ଇମ୍ରାନ ଖାନଙ୍କୁ ଭାରତ ଛାଡିବାକୁ ନୋଟିସ

ନୂଆଦିଲ୍ଲୀ: ବଲିଉଡ ଅଭିନେତା ଇମ୍ରାନଖାନଙ୍କୁ ଭାରତ ଛାଡିବାକୁ ନୋଟିସ । ବଲିଉଡ ସୁପରଷ୍ଟାର ଅମିର ଖାନଙ୍କ ଭଣଜା ଇମ୍ରାନ ଖାନଙ୍କୁ ଅକ୍ଟୋବର ୨୮ ସୁଦ୍ଧା ଭାରତ ଛାଡିବାକୁ ନୋଟିସ ଜାରି କରିଛି ମୁମ୍ବାଇ ପୋଲିସ। ଇମ୍ରାନ ଖାନ ମୁଖ୍ୟ ନିର୍ବାଚନ କମିସନରଙ୍କ ବିରୋଧରେ ଅକ୍ଟୋବର ୧୦ରେ ହୋଇଥିବା ମୁମ୍ବାଇର ଅଗଷ୍ଟ କ୍ରାନ୍ତି ମଇଦାନରେ ଅନୁଷ୍ଠିତ ସିଜେପି ପ୍ରତିବାଦରେ ଅଂଶ ଗ୍ରହଣ କରିଥିଲେ । ଇମ୍ରାନ ଖାନ ଜଣେ ଆମେରିକୀୟ ନାଗରିକ । ଭାରତୀୟ ନାଗରିକ ନହୋଇ ମଧ୍ୟ ଭାରତରେ ଏକ ପ୍ରତିବାଦରେ ଅଂଶଗ୍ରହଣ କରିବା ଅଭିଯୋଗରେ ଇମ୍ରାନଖାନଙ୍କ ବିରୋଧରେ ପ୍ରବାସ ଆଇନର ପ୍ରାସଙ୍ଗିକ ବ୍ୟବସ୍ଥା ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ପ୍ରତିବାଦ ଘଟଣାରେ ତାଙ୍କ ନାଁ ରେ ମାମଲା ରୁଜୁ କରିବା ସହ ତାଙ୍କୁ ଅଟକ ରଖିଥିଲା ମୁମ୍ବାଇ ପୋଲିସ । ଇମ୍ରାନଖାନଙ୍କ ଛଡା ତାଙ୍କ ସମ୍ପର୍କୀୟ ଭଉଣୀ ଏବଂ ମେଡ ଇନ ହେଭେନ ଅଭିନେତା ଜୈନ ଖାନଙ୍କୁ ମଧ୍ୟ ପ୍ରତିବାଦ ସମୟରେ ଅଟକ ରଖାଯାଇଥିଲା । ଯାହା ସୋସିଆଲ ମିଡିଆରେ ଏକ ଚର୍ଚ୍ଚାର ବିଷୟ ପାଲଟି ଥିଲା । ଇମ୍ରାନଖାନ ଆମେରିକୀୟ ନାଗରିକ ଏବଂ ତାଙ୍କର ଏକ ଓଭରସିଜ ସିଟିଜେନ ଅଫ ଇଣ୍ଡିଆ କାର୍ଡ ଅଛି ଯାହା ତାଙ୍କୁ ଭାରତରେ ରହିବା ଏବଂ କାମ କରିବାକୁ ଅନୁମତି ମିଳିଥାଏ ।