ନୂଆଦିଲ୍ଲୀ: ସୁପ୍ରିମକୋର୍ଟର ମୁଖ୍ୟ ବିଚାରପତି ବି.ଆର. ଗାଭାଇଙ୍କ ଉପରକୁ ଜୋତା ଫିଙ୍ଗିବାକୁ ଚେଷ୍ଟା କରାଯାଇଥିଲା। ଜୋତା ଫିଙ୍ଗିବାକୁ ଚେଷ୍ଟା କରିଥିବା ଅଭିଯୁକ୍ତ ଓକିଲଙ୍କୁ ହେପାଜତକୁ ନିଆଯାଇଛି। ତାଙ୍କର ନାମ ହେଉଛି ରାକେଶ କିଶୋର। ଜୋତା ଫିଙ୍ଗିବାକୁ ଚେଷ୍ଟା କରିବା ପୂର୍ବରୁ ଓକିଲ ଚିତ୍କାର କରି କହିଥିଲେ, “ସନାତନ ଧର୍ମର ଅପମାନକୁ ବରଦାସ୍ତ କରାଯିବ ନାହିଁ।” ସୁପ୍ରମିକୋର୍ଟରେ ଶୁଣାଣି ସମୟରେ ଏଭଳି ଘଟଣା ଘଟିଥିଲା। ବିଚାରପତି ଗଭାଇଙ୍କ ଉପରକୁ ଜୋତା ଫିଙ୍ଗିଥିଲେ ଓକିଲ ରାକେଶ କିନ୍ତୁ ଜୋତା ବେଞ୍ଚ ନିକଟରେ ପହଞ୍ଚି ପାରିନଥିଲା। ଏହାପରେ ଓକିଲ ରାକେଶଙ୍କୁ ଧରି କୋର୍ଟ କର୍ମଚାରୀମାନେ ପୋଲିସକୁ ହସ୍ତାନ୍ତ କରିଥିଲେ। ପୋଲିସ ଅଭିଯୁକ୍ତ ଓକିଲଙ୍କୁ ଗିରଫ କରି ପଚରାଉଚରା କରୁଛି।
ସିଜେଆଇଙ୍କ ଉପରେ ଆକ୍ରମଣ ଉଦ୍ୟମକୁ ତୀବ୍ର ନିନ୍ଦା କରାଯାଇଛି। ଅଭିଯୁକ୍ତ ଓକିଲଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ପାଇଁ ମଧ୍ୟ ଦାବି କରାଯାଉଛି। ଏହି ଘଟଣା ପରେ ଜଷ୍ଟିସ ଗଭାଇ ଶାନ୍ତ ରହି ମାମଲାର ଶୁଣାଣି ଜାରି ରଖିଥିଲେ । ଏହା କିଛି ପ୍ରଭାବ ପକାଇବ ନାହିଁ ବୋଲି ଜଷ୍ଟିସ ଗଭାଇ କହିଥିଲେ । ସେପ୍ଟେମ୍ବର ୧୬ ତାରିଖରେ, ସୁପ୍ରିମକୋର୍ଟ ଖଜୁରାହୋର ଜାଭାରି ମନ୍ଦିରରେ ଭଗବାନ ବିଷ୍ଣୁଙ୍କ ସାତ ଫୁଟ ଉଚ୍ଚ ପ୍ରତିମାକୁ ପୁନଃନିର୍ମାଣ ଏବଂ ପୁନଃସ୍ଥାପନ କରିବା ପାଇଁ ନିର୍ଦ୍ଦେଶ ଦେବା ପାଇଁ ଏକ ଆବେଦନକୁ ଖାରଜ କରିଦେଇଥିଲେ। କୋର୍ଟ ଏହାକୁ ଏକ ପ୍ରଚାର ସ୍ୱାର୍ଥ ମାମଲା ବୋଲି କହି ଆବେଦନକୁ ଖାରଜ କରିଦେଇଥିଲେ। ମୁଖ୍ୟ ବିଚାରପତି ଗଭାଇ କହିଥିଲେ, “ଏହା ସମ୍ପୂର୍ଣ୍ଣ ଭାବରେ ଏକ ପ୍ରଚାର ଆବେଦନ। ଯାଇ ସ୍ୱୟଂ ଭଗବାନଙ୍କୁ କିଛି କରିବାକୁ କୁହନ୍ତୁ। ଯଦି ଆପଣ କହୁଛନ୍ତି ଯେ ଆପଣ ଭଗବାନ ବିଷ୍ଣୁଙ୍କର ଜଣେ ଦୃଢ଼ ଭକ୍ତ, ତେବେ ଟିକେ ପ୍ରାର୍ଥନା ଏବଂ ଧ୍ୟାନ କରନ୍ତୁ।”
ସିଜେଆଇଙ୍କ ମନ୍ତବ୍ୟକୁ ସୋସିଆଲ ମିଡିଆରେ ବହୁଳ ଭାବରେ ସମାଲୋଚନା କରାଯାଇଥିଲା। ଏହାକୁ ହିନ୍ଦୁ ବିଶ୍ୱାସର ଉପହାସ ବୋଲି ବର୍ଣ୍ଣନା କରାଯାଇଥିଲା। ଏହି ପ୍ରତିକ୍ରିୟା ପରେ, ତାଙ୍କ ବିରୁଦ୍ଧରେ ଅନଲାଇନରେ ମହାଭିଯୋଗ ଦାବି ମଧ୍ୟ ଉଠିଥିଲା। ସମାଲୋଚକମାନେ ତାଙ୍କୁ ଧାର୍ମିକ ଭାବନା ଏବଂ ନ୍ୟାୟପାଳିକାର ମର୍ଯ୍ୟାଦା ପ୍ରତି ଅସମ୍ମାନ କରିଥିବା ଅଭିଯୋଗ କରିଥିଲେ।ସୁପ୍ରିମକୋର୍ଟ ମଧ୍ୟପ୍ରଦେଶର ଖଜୁରାହୋ ମନ୍ଦିର ପରିସରରେ ଅବସ୍ଥିତ ଜୱାରି ମନ୍ଦିରରେ ଭଗବାନ ବିଷ୍ଣୁଙ୍କ ସାତ ଫୁଟ ଉଚ୍ଚ ମୂର୍ତ୍ତିକୁ ପୁନଃସ୍ଥାପନ କରିବା ପାଇଁ ପ୍ରାର୍ଥନା କରାଯାଇଥିବା ଏକ ଆବେଦନକୁ ଖାରଜ କରିଦେଇଥିଲେ।
