ଭୁବନେଶ୍ୱର: ଆଜି କଂଗ୍ରେସ ଭବନଠାରେ ଭାରତର ଆସନ୍ନ ଘୋର ଅର୍ଥନୈତିକ ସଙ୍କଟକୁ ନେଇ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଥିଲା ସମ୍ମିଳନୀରେ ଯୋଗଦେଇ ଏଆଇସିସି ମୁଖପାତ୍ର ଡ଼ ହମିଦ ହୁସେନ ନିଜ ବକ୍ତବ୍ୟ ଉପସ୍ଥାପନ କରିଛନ୍ତି, ସେ କହିଛନ୍ତି, ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ଆର୍ଥିକ, କୃଷି ଏବଂ ଅର୍ଥନୈତିକ ସଙ୍କଟ ସମ୍ପର୍କିତ ବିବୃତିକୁ ବୈଦେଶିକ ବ୍ୟାପାର ମନ୍ତ୍ରୀ ଏସ୍. ଜୟଶଙ୍କରଙ୍କ ଦ୍ୱାରା ଦୋହରାଯିବା ପ୍ରସଙ୍ଗରେ ସେ ଗୁରୁତ୍ୱାରୋପ କରିଛନ୍ତି। ମୋଦୀ ସରକାରଙ୍କ ତ୍ରୁଟିପୂର୍ଣ୍ଣ ନୀତି ଯୋଗୁଁ ସାରା ଦେଶରେ ଅର୍ଥନୈତିକ ବାତ୍ୟା କିମ୍ବା ସୁନାମି ଆସିବାର ସମ୍ଭାବନା ରହିଛି ବୋଲି ରାହୁଲ ଗାନ୍ଧୀ ପୂର୍ବରୁ ଚେତାବନୀ ଦେଇଥିଲେ। ଏହି ସମାନ ପ୍ରସଙ୍ଗକୁ ଶ୍ରୀ ଏସ୍. ଜୟଶଙ୍କର ଜାତିସଂଘ ସାଧାରଣ ସଭାର ୮୧ତମ ଅଧିବେଶନରେ ନିଜ ସମ୍ବୋଧନରେ ଦୋହରାଇଛନ୍ତି। ସେ କହିଛନ୍ତି ଯେ ବିଶ୍ୱର ବିକାଶଶୀଳ ଦେଶଗୁଡ଼ିକ (ଗ୍ଲୋବାଲ ସାଉଥ୍) ସହିତ ଭାରତରେ ମଧ୍ୟ ଚାରୋଟି ‘F’ ଯଥା— ଖାଦ୍ୟ (Food), ଜାଳେଣି (Fuel), ଆର୍ଥିକ (Finance) ଏବଂ ସାର (Fertilizers) ର ସଙ୍କଟ ଦେଖାଦେବ।
ଡକ୍ଟର ହୁସେନ, ଡକ୍ଟର ଦୀପକ ଯାଦବଙ୍କ ପୁସ୍ତକ “ରାହୁଲ ଗାନ୍ଧୀଜ୍ ଇଣ୍ଡିଆ” (Rahul Gandhi’s India) ରୁ ଉଦ୍ଧୃତ କରି କହିଛନ୍ତି ଯେ, ସରକାରଙ୍କ ବଡ଼ ଶିଳ୍ପପତି-ପ୍ରୀତି ଏବଂ ଗରିବ ତଥା କ୍ଷୁଦ୍ର ବ୍ୟବସାୟୀ ବିରୋଧୀ ନୀତି ଯୋଗୁଁ ରାହୁଲ ଗାନ୍ଧୀ ଏହି ସଙ୍କଟ ବିଷୟରେ ବହୁ ପୂର୍ବରୁ ସତର୍କ କରାଇ ଦେଇଥିଲେ। ସବସିଡି ପ୍ରତ୍ୟାହାର, ସ୍ଥିର ସର୍ବନିମ୍ନ ସହାୟକ ମୂଲ୍ୟ (MSP) ନୀତିର ଅଭାବ, କୋଲ୍ଡ ଷ୍ଟୋରେଜ୍ ଏବଂ କୃଷି ପ୍ରକ୍ରିୟାକରଣ ୟୁନିଟ୍ର ଅଭାବ ଏବଂ ସାରର ମୂଲ୍ୟ ବୃଦ୍ଧି ତଥା ଅନୁପଲବ୍ଧତା ଚାଷୀମାନଙ୍କ ପାଇଁ ବଡ଼ ବିପର୍ଯ୍ୟୟ ସୃଷ୍ଟି କରିଛି। ପ୍ରତିବର୍ଷ ଆସାମ, ବିହାର, ଉତ୍ତର ପ୍ରଦେଶ, ଓଡ଼ିଶା ଏବଂ ପଶ୍ଚିମବଙ୍ଗରେ ବନ୍ୟା ଯୋଗୁଁ ଚାରି କୋଟି ହେକ୍ଟର ଜମିର ଫସଲ ନଷ୍ଟ ହେଉଛି। ମାତ୍ର ସରକାରଙ୍କ ପାଖରେ ଏଥିପାଇଁ କୌଣସି ବିଧିବଦ୍ଧ ଯୋଜନା ନାହିଁ। ବନ୍ୟା ଜଳ ନିୟନ୍ତ୍ରଣ ପାଇଁ କୌଣସି ନୂତନ ହ୍ରଦ, ଜଳାଶୟ, ବନ୍ଧ, ବାରେଜ୍ କିମ୍ବା ନଦୀବନ୍ଧ ନିର୍ମାଣ କରାଯାଇ ନାହିଁ।
ଏହା ବ୍ୟତୀତ, କ୍ରମାଗତ ମୂଲ୍ୟବୃଦ୍ଧି, ଟଙ୍କାର ଅବମୂଲ୍ୟାୟନ, ବେକାରୀ ସମସ୍ୟା ଏବଂ ଜିଏସଟି (GST) ର ତ୍ରୁଟିପୂର୍ଣ୍ଣ ପ୍ରଗତିଶୀଳ ନୀତି ଯୋଗୁଁ ଗରିବ ଓ ମଧ୍ୟବିତ୍ତ ଶ୍ରେଣୀର ଲୋକଙ୍କ ଉପରେ ଅତ୍ୟାବଶ୍ୟକ ସାମଗ୍ରୀର ଟ୍ୟାକ୍ସ ବୋଝ ବଢ଼ିବାରେ ଲାଗିଛି। ସରକାର ବଡ଼ ବଡ଼ କର୍ପୋରେଟ୍ ହାଉସ୍ଗୁଡ଼ିକର ଟ୍ୟାକ୍ସ ଛାଡ଼ କରୁଥିବା ବେଳେ ୟୁପିଏ (UPA) ସରକାରଙ୍କ ଭଳି ଚାଷୀଙ୍କ ଋଣ ଛାଡ଼ କରୁନାହାନ୍ତି। ଚଳିତ ବର୍ଷ ଦେଶରୁ ପ୍ରାୟ ଦୁଇ ଲକ୍ଷ କୋଟି ଟଙ୍କାର ପୁଞ୍ଜି ବାହାରକୁ ଚାଲିଯାଇଛି ଏବଂ ଲକ୍ଷ ଲକ୍ଷ ବଡ଼ ବ୍ୟବସାୟୀ ଅର୍ଥନୈତିକ ଅଭିବୃଦ୍ଧି ଓ ସୁରକ୍ଷା ପାଇଁ ଦେଶ ଛାଡ଼ି ପଳାୟନ କରୁଛନ୍ତି।
କୋଟି କୋଟି ଲୋକ ଜୀବିକା ହରାଇଛନ୍ତି। ଦେଶର ଆର୍ଥିକ ସ୍ଥିତି ଏଥିରୁ ସ୍ପଷ୍ଟ ଜଣାପଡ଼େ ଯେ ଭାରତର ମୁଣ୍ଡପିଛା ଜିଡିପି (GDP) ମାନ୍ୟତା ୧୪୦, ବହୁମୁଖୀ ଦାରିଦ୍ର୍ୟ ସୂଚକାଙ୍କ (MPI) ୧୩୮ ଏବଂ ମାନବ ବିକାଶ ସୂଚକାଙ୍କ (HDI) ୧୩୨ ତଳକୁ ଖସିଆସିଛି। ଏପରିକି ବିଶ୍ୱର ଏକ ତୃତୀୟାଂଶ କ୍ଷୁଧାର୍ତ୍ତ ଲୋକ ଭାରତରେ ବାସ କରୁଛନ୍ତି ଏବଂ ଦେଶର ୧୫ ପ୍ରତିଶତ ଲୋକ ଅପୁଷ୍ଟିର ଶିକାର ହେଉଛନ୍ତି। ଜାଳେଣି ସଙ୍କଟ କେବଳ ବିଶ୍ୱ ଯୁଦ୍ଧ ଯୋଗୁଁ ହୋଇନାହିଁ, ବରଂ ଗତ ୧୨ ବର୍ଷ ମଧ୍ୟରେ ତୈଳ ଓ ଗ୍ୟାସ୍ ଅନୁସନ୍ଧାନ ପାଇଁ କୌଣସି ନୂତନ ପଦକ୍ଷେପ ନିଆଯାଇ ନାହିଁ। ଏଥିସହିତ ଇରାନ ଏବଂ ଋଷରୁ ତୈଳ ଆମଦାନୀ ହ୍ରାସ ପାଇବା କାରଣରୁ ମଧ୍ୟ ଏହି ସଙ୍କଟ ବୃଦ୍ଧି ପାଇଛି। ସେପ୍ଟେମ୍ବର ମାସରେ ଦେଶର ବୈଦେଶିକ ମୁଦ୍ରା ଭଣ୍ଡାର ପ୍ରତି ସପ୍ତାହରେ ପ୍ରାୟ ୧୪ ବିଲିୟନ ଡଲାର ହ୍ରାସ ପାଇଛି।
ଏଭଳି ପରିସ୍ଥିତି ଏବଂ ନୀତି ଜାରି ରହିଲେ, ଦେଶ ଚଳିତ ଶତାବ୍ଦୀ ସାରା ଏକ ଅନୁନ୍ନତ ଦେଶ ହୋଇ ରହିଯିବ। ତେଣୁ ବର୍ତ୍ତମାନ ଦେଶର ନୀତିଗୁଡ଼ିକରେ ବ୍ୟାପକ ସଂରଚନାତ୍ମକ ଏବଂ କାର୍ଯ୍ୟାତ୍ମକ ପରିବର୍ତ୍ତନର ଜରୁରୀ ଆବଶ୍ୟକତା ରହିଛି ବୋଲି ଶ୍ରୀ ହୁସେନ ପ୍ରକାଶ କରିଛନ୍ତି ।ସମ୍ମିଳନୀରେ ଉପସ୍ଥିତ କଂଗ୍ରେସ ନେତା ସିଦ୍ଧାର୍ଥ ରାଉତରାୟ ଓ କଂଗ୍ରେସ ମୁଖପାତ୍ର ଜୟଶ୍ରୀ ପାତ୍ର ନିଜ ମତ ପ୍ରକାଶକରି କହିଛନ୍ତି ଯେ, ଦେଶର ବିରୋଧୀ ଦଳର ନେତା ଶ୍ରୀ ରାହୁଲ ଗାନ୍ଧୀଜୀ ଦେଶରେ ଆର୍ଥିକ ସୁନାମୀ ଆସିବା କଥା କହିଆସୁଛନ୍ତି ଯାହା ବାସ୍ତବରେ ସତ ହେବାକୁ ଯାଉଛି। କିନ୍ତୁ ଏହି ଆର୍ଥିକ ସୁନାମୀ ଉପରେ ଦେଶର ପ୍ରଧାନମନ୍ତ୍ରୀ ଗୃହ ମନ୍ତ୍ରୀ କି କୌଣସି ମନ୍ତ୍ରୀ ଏ ବିଷୟରେ ମାଟି ରେ ପାଟି ଖୋଲୁ ନାହାନ୍ତି।
ବରଂ ସରକାରୀ ବିଦେଶ ମନ୍ତ୍ରୀ ଏସ୍. ଜୟଶଙ୍କର ବିଦେଶରେ ବସି ଭାଷଣ ଦେଉଛନ୍ତି ଯେ ‘ଗ୍ଲୋବାଲ ସାଉଥ୍’ ଏବଂ ଭାରତ ଉପରେ ‘4F Crisis’ (Food, Fuel, Fertiliser, Finance) ମାଡ଼ିଆସୁଛି! କିନ୍ତୁ ଏହା କୌଣସି ଅନ୍ତର୍ଜାତୀୟ ଦୁର୍ଘଟଣା ନୁହେଁ, ବରଂ ମୋଦୀ ସରକାରଙ୍କ ବିଗତ ୧୨ ବର୍ଷଗୁଡ଼ିକର ବିଫଳତାର ନିଜେ ସମସ୍ୟା ସୃଷ୍ଟି କରି ଏବେ ଅନ୍ୟ ଉପରେ ଦୋଷ ଲଦିବା କ’ଣ ସରକାରଙ୍କ ଚାଲ୍ ଅଭ୍ୟାସଗତ ରୋଗ??
ଖାଦ୍ୟ ସୁରକ୍ଷାକୁ ବଳି ପକେଇ ଇନ୍ଧନ ସୁରକ୍ଷା ଆଣିବା ଭେଳିକି ଦେଖାଇବା କି ପ୍ରକାରର ସୁଶାସନ??? ଇଥାନଲ୍ ମିଶ୍ରିତ ପେଟ୍ରୋଲ ପରେ ବି ପେଟ୍ରୋଲ ଦର ନ କମି ଚିନି, ଚାଉଳ ଓ ଅଣ୍ଡା ଦର ବୃଦ୍ଧି ପାଇଛି ତତସହିତ ବିଶ୍ୱ ବଜାରରେ କ୍ରୁଡ ଅଏଲ ଦର କମିଥିବା ବେଳେ ମଧ୍ୟ ପେଟ୍ରୋଲ ଦର କମି ଜନତାଙ୍କୁ ଫାଇଦା ଦିଆଯାଇ ନାହିଁ। ବରଂ କେନ୍ଦ୍ର ସରକାର ପେଟ୍ରୋଲ ଡିଜେଲ ରେ ସେସ୍ ଓ excise duty ବଢ଼ାଇ ପାଖାପାଖି ୩୨ ଲକ୍ଷ କୋଟି ଟଙ୍କା ରୁ ଉର୍ଦ୍ଧ୍ୱ ଆୟ କରିଛନ୍ତି।ଡଲାର ତୁଳନାରେ ଟଙ୍କା ଦୁର୍ବଳ ହୋଇ ସର୍ବନିମ୍ନ ସ୍ତରକୁ ଖସିଚାଲିଛି କି ପ୍ରକାରର ସୁଦୃଢ଼ ଅର୍ଥନୀତି ପ୍ରଶ୍ନ କରିବା ସହ ୨୦୧୪ ରେ ଭାରତ ସରକାରଙ୍କ ମୋଟ ଋଣ ଭାର ୫୫ ଲକ୍ଷ କୋଟି ଥିଲା ବେଳେ ଆଜି ତାହା ୨୦୦ ଲକ୍ଷ କୋଟିରୁ ଅଧିକରେ ପହଞ୍ଚିଛି ଏହା ସରକାରଙ୍କ ଚରମ ଅର୍ଥନୈତିକ ବିପର୍ଯୟ।
