ଭୁବନେଶ୍ୱର: ପୋଲିସ ଗୁଳିରେ କୁଖ୍ୟାତ ଅପରାଧୀ ହାଇଦର ମୃତ୍ୟୁ ଘଟଣାରେ ନିଜ ଆଡୁ ମାମଲା ରୁଜୁ କରିଛନ୍ତି ରାଜ୍ୟ ମାନବାଧିକାର କମିଶନ । ବିଭିନ୍ନ ଗଣମାଧ୍ୟମରେ ପ୍ରକାଶିତ ରିପୋର୍ଟ ଆଧାରରେ ମାମଲା ରୁଜୁ ହୋଇଛି । ମାମଲା ରୁଜୁ ସହିତ ନୋଟିସ ଜାରି କରିଛନ୍ତି ମାନବାଧିକାର କମିଶନ । ଗୃହ ବିଭାଗ ଏସିଏସ, ପୋଲିସ ଡିଜି, ଜେଲ ବିଭାଗ ଡିଜିଙ୍କୁ ନୋଟିସ ଜାରି କରାଯାଇଛି । ଟ୍ୱିନ ସିଟି ପୋଲିସ କମିଶନରଙ୍କୁ ମଧ୍ୟ ଓଏଚଆରସି ନୋଟିସ ଜାରି କରିଛନ୍ତି । ୪ ସପ୍ତାହ ମଧ୍ୟରେ ଜବାବ ଦାଖଲ ପାଇଁ ଓଏଚଆରସି ନିର୍ଦ୍ଦେଶ ଦେଇଛନ୍ତି ।
ସୂଚନାଯୋଗ୍ୟ , ପୋଲିସ ଏନକାଉଣ୍ଟରରେ ଗ୍ୟାଙ୍ଗଷ୍ଟାର ହାଇଦରର ମୃତ୍ୟୁ ହୋଇଛି । କୁଖ୍ୟାତ ଗ୍ୟାଙ୍ଗଷ୍ଟର ହାଇଦରକୁ ଏନକାଉଣ୍ଟର କରାଯାଇଥିଲା । ସିମୂଳିଆ ନିକଟରେ ଏନକାଉଣ୍ଟର ହୋଇଥିବା ସୂଚନା ମିଳିଥିଲା । ଏନକାଉଣ୍ଟର ନେଇ କଟକ ଡିସିପି ପ୍ରତୀକ ସିଂହ ସୂଚନା ଦେଇଛନ୍ତି । ଆଜି ହାଇଦରକୁ ଚୌଦ୍ୱାରରୁ ବାରିପଦା ଜେଲ ନିଆଯାଉଥିଲା । ହାଇଦରକୁ ଜଣେ ଇନ୍ସପେକ୍ଟର, ଜଣେ ଏସଆଇ, ଏକ ସେକ୍ସନ ଫୋର୍ସ ନେଉଥିଲେ । ଦିନ ୩ଟା ୨୦ରେ ପରିସ୍ରା ଯିବ ବୋଲି କହିଥିଲା ହାଇଦର । ପରିସ୍ରା ବାହାନାରେ ବାହାରିବା ପରେ ଖସିବାକୁ ଉଦ୍ୟମ କରିଥିଲା । ଗାର୍ଡଙ୍କ ବନ୍ଧୁକ ଛଡାଇ ଖସିଯିବାକୁ ଉଦ୍ୟମ କରିଥିଲା ହାଇଦର । ତାଙ୍କୁ ୱାଣ୍ଣିଂ ଦିଆଯାଇଥିଲେ ବି ମାନିନଥିଲା ହାଇଦର । ଶେଷକୁ ବାଧ୍ୟହୋଇ ପୋଲିସ ଗୁଳି କରିଥିଲା ବୋଲି ଡିସିପି କହିଛନ୍ତି । ତେବେ ହାଇଦର ପେଟରେ ଗୁଳି ବାଜିଥିଲା । ତାକୁ ବାଲେଶ୍ୱର ନିଆଯାଇ ବାଲେଶ୍ୱର ଜିଲ୍ଲା ମେଡିକାଲରେ ହାଇଦରର ଚିକିତ୍ସାଧିନ ଅବସ୍ଥାରେ ତାର ମୃତ୍ୟୁ ହୋଇଥିବା ସୂଚନା ମିଳିଛି ।
