ଭୋଟର ତାଲିକାର ବିବାଦୀୟ ‘ସ୍ପେଶାଲ ଇଣ୍ଟେନସିଭ୍ ରିଭିଜନ’ (ଏସଆଇଆର)କୁ ସମର୍ଥନ କରି ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଦେଇଥିବା ବୟାନର ଦୃଢ଼ ଜବାବ ଦେଇଛନ୍ତି ଆଜି ଓଡ଼ିଶା ପ୍ରଦେଶ କଂଗ୍ରେସ କମିଟି (ଓପିସିସି) ସଭାପତି ଶ୍ରୀ ଭକ୍ତ ଚରଣ ଦାସ। କଂଗ୍ରେସ ନେତୃତ୍ବରେ ୧୨ ତାରିଖ ସୋମବାର ଦିଲ୍ଲୀରେ ହୋଇଥିବା ଇଣ୍ଡିଆ ମେଣ୍ଟର ବିକ୍ଷୋଭସ୍ଥଳରୁ ଏକ ପ୍ରେସ ବିବୃତିରେ ଓପିସିସି ସଭାପତି କହିଛନ୍ତି ଯେ, ବ୍ୟବସ୍ଥିତ ଢଙ୍ଗରେ ପ୍ରସ୍ତୁତ କରାଯାଇଥିବା ଭୋଟର ତାଲିକାର ଏହି ହେରଫେରକୁ ବୈଧ ବୋଲି ଦର୍ଶାଇବାକୁ ମୁଖ୍ୟମନ୍ତ୍ରୀଙ୍କ ପ୍ରୟାସ ଶାସକ ବିଜେପିର ଗଭୀର ଭୟ ଏବଂ ଗଣତାନ୍ତ୍ରିକ ଭାବେ ତିଷ୍ଠି ରହିବା ପାଇଁ ପ୍ରଶାସନିକ ଅପବ୍ୟବହାର ଉପରେ ସେମାନଙ୍କର ନିର୍ଭରଶୀଳତାକୁ ସ୍ପଷ୍ଟ କରୁଛି। ଆଜି ପୂର୍ବାହ୍ନରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ପ୍ରତିରକ୍ଷାତ୍ମକ ବକ୍ତବ୍ୟର କଡ଼ା ଜବାବ ଦେଇ ଓପିସିସି ସଭାପତି କଂଗ୍ରେସ ଦଳ ଏବଂ ସମଗ୍ର ‘ଇଣ୍ଡିଆ’ (INDIA) ମେଣ୍ଟ ପକ୍ଷରୁ ଏହାର ଖଣ୍ଡନ କରି କହିଛନ୍ତି:
‘ନିୟମିତ ପ୍ରଶାସନିକ ଶୁଦ୍ଧୀକରଣ’ ଦାବି ହାସ୍ୟାସ୍ପଦ; ଏହା ଏକ ଯୋଜନାବଦ୍ଧ ‘ଭୋଟ୍ ଚୋରି’
ମୁଖ୍ୟମନ୍ତ୍ରୀ ଦାବି କରିଛନ୍ତି ଯେ ଏସଆଇଆର ହେଉଛି ଭୋଟର ତାଲିକା ସଂଶୋଧନ ପାଇଁ ଏକ ନିୟମିତ ପ୍ରଶାସନିକ ପ୍ରକ୍ରିୟା। ଶ୍ରୀ ଭକ୍ତ ଚରଣ ଦାସ ଏହାକୁ ସମ୍ପୂର୍ଣ୍ଣ ପ୍ରତ୍ୟାଖ୍ୟାନ କରି କହିଛନ୍ତି: ‘‘ଲକ୍ଷ ଲକ୍ଷ ଯାଞ୍ଚ ହୋଇଥିବା ନାଗରିକଙ୍କୁ ଭୋଟର ତାଲିକାରୁ ବାଦ୍ ଦେଉଥିବା ଏଭଳି ଏକ ସ୍ୱତନ୍ତ୍ର ପ୍ରକ୍ରିୟାରେ ନିୟମିତ ଭଳି କିଛି ବି ନାହିଁ। ଏହା ଏକ ଯୋଜନାବଦ୍ଧ ‘ଭୋଟ୍ ଚୋରି’। ପାରମ୍ପରିକ ବିରୋଧୀ ଗଡ଼ଗୁଡ଼ିକୁ ସଫା କରିବା ଏବଂ ନକଲି ଭୋଟରଙ୍କ ଦ୍ୱାରା ତାଲିକା ଭର୍ତ୍ତି କରିବା ପାଇଁ ଏସଆଇଆରକୁ ଏକ ପ୍ରଶାସନିକ ଅସ୍ତ୍ର ଭାବେ ବ୍ୟବହାର କରାଯାଇଛି।”
ସିଇସି ଜ୍ଞାନେଶ କୁମାରଙ୍କ ସ୍ୱଚ୍ଛତାକୁ ନେଇ ମୁଖ୍ୟମନ୍ତ୍ରୀଙ୍କ ସଫେଇ ନିନ୍ଦନୀୟ:
ନିର୍ବାଚନ କମିଶନ ଏବଂ ମୁଖ୍ୟ ନିର୍ବାଚନ କମିଶନର (ସିଇସି) ଜ୍ଞାନେଶ କୁମାରଙ୍କୁ ମୁଖ୍ୟମନ୍ତ୍ରୀ ସମର୍ଥନ କରିବା ପ୍ରସଙ୍ଗରେ ଓପିସିସି ସଭାପତି ଆଜି ନୂଆଦିଲ୍ଲୀରେ ଲୋକସଭା ବିରୋଧୀ ଦଳ ନେତା ଶ୍ରୀ ରାହୁଲ ଗାନ୍ଧୀଙ୍କ ନେତୃତ୍ୱରେ ହୋଇଥିବା ଐତିହାସିକ ଜାତୀୟ ଆନ୍ଦୋଳନ ସମ୍ପର୍କରେ ଆଲୋକପାତ କରିଛନ୍ତି। “ଯେତେବେଳେ ଶ୍ରୀ ରାହୁଲ ଗାନ୍ଧୀ ଏବଂ ‘ଇଣ୍ଡିଆ’ ମେଣ୍ଟର ନେତୃତ୍ୱରେ ସମଗ୍ର ଦେଶ ସିଇସି ଜ୍ଞାନେଶ କୁମାରଙ୍କୁ ତୁରନ୍ତ ବହିଷ୍କାର ଓ ଗିରଫ ଦାବିରେ ସୁପ୍ରିମକୋର୍ଟ ଅଭିମୁଖେ ମାର୍ଚ୍ଚ କରୁଛି, ସେତେବେଳେ ମୁଖ୍ୟମନ୍ତ୍ରୀ ମାଝୀଙ୍କ ଦ୍ୱାରା ଏହି ସାଲିସପୂର୍ଣ୍ଣ ନିର୍ବାଚନ ପ୍ୟାନେଲକୁ ସମର୍ଥନ କରିବା ହାସ୍ୟାସ୍ପଦ ଅଟେ। ସିଇସି ଏକ ସାମ୍ବିଧାନିକ ଅନୁଷ୍ଠାନକୁ ଶାସକ ଦଳର ଏକ ଶାଖା ସଂସ୍ଥାରେ ପରିଣତ କରିଛନ୍ତି। ଆମେ ସାଂସ୍ଥାନିକ ଜାଲିଆତି ପାଇଁ ତାଙ୍କୁ ତୁରନ୍ତ ଗିରଫ କରିବାକୁ ଦାବି କରୁଛୁ।”
ନିର୍ବାଚନୀ ପ୍ରକ୍ରିୟାରେ ‘ସ୍ୱଚ୍ଛତା ଏବଂ ଡିଜିଟାଲ ସୁରକ୍ଷା’ ଥିବା କହିବା ହାସ୍ୟାସ୍ପଦ:
ମୁଖ୍ୟମନ୍ତ୍ରୀ ଦାବି କରିଛନ୍ତି ଯେ ସାମ୍ପ୍ରତିକ ନିର୍ବାଚନ ସଂଶୋଧନ ଏବଂ ଇଲେକ୍ଟ୍ରୋନିକ ଭୋଟିଂ ମେସିନ (ଇଭିଏମ)କୁ ପରିଚାଳନା କରୁଥିବା ଡିଜିଟାଲ ବ୍ୟବସ୍ଥା ସମ୍ପୂର୍ଣ୍ଣ ସ୍ୱଚ୍ଛ। ଶ୍ରୀ ଭକ୍ତ ଚରଣ ଦାସ ଏହାର ଜବାବରେ କହିଛନ୍ତି: “ଚୋର ମୁହଁ ଟାଣ ପରି କିଛି ଲୋକ ଡିଜିଟାଲ ସୁରକ୍ଷା କଥା କହୁଛନ୍ତି। ଏହା କିନ୍ତୁ ଏକ ସମ୍ପୂର୍ଣ୍ଣ ମନଗଢ଼ା କାହାଣୀ। ମନଇଚ୍ଛା ପରିଚାଳିତ ଇଭିଏମ୍ ଠାରୁ ଆରମ୍ଭ କରି ଏସଆଇଆର ମାଧ୍ୟମରେ ନିର୍ଦ୍ଦିଷ୍ଟ ବର୍ଗକୁ ଭୋଟର ତାଲିକାରୁ ନାମ କାଟିବା ପର୍ଯ୍ୟନ୍ତ ଚୋରି କାମରେ ସିଇସି ଲିପ୍ତ। ଜନସାଧାରଣଙ୍କ ପ୍ରକୃତ ଜନମତକୁ ଏଡ଼ାଇବା ପାଇଁ ପ୍ରଯୁକ୍ତିବିଦ୍ୟାର ଅପବ୍ୟବହାର କରାଯାଉଛି। ଯଦି ବିଜେପି ନିଜର ଶାସନ ଏବଂ ବ୍ୟବସ୍ଥାର ସ୍ୱଚ୍ଛତା ଉପରେ ଏତେ ଆତ୍ମବିଶ୍ୱାସୀ, ତେବେ ମୁଖ୍ୟମନ୍ତ୍ରୀ ବାଲଟ୍ ପେପରକୁ ଫେରିବାକୁ କାହିଁକି ଡରୁଛନ୍ତି? ଜନସାଧାରଣଙ୍କ ବିଶ୍ୱାସ ଫେରାଇ ଆଣିବା ପାଇଁ ନିକଟରେ ହୋଇଥିବା ସମସ୍ତ ବେଆଇନ ନିର୍ବାଚନକୁ ତୁରନ୍ତ ବାତିଲ କରିବା ଏବଂ ବାଲଟ୍ ପେପର ବ୍ୟବସ୍ଥାକୁ ସମ୍ପୂର୍ଣ୍ଣ ଭାବେ ଫେରାଇ ଆଣିବାକୁ କଂଗ୍ରେସ ଦାବି କରୁଛି।”
ଦିଲ୍ଲୀ ଏବଂ ଓଡ଼ିଶାରେ ଆନ୍ଦୋଳନକାରୀଙ୍କ ଉପରେ ଦମନଲୀଳା ନିନ୍ଦନୀୟ
ଦେଶବ୍ୟାପୀ ଚାଲିଥିବା ବିରୋଧ ପ୍ରଦର୍ଶନକୁ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି ଦର୍ଶାଇବାକୁ ମୁଖ୍ୟମନ୍ତ୍ରୀ ଚେଷ୍ଟା କରୁଥିବା ବେଳେ, ଭକ୍ତ ସରକାରୀ ଶକ୍ତିର ଏଭଳି ସ୍ୱେଚ୍ଛାଚାରୀ ବ୍ୟବହାରକୁ ଦୃଢ଼ ନିନ୍ଦା କରିଛନ୍ତି। “ଆଜି କେନ୍ଦ୍ରୀୟ ଦିଲ୍ଲୀକୁ ଏକ ଦୁର୍ଗରେ ପରିଣତ କରାଯାଇଥିଲା। ସୁପ୍ରିମକୋର୍ଟ ଅଭିମୁଖେ ହେବାକୁ ଥିବା ଏକ ଶାନ୍ତିପୂର୍ଣ୍ଣ ଗଣତାନ୍ତ୍ରିକ ମାର୍ଚ୍ଚକୁ ଅଟକାଇବା ପାଇଁ ମେଟ୍ରୋ ଷ୍ଟେସନଗୁଡ଼ିକୁ ବନ୍ଦ କରିଦିଆଗଲା ଏବଂ ୩୫,୦୦୦ ରୁ ଅଧିକ ସୁରକ୍ଷା କର୍ମୀ ମୁତୟନ କରାଗଲା। ଛାତ୍ର, ଯୁବକ ଏବଂ ମହିଳା ଆନ୍ଦୋଳନକାରୀଙ୍କ ଉପରେ ହୋଇଥିବା ଏହି ପୋଲିସ ବର୍ବରତାକୁ ମୁଖ୍ୟମନ୍ତ୍ରୀଙ୍କ ନୀରବ ସମର୍ଥନ ପ୍ରମାଣ କରୁଛି ଯେ ବିଜେପି ଆଉ ବାରିକେଡ୍ ଏବଂ ନିଷେଧାଦେଶ ପଛରେ ନଲୁଚି ଜନସାଧାରଣଙ୍କ ସାମ୍ନା କରିପାରିବ ନାହିଁ।”
ଓଡ଼ିଶା ପାଇଁ ଆହ୍ୱାନ:
ଶ୍ରୀ ଭକ୍ତ ଚରଣ ଦାସ ଘୋଷଣା କରିଛନ୍ତି ଯେ, ଶ୍ରୀ ରାହୁଲ ଗାନ୍ଧୀଙ୍କ ଐତିହାସିକ ସାମ୍ବାଦିକ ସମ୍ମିଳନୀ ଏବଂ ସୁପ୍ରିମକୋର୍ଟ ମାର୍ଚ୍ଚ ଦ୍ୱାରା ସୃଷ୍ଟି ହୋଇଥିବା ଜାତୀୟ ଆନ୍ଦୋଳନର ପ୍ରଭାବକୁ ଓପିସିସି ଓଡ଼ିଶାର ପ୍ରତିଟି ଜିଲ୍ଲାରେ ଜୋରଦାର ଭାବେ ଆଗକୁ ବଢ଼ାଇବ। “ମୋହନ ମାଝୀ ସରକାର ଯେତେବେଳେ ଆମ ଗଣତନ୍ତ୍ରକୁ କ୍ଷତି ପହଞ୍ଚାଇବା ପାଇଁ କେନ୍ଦ୍ରର ରବର ଷ୍ଟାମ୍ପ ଭାବେ କାର୍ଯ୍ୟ କରୁଛନ୍ତି, ସେତେବେଳେ ଆମେ ଚୁପ୍ ହୋଇ ବସିବୁ ନାହିଁ। ଓପିସିସି ପକ୍ଷରୁ ସମଗ୍ର ରାଜ୍ୟରେ ଏସଆଇଆରର ସମ୍ପୂର୍ଣ୍ଣ ପ୍ରତ୍ୟାହାର ଓ ବାତିଲ, ନିକଟରେ ପ୍ରକାଶିତ ସମସ୍ତ ଭୋଟର ତାଲିକାର ବ୍ୟାପକ ଅଡିଟ୍ ଏବଂ ବର୍ତ୍ତମାନର ସିଇସିଙ୍କ ଅଧୀନରେ ହୋଇଥିବା ନିର୍ବାଚନ ଜାଲିଆତିର ଉତ୍ତରଦାୟିତ୍ବ ଦାବିରେ ରାଜ୍ୟବ୍ୟାପୀ ଆନ୍ଦୋଳନ ଆରମ୍ଭ କରାଯିବ। ସମ୍ବିଧାନ ସୁରକ୍ଷା ପାଇଁ ଲଢ଼େଇ ଏବେ ଓଡ଼ିଶାର ରାଜପଥରେ ପହଞ୍ଚିଛି ଏବଂ ଗଣତନ୍ତ୍ରର ପୁନରୁଦ୍ଧାର ନହେବା ପର୍ଯ୍ୟନ୍ତ ଆମେ ଏହି ଲଢ଼େଇ ଜାରି ରଖିବୁ” ବୋଲି ଶ୍ରୀ ଭକ୍ତ ଚରଣ ଦାସ ଉକ୍ତ ପ୍ରେସ୍ ବିବୃତିରେ କହିଛନ୍ତି। ଏମଏମଡିଆର ସଂଶୋଧିତ ଅଧିନିୟମ ପ୍ରତ୍ୟାହାର ଦାବି, ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କ ଇସ୍ତଫା ଦାବି ଓ ବନ୍ୟାବିପନ୍ନଙ୍କୁ ତୁରନ୍ତ ସୁରକ୍ଷା ଦାବିରେ ପୂର୍ବରୁ ପିସିସି ଓ ଓଡ଼ିଶାର ଇଣ୍ଡିଆ ମେଣ୍ଟର ସହଯୋଗୀ ଦଳଗୁଡ଼ିକ ଦ୍ବାରା ଆରମ୍ଭ ହୋଇଥିବା ଆନ୍ଦୋଳନକୁ ମଧ୍ୟ ଆହୁରି ତୀବ୍ରତର କରାଯିବ ବୋଲି ଶ୍ରୀ ଦାସ ସୂଚନା ଦେଇଛନ୍ତି।
