ନୂଆଦିଲ୍ଲୀ: ବର୍ତ୍ତମାନ ସମୟରେ ସମସ୍ତଙ୍କ ପାଖରେ ସ୍ମାର୍ଟଫୋନ୍ ଅଛି । ଯେଉଁମାନଙ୍କ ପାଖରେ ନାହିଁ ସେମାନେ ମଧ୍ୟ ଏହାକୁ ଶୀଘ୍ର କିଣିବାରେ ବ୍ୟସ୍ତ। ଏବେ ପେମେଣ୍ଟ କରିବା, ଗୀତ ଶୁଣିବା କିମ୍ବା ଚଳଚ୍ଚିତ୍ର ଦେଖିବା ଭଳି ଅଧିକାଂଶ କାର୍ଯ୍ୟ ସ୍ମାର୍ଟଫୋନରେ କରାଯାଉଛି । କିନ୍ତୁ ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ବର୍ତ୍ତମାନ ଏହି ସ୍ମାର୍ଟଫୋନ୍ ଲୋକଙ୍କ ଦାମ୍ପତ୍ୟ ଜୀବନକୁ ନଷ୍ଟ କରୁଛି । ନିକଟରେ ଭିଭୋ ସାଇବର ମିଡିଆ ରିସର୍ଚ୍ଚ (ସିଏମ୍ଆର୍) ପକ୍ଷରୁ କରାଯାଇଥିବା ଏକ ସର୍ଭେରୁ ଏହା ଜଣାପଡିଛି । ବିବାହିତ ଦମ୍ପତିଙ୍କ ଉପରେ ସ୍ମାର୍ଟଫୋନର ଅତ୍ୟଧିକ ବ୍ୟବହାର ଉପରେ ଏହାର ପ୍ରଭାବ ଜାଣିବା ପାଇଁ ଏହି ଅଧ୍ୟୟନ କରାଯାଇଛି । ରିପୋର୍ଟ ଅନୁଯାୟୀ, ୮୮% ବିବାହିତ ଭାରତୀୟ ଅନୁଭବ କରନ୍ତି ଯେ ସ୍ମାର୍ଟଫୋନର ଅତ୍ୟଧିକ ବ୍ୟବହାର ସେମାନଙ୍କ ଦାମ୍ପତ୍ୟ ଜୀବନକୁ ନଷ୍ଟ କରୁଛି । ଏହାର ଅର୍ଥ ହେଉଛି ଅତ୍ୟଧିକ ସ୍ମାର୍ଟଫୋନ୍ ବ୍ୟବହାର ୮୮%ଙ୍କର ଜୀବନସାଥୀ ସହ ସମ୍ପର୍କକୁ ଖରାପ କରାଉଛି । ଏହାଛଡା ୫୮% ଖାଇବା ସମୟରେ ଫୋନ୍ ବ୍ୟବହାର କରୁଥିବାବେଳେ ୬୯% କଥାବାର୍ତ୍ତା ସମୟରେ ସ୍ୱାମୀ ହେଉ ବା ସ୍ତ୍ରୀ କେହି କାହାକୁ ପୂର୍ଣ୍ଣ ଧ୍ୟାନ ଦେଉନାହାଁନ୍ତି । ୮୪% ଉତ୍ତରଦାତା ନିଜ ଜୀବନସାଥୀଙ୍କ ସହ ଅଧିକ ସମୟ ବିତାଇବାକୁ ଚାହାଁନ୍ତି ।
ଲୋକମାନେ ସମସ୍ୟାଗୁଡିକ ଗ୍ରହଣ କରୁଛନ୍ତି ଏବଂ ପରିବର୍ତ୍ତନ ପାଇଁ ପ୍ରସ୍ତୁତ ଅଛନ୍ତି । ୯୦% ନିଜ ଜୀବନସାଥୀଙ୍କ ସହ ଅର୍ଥପୂର୍ଣ୍ଣ ବାର୍ତ୍ତାଳାପ ପାଇଁ ଅଧିକ ଖାଲି ସମୟ ପାଇବାକୁ ଚାହାଁନ୍ତି । ସ୍ମାର୍ଟଫୋନ୍ ବର୍ତ୍ତମାନ ସେମାନଙ୍କ ଜୀବନର ଏକ ଅତ୍ୟାବଶ୍ୟକ ଅଂଶ ହୋଇଯାଇଥିବା ୮୪ ପ୍ରତିଶତ ଲୋକ ସହମତ ହୋଇଛନ୍ତି । ହେଲେ ୭୨% ଲୋକ କହିଛନ୍ତି ଯେ, ବେଳେବେଳେ ସେମାନେ ନିଜ ସ୍ମାର୍ଟଫୋନରେ ଏତେ ବ୍ୟସ୍ତ ରୁହନ୍ତି ଯେ ନିଜ ଆଖପାଖ ପରିବେଶ ବିଷୟରେ ଅବଗତ ନୁହଁନ୍ତି । ୫୮% ଲୋକ ସ୍ୱୀକାର କରିଛନ୍ତି ଯେ ସେମାନେ ଖାଇବା ସମୟରେ ଏବଂ ୬୦% ଲୋକ ଘରେ ଥିବାବେଳେ ସ୍ମାର୍ଟଫୋନ୍ ବ୍ୟବହାର କରିଥାନ୍ତି । ଆହୁରିମଧ୍ୟ ପ୍ରାୟ ୬୦% ଲୋକ ପରିବାର ସହ ବସି କଥାବାର୍ତ୍ତା କରିବା ପରିବର୍ତ୍ତେ ସ୍ମାର୍ଟଫୋନ୍ ବ୍ୟବହାର କରୁଛନ୍ତି ।
