ନୂଆଦିଲ୍ଲୀ: କଂଗ୍ରେସର ‘ଭାରତ ଯୋଡୋ ଯାତ୍ରା’ ବର୍ତ୍ତମାନ କର୍ଣ୍ଣାଟକରେ ପହଁଚିଛି । କଂଗ୍ରେସର ମଧ୍ୟବର୍ତ୍ତୀକାଳୀନ ସଭାପତି ସୋନିଆ ଗାନ୍ଧୀ ଗୁରୁବାର ରାହୁଲ ଗାନ୍ଧୀ ଏବଂ ଅନ୍ୟ ଦଳର ନେତା ତଥା କର୍ମକର୍ତ୍ତାଙ୍କ ସହ ‘ଭାରତ ଯୋଡୋ ଯାତ୍ରା’ରେ ଯୋଗ ଦେଇଥିଲେ। ଭରତ ଯୋଡୋ ଯାତ୍ରା ଆଜି ପାଣ୍ଡବପୁରାରୁ ନାଗାମଙ୍ଗାଲା ତାଲୁକକୁ ଯିବ। ଏଥିପାଇଁ ସୋନିଆ ଗାନ୍ଧୀ ଅକ୍ଟୋବର ୩ ରେ କର୍ଣ୍ଣାଟକରେ ପହଞ୍ଚିଥିଲେ। ସେ ରାହୁଲ ଗାନ୍ଧୀଙ୍କ ସହ ବିଜୟା ଦଶମୀ ଅବସରରେ ବେଗୁର ଗାଁର ଭୀମନାକୋଲି ମନ୍ଦିରରେ ପ୍ରାର୍ଥନା କରିଥିଲେ। ସେ ମାଇସୋର ଜିଲ୍ଲାର କୋଟେ ତାଲୁକର କାବିନି ଡ୍ୟାମର ବ୍ୟାକୱାଟର୍ ନିକଟରେ ଥିବା ଏକ ରିସୋର୍ଟରେ ରହୁଥିଲେ। ଏଠାରେ ରାହୁଲ ଗାନ୍ଧୀ ତାଙ୍କୁ ଭେଟିବାକୁ ଆସିଥିଲେ। ଏହା ପରେ ଦୁହେଁ କାବିନି ଜଙ୍ଗଲ ସଫାରିକୁ ମଧ୍ୟ ଯାଇଥିଲେ ।
ଦଶହରା କାରଣରୁ, ଭାରତ ଯୋଡୋ ଯାତ୍ରା ୩ ଓ ୪ ଅକ୍ଟୋବରରେ ଅନୁଷ୍ଠିତ ହୋଇନଥିଲା। ଦୀର୍ଘ ଦିନ ପରେ ସେ ଦଳର ଏକ ସାଧାରଣ ରାଜନୈତିକ କାର୍ଯ୍ୟକ୍ରମରେ ଜଡିତ ଥିଲେ। ସ୍ୱାସ୍ଥ୍ୟଗତ କାରଣରୁ ସେ ଗତ କିଛି ବର୍ଷ ହେବ ଏଭଳି ସକ୍ରିୟ ଭୂମିକାରେ ନଜର ଆସିନଥିଲେ । ଚଳିତ ବର୍ଷ ପ୍ରାରମ୍ଭରେ ୫ଟି ରାଜ୍ୟରେ ଅନୁଷ୍ଠିତ ବିଧାନସଭା ନିର୍ବାଚନରେ ମଧ୍ୟ ସେ ପ୍ରଚାର ପାଇଁ କୌଣସି ସ୍ଥାନକୁ ଯାଇ ନଥିଲେ। ଗତ ସେପ୍ଟେମ୍ବରରେ ତାମିଲନାଡୁର ରମେଶ୍ୱରାମରୁ ଭାରତ ଯୋଡା ଯାତ୍ରା ଆରମ୍ଭ ହୋଇଥିଲା ଏହି ସମୟରେ ସୋନିଆ ଗାନ୍ଧୀ ଚିକିତ୍ସା ପାଇଁ ଆମେରିକା ଯାଇଥିଲେ । ଏହା ପରେ ତାଙ୍କ ମାଙ୍କର ମୃତ୍ୟୁ ହୋଇଥିଲା, ଏହା ପରେ ତାଙ୍କୁ ଇଟାଲୀ ଯିବାକୁ ପଡିଲା। ଆସନ୍ତା ବର୍ଷ ଆରମ୍ଭରେ କର୍ଣ୍ଣାଟକରେ ବିଧାନସଭା ନିର୍ବାଚନ ହେବ। ଏହି ପରିପ୍ରେକ୍ଷୀରେ ସୋନିଆ ଗାନ୍ଧୀଙ୍କ ପାଇଁ ଏଠାରେ ‘ଭାରତ ଯୋଡୋ ଯାତ୍ରା’ରେ ଅଂଶଗ୍ରହଣ କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଏ।
