସ୍ଥାୟୀ ଆତ୍ମାର ଉତ୍ସବ ଭାବରେ ବର୍ଣ୍ଣନା କରିଛନ୍ତି। ରାଜ୍ୟର ପ୍ରଥମ ମହିଳା ଡ .ଜୟଶ୍ରୀ କମ୍ଭମପାଟି ଏହି ଅବସରରେ ଉପସ୍ଥିତ ଥିଲେ।
ଓଡିଶାର ସମୃଦ୍ଧ ପ୍ରାକୃତିକ ଶୋଭା ସମ୍ପଦ ଉପରେ ଆଲୋକପାତ କରି ରାଜ୍ଯପାଳ କହିଛନ୍ତି ଯେ, ରାଜ୍ୟ ବିସ୍ତୀର୍ଣ୍ଣ ସ୍ପନ୍ଦନଶୀଳ ଉପକୂଳ, ଘନ ଜଙ୍ଗଲ, ନଦୀ ଏବଂ ଉର୍ବର ସମତଳ ଭୂମିର ଏକ ଅନନ୍ୟ ସଙ୍ଗମକୁ ପ୍ରତିନିଧିତ୍ୱ କରେ – ଯାହା ପ୍ରକୃତି ଏବଂ ମାନବ ଜୀବନ ମଧ୍ୟରେ ଏକ ସୁସଜ୍ଜିତ ସହାବସ୍ଥାନର ପ୍ରତୀକ। ଓଡ଼ିଶାର ଐତିହାସିକ ଯାତ୍ରାକୁ ସ୍ମରଣ କରି ରାଜ୍ୟପାଳ ଉଲ୍ଲେଖ କରିଛନ୍ତି ଯେ , ୧୯୩୬ ମସିହା ଏପ୍ରିଲ ୧ ତାରିଖରେ ସ୍ୱତନ୍ତ୍ର ରାଜ୍ୟ ଗଠନ ଏକ ଦୀର୍ଘ ଏବଂ ଦୃଢ଼ ସଂଘର୍ଷର ପରିଣାମ ଥିଲା। ରାଜ୍ଯପାଳ କହିଛନ୍ତି ଯେ, ଏହାର ମହାନ ନେତୃବୃନ୍ଦ ଭାରତର ସ୍ୱାଧୀନତା ପାଇଁ ଆନ୍ଦୋଳନ କରିବା ସହିତ ବିଭିନ୍ନ ପ୍ରଦେଶର ଶାସନ ଅଧୀନରେ ଥିବା ଓଡ଼ିଆ ଭାଷାଭାଷୀ ଅଞ୍ଚଳଗୁଡ଼ିକର ଏକୀକରଣ ପାଇଁ ମଧ୍ୟ ଲଢ଼ିଥିଲେ। ଉତ୍କଳ ଗୌରବ ମଧୁସୂଦନ ଦାସ, ଉତ୍କଳମଣି ଗୋପବନ୍ଧୁ ଦାସ, କୃଷ୍ଣ ଚନ୍ଦ୍ର ଗଜପତି, ନୀଳକଣ୍ଠ ଦାସ, ଗୌରୀଶଙ୍କର ରାୟ, ରାମଚନ୍ଦ୍ର ମର୍ଦ୍ଦରାଜ ଦେଓ , ଫକୀର ମୋହନ ସେନାପତିଙ୍କ ଭଳି ବିଶିଷ୍ଟ ବ୍ୟକ୍ତିମାନେ ଯେଉଁ ମାନେ ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ଭାବେ ଗଠନ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ, ସେମାନଙ୍କ ଉଦ୍ଦେଶ୍ୟରେ ରାଜ୍ଯପାଳ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ରାଜ୍ୟପାଳ ଓଡ଼ିଶାର ସମୃଦ୍ଧ ଆଧ୍ୟାତ୍ମିକ ଏବଂ ସାଂସ୍କୃତିକ ଐତିହ୍ୟ ଉପରେ ମଧ୍ୟ ଆଲୋକପାତ କରି ଉଲ୍ଲେଖ କରିଥିଲେ ଯେ , ମହାପ୍ରଭୁ ଜଗନ୍ନାଥଙ୍କ ପରମ୍ପରା ଅନ୍ତର୍ଭୁକ୍ତି, ସମାନତା ଏବଂ ବିଶ୍ୱ ଭ୍ରାତୃତ୍ୱକୁ ପ୍ରତିପାଦିତ କରିଥାଏ।
ସ୍ଵାଧୀନତା ପରଠାରୁ ରାଜ୍ୟର ସେବା କରି ଭିତ୍ତିଭୂମି ଏବଂ ଅନୁଷ୍ଠାନଗୁଡ଼ିକୁ ସୁଦୃଢ଼ କରିବାରେ ସମସ୍ତ ସରକାରଙ୍କ ଅବଦାନକୁ ରାଜ୍ଯପାଳ ପ୍ରଶଂସା କରିଥିଲେ ଏବଂ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦିଙ୍କ ମାର୍ଗଦର୍ଶନରେ ରାଜ୍ୟକୁ ପ୍ରଗତିଶୀଳ ପଥରେ ଆଗେଇ ନେଉଥିବା ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀଙ୍କ ନେତୃତ୍ୱରେ ବର୍ତ୍ତମାନର ସରକାରଙ୍କୁ ପ୍ରଶଂସା କରିଥିଲେ। ନାଗରିକମାନଙ୍କୁ ସୁଲଭ ସ୍ୱାସ୍ଥ୍ୟସେବା, ଗୁଣାତ୍ମକ ଶିକ୍ଷା ଏବଂ ସ୍ୱଚ୍ଛ ଶାସନ ସହିତ ଏକ ଅପରାଧମୁକ୍ତ, ନିଶାମୁକ୍ତ ଏବଂ ଅନ୍ଧବିଶ୍ୱାସମୁକ୍ତ ଓଡ଼ିଶା ଗଠନ ପାଇଁ ମିଳିମିଶି କାର୍ଯ୍ୟ କରିବାକୁ ରାଜ୍ଯପାଳ ଆହ୍ଵାନ ଜଣାଇଥିଲେ। ଓଡ଼ିଆ ଭାଷା, ସଂସ୍କୃତି ଏବଂ ମୂଲ୍ୟବୋଧକୁ ସଂରକ୍ଷଣ କରି ନବସୃଜନ ସହିତ ନେତୃତ୍ୱ ନେବାକୁ ଏବଂ ରାଜ୍ୟ ପାଇଁ ଏକ ସମାବେଶୀ ,ସୁରକ୍ଷିତ ଏବଂ ସମୃଦ୍ଧ ଭବିଷ୍ୟତ ଗଠନ କରିବାରେ ଯୋଗଦାନ ଦେବାକୁ ରାଜ୍ଯପାଳ ଯୁବପିଢୀଙ୍କୁ ଆହ୍ଵାନ ଜଣାଇଥିଲେ। ଅନ୍ୟମାନଙ୍କ ମଧ୍ୟରେ, ଭାରତ ସରକାରଙ୍କ ଶିକ୍ଷା ମନ୍ତ୍ରଣାଳୟ ଅଧୀନସ୍ତ ସେଣ୍ଟର ଫର୍ ଏକ୍ସସେଳେନ୍ସ ଫର୍ ଷ୍ଟଦିଜ୍ ଇନ୍ କ୍ଲାସିକାଲ ଓଡ଼ିଆର ପୂର୍ବତନ ପ୍ରକଳ୍ପ ନିର୍ଦ୍ଦେଶକ ପ୍ରଫେସର୍ ବସନ୍ତ କୁମାର ପଣ୍ଡା, ଜିଓଲୋଜିକାଲ ସର୍ଭେ ଅଫ ଇଣ୍ଡିଆର ରାଜ୍ୟ ୟୁନିଟ୍ ର ନିର୍ଦ୍ଦେଶକ ଡକ୍ଟର ଅସିତ କୁମାର ସ୍ୱାଇଁ ଏବଂ ଜନଗଣନା ନିର୍ଦ୍ଦେଶାଳୟ, ଭୁବନେଶ୍ୱରର ସହକାରୀ ନିର୍ଦ୍ଦେଶକ ଶ୍ରୀ ଲକ୍ଷ୍ମଣ ମୁଖୀ ମଧ୍ୟ ବକ୍ତବ୍ୟ ପ୍ରଦାନ କରିଥିଲେ। ରାଜ୍ୟପାଳଙ୍କ ପିଆରଓ ଐଶ୍ୱର୍ଯ୍ୟା ସାମନ୍ତ ସ୍ୱାଗତ ଭାଷଣ ପ୍ରଦାନ କରିଥିଲେ। କାର୍ଯ୍ୟକ୍ରମରେ ଓଡ଼ିଶାର ସମୃଦ୍ଧ କଳାତ୍ମକ ଐତିହ୍ୟକୁ ପ୍ରତିଫଳିତ କରୁଥିବା ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ପରିବେଷିତ ହୋଇଥିଲା।
