ଇରାନ : ଇରାନର ଗୁରୁତ୍ୱପୂର୍ଣ୍ଣ ତୈଳ କେନ୍ଦ୍ର ଖାର୍ଗ ଦ୍ୱୀପ ନିକଟରେ ଶନିବାର ବିସ୍ଫୋରଣ ଶବ୍ଦ ଶୁଣିବାକୁ ମିଳିଛି। ଆମେରିକା ଏକ ଇରାନୀ ତୈଳ ଜାହାଜକୁ ଆକ୍ରମଣ କରିବା ପରେ ଏହି ବିସ୍ଫୋରଣ ଘଟିଥିବା ଖବର ଆସିଛି। ରଏଟର୍ସ ଇରାନର ରାଜ୍ୟ ସମର୍ଥିତ ନ୍ୟୁଜ୍ ଏଜେନ୍ସି ନୁର୍ ନ୍ୟୁଜ୍କୁ ଉଦ୍ଧୃତ କରି ଏହି ସୂଚନା ଦେଇଛି। ତେବେ ଏହି ଘଟଣାରେ କାହାର ମୃତ୍ୟୁ କିମ୍ବା ଆହତ ହେବାର ଖବର ମିଳିନାହିଁ। ଇରାନର ଅନ୍ୟ ଏକ ନ୍ୟୁଜ୍ ସାଇଟ୍ ଅସର ଇରାନର ରିପୋର୍ଟ ଅନୁସାରେ, ତୈଳ ଜାହାଜଟିରୁ ତୈଳ ଖଲାସ କରାଯାଉଥିବା ସମୟରେ ଏହା ଉପରେ ୪ଟି ପ୍ରକ୍ଷେପଣାସ୍ତ୍ର ମାଡ଼ ହୋଇଥିଲା। ଇରାନର ଅର୍ଦ୍ଧ-ସରକାରୀ ଫାର୍ସ ନ୍ୟୁଜ୍ ଏଜେନ୍ସି କହିଛି, ବିସ୍ଫୋରଣର ଶବ୍ଦ ଶୁଣାଯାଇଥିଲେ ମଧ୍ୟ ଖାର୍ଗ ଦ୍ୱୀପ ନିକଟରୁ ଧୂଆଁ ଉଠୁଥିବା ଦେଖାଯାଇ ନଥିଲା।
ଇରାନ ସରକାର ଏପର୍ଯ୍ୟନ୍ତ ଗଣମାଧ୍ୟମର ଏହି ରିପୋର୍ଟକୁ ଆନୁଷ୍ଠାନିକ ଭାବେ ସ୍ପଷ୍ଟ କରିନାହାନ୍ତି। ଆମେରିକା ଓ ଇରାନ ମଧ୍ୟରେ ଚାଲିଥିବା ଦୀର୍ଘ ସଂଘର୍ଷ ମଧ୍ୟରେ ଏହି ଘଟଣା ଉତ୍ତେଜନାକୁ ଆହୁରି ବଢ଼ାଇଛି। ଅଗଷ୍ଟ ୩୦ରେ ଆମେରିକା ହର୍ମୁଜ୍ ପ୍ରଣାଳୀ ନିକଟ ଲାରାକ୍ ଦ୍ୱୀପରେ ଇରାନୀ ଘାଟିଗୁଡ଼ିକୁ ଆକ୍ରମଣ କରିଥିଲା। ଏହାର ଜବାବରେ ଇରାନ ଜୋର୍ଡାନରେ ଥିବା ଆମେରିକୀୟ ସେନା ଘାଟିକୁ ବାଲିଷ୍ଟିକ୍ କ୍ଷେପଣାସ୍ତ୍ର ମାଡ଼ କରିଥିଲା। ସେପ୍ଟେମ୍ବର ୧ରେ ଆମେରିକା ଇରାନର ଦକ୍ଷିଣ ଉପକୂଳରେ ପୁଣି ଆକ୍ରମଣ କରିଥିଲା।
ଆମେରିକୀୟ ସେନା ଅନୁସାରେ, ଇରାନର ବାୟୁ ପ୍ରତିରକ୍ଷା ବ୍ୟବସ୍ଥା, ରାଡାର, ସାମୁଦ୍ରିକ ସାମରିକ ଉପକରଣ, ସମୁଦ୍ରରେ ମାଇନ୍ ବିଛାଇବାର କ୍ଷମତା ଓ ଯୋଗାଯୋଗ ବ୍ୟବସ୍ଥାକୁ ଏହି ଆକ୍ରମଣରେ ଲକ୍ଷ୍ୟ କରାଯାଇଥିଲା। ହର୍ମୁଜ୍ ପ୍ରଣାଳୀ ବିଶ୍ୱର ଏକ ପ୍ରମୁଖ ତୈଳ ପରିବହନ ପଥ। ଏହି ଅଞ୍ଚଳରେ ଲଢ଼େଇ ଓ ଜାହାଜ ଉପରେ ଆକ୍ରମଣ ଯୋଗୁଁ ସାମୁଦ୍ରିକ ପରିବହନ ପ୍ରଭାବିତ ହେଉଛି। ଏହା ଫଳରେ ବିଶ୍ୱ ବଜାରକୁ ତୈଳ ଯୋଗାଣ ଆହୁରି ବାଧାପ୍ରାପ୍ତ ହେବା ନେଇ ଚିନ୍ତା ବଢ଼ିଛି।
