ଆକାଶରୁ ଖସିଲା ଜଳନ୍ତା ବିମାନ

ନ୍ୟୁୟର୍କ:  ଯୁକ୍ତରାଷ୍ଟ୍ର ଆମେରିକାର ୱମିଙ୍ଗ ପ୍ରାନ୍ତରେ ଘଟିଥିବା ଏକ ବିମାନ ଦୁୂର୍ଘଟଣା ସମ୍ପର୍କରେ ଜଣାପଡିଛି । ବିମାନଟି ୱମିଙ୍ଗ ପ୍ରାନ୍ତରେ ଥିବା ଜିଲେଟ ସହର ଉପର ଦେଇ ଉଡ଼ୁଥିବା ବେଳେ ଦୁର୍ଘଟଣାଗ୍ରସ୍ତ ହୋଇ ଖସିପଡିଥିଲା । ବିମାନଟି ଭୟଙ୍କର ଭାବେ ଜଳୁଥିବା ଅବସ୍ଥାରେ ଖସିବାରୁ ସହର ଉପକଣ୍ଠରେ ଥିବା ଏକ ଜଙ୍ଗଲରେ ମଧ୍ୟ ନିଆଁ ଲାଗିଯାଇଛି । ତେବେ ଏହି ବିମାନରେ କେତେ ସଂଖ୍ୟକ ଯାତ୍ରୀ ଥିଲେ ସେସମ୍ପର୍କରେ ସଠିକ୍ ସୂଚନା ମିଳିପାରିନଥିଲେ ମଧ୍ୟ ବହୁ ସଂଖ୍ୟକ ଯାତ୍ରୀଙ୍କ ମୃତ୍ୟୁ ଘଟିଥିବା ଆଶଙ୍କା କରାଯାଉଛି । ବିମାନ ବନ୍ଦରର ଜଣେ ସୁରକ୍ଷା ଅଧିକାରୀଙ୍କ କହିବା ମୁତାବକ, ଗତକାଲି ଅପରାହ୍ନ ପ୍ରାୟ ୧ଟା ବେଳେ ବିମାନଟି ୱମିଙ୍ଗ ପ୍ରାନ୍ତରେ ଥିବା ଜିଲେଟ ସହର ଉପରେ ଉଡ଼ୁଥିଲା । ଏହି ସମୟରେ ହଠାତ୍ ବିମାନରେ ନିଆଁ ଲାଗିଯିବାରୁ ତାହା ନିକଟସ୍ଥ ଜଙ୍ଗଲ ଉପରେ ଖସି ପଡ଼ିଥିଲା । ଏହାପରେ ତୁରନ୍ତ ରାଷ୍ଟ୍ରୀୟ ପରିବହନ ସୁରକ୍ଷା ବୋର୍ଡ ପକ୍ଷରୁ ରେସକ୍ୟୁ ଅପରେସନ ଆରମ୍ଭ କରାଯାଇ ହେଲିକପ୍ଟର ଯୋଗେ ଜଙ୍ଗଲ ଉପରେ ପାଣି ସ୍ପ୍ରେ କରାଯାଉଛି । ଜଙ୍ଗଲ ନିଆଁ ଆୟତ୍ତକୁ ଆସିବା ପରେ ହିଁ ଦୁର୍ଘଟଣାସ୍ଥଳରେ ପହଞ୍ଚିବା ସମ୍ଭବ ପର ହୋଇ ପାରିବ ବୋଲି ଅଧିକାରୀଜଣକ କହିଛନ୍ତି । ତେବେ ଦୁର୍ଘଟଣାଜନିତ ଭୟାବହତା ଜଣାପଡିବା ପରେ ବିମାନରେ ଥିବା ଯାତ୍ରୀଙ୍କ ବଞ୍ଚିବା ଆଶା କ୍ଷୀଣ ବୋଲି ମତ ପ୍ରକାଶ ପାଇଛି । ପ୍ରକାଶ, ୩ ଦିନ ପୂର୍ବେ ନେପାଳରେ ଏକ ବିମାନ ଦୁର୍ଘଟଣାଗ୍ରସ୍ତ ହୋଇ ୧୮ଜଣଙ୍କ ମୃତ୍ୟୁ ହୋଇଥିଲା ।