ୱାସିଂଟନ୍ : ଟେକ୍ସାସ୍ ଭିତ୍ତିକ କମ୍ପାନୀ ଫାୟାର୍ ଫ୍ଲାଏ ଦ୍ୱାରା ନିର୍ମିତ ଏକ ରୋବୋଟିକ୍ ଲ୍ୟାଣ୍ଡର୍ ରବିବାର ସଫଳତାର ସହ ଚନ୍ଦ୍ରପୃଷ୍ଠରେ ଅବତରଣ କରିଛି। ନୀଳ ଭୂତ ବା ବ୍ଲୁ ଘୋଷ୍ଟ ନାମକ ଏହି ଲ୍ୟାଣ୍ଡର୍ ଜାନୁଆରୀରେ ଏକ ସ୍ପେସ୍ଏକ୍ସ ରକେଟ୍ ସାହାଯ୍ୟରେ କକ୍ଷପଥକୁ ଉତ୍କ୍ଷେପଣ କରାଯାଇଥିଲା। ବ୍ଲୁ ଘୋଷ୍ଟ ପୃଥିବୀର କକ୍ଷପଥରେ କିଛି ସମୟ ବିତାଇଥିଲା ଏବଂ ସେବେଠାରୁ ଚନ୍ଦ୍ର ଆଡ଼କୁ ଗତି କରୁଥିଲା। ଫାୟାର୍ ଫ୍ଲାଏ ହେଉଛି ଏକ ଘରୋଇ-କ୍ଷେତ୍ର କମ୍ପାନୀ, ଯାହା ପ୍ରଥମେ ଚନ୍ଦ୍ରପୃଷ୍ଠରେ ସଫ୍ଟ ଅବତରଣ କରିବାରେ ସମ୍ମାନ ହାସଲ କରିଛି। ଅତୀତରେ ଅନେକ ଘରୋଇ କମ୍ପାନୀ ଏପରି ପ୍ରଚେଷ୍ଠା କରି ବିଫଳ ହୋଇଛନ୍ତି। ବ୍ଲୁ ଘୋଷ୍ଟ ମିଶନ ହେଉଛି ନାସାର ବାଣିଜ୍ୟିକ ଲୁନାର୍ ପେଲୋଡ୍ ସେବା ପଦକ୍ଷେପର ଏକ ଅଂଶ, ଯାହା ମାଧ୍ୟମରେ ମହାକାଶ ଏଜେନ୍ସି ଚନ୍ଦ୍ରପୃଷ୍ଠକୁ ବିଜ୍ଞାନ ପରୀକ୍ଷଣ, ପ୍ରଯୁକ୍ତିବିଦ୍ୟା ଏବଂ ଅନ୍ୟାନ୍ୟ କାର୍ଗୋ ପହଞ୍ଚାଇବା ପାଇଁ ଅନେକ ଘରୋଇ କମ୍ପାନୀକୁ ଚୁକ୍ତିନାମା ପ୍ରଦାନ କରିଛି।
ଫାୟାର୍ ଫ୍ଲାଏ ନାସାର ସିଏଲ୍ପିଏସ୍ ଏବଂ ଆର୍ଟେମିସ୍ କାର୍ଯ୍ୟକ୍ରମ ଅଧୀନରେ ଏକ ଠିକାଦାର ଭାବରେ ଏହି ମିଶନକୁ କାର୍ଯ୍ୟକାରୀ କରୁଛି, ଯାହା ଏହି ଦଶନ୍ଧି ପରେ ମଣିଷ ଫେରିବା ପୂର୍ବରୁ ଚନ୍ଦ୍ରକୁ ଖୋଜିବା ପାଇଁ ରୋବୋଟିକ୍ ଲ୍ୟାଣ୍ଡର୍ ବ୍ୟବହାର କରିବାକୁ ଲକ୍ଷ୍ୟରଖିଛି। ଏ ନେଇ ନାସା ପ୍ରଶାସକ ବିଲ୍ ନେଲସନ୍, ଫାୟାରଫ୍ଲାଏ ଏରୋସ୍ପେସ୍ ଏବଂ ସ୍ପେସ୍ଏକ୍ସକୁ ଲଞ୍ଚ୍ ପାଇଁ ଅଭିନନ୍ଦନ ଜଣାଇ ଏକ୍ସରେ କହିଛନ୍ତି ଯେ ଏହି ଅଭିଯାନ ଏଜେନ୍ସିକୁ ଚନ୍ଦ୍ରପୃଷ୍ଠକୁ ଭବିଷ୍ୟତର ମାନବ ମିଶନ ପାଇଁ ପ୍ରସ୍ତୁତ କରିବ। ସୁଚନାଯୋଗ୍ୟ, ଗତ ଜାନୁଆରୀ ୧୫ରେ ଫ୍ଲୋରିଡ଼ାର କେନେଡି ସ୍ପେସ୍ ସେଣ୍ଟରରୁ ବ୍ଲ୍ୟୁ ଘୋଷ୍ଟ ଲୁନାର୍ ଲାଣ୍ଡର୍କୁ ଲଞ୍ଚ୍ କରାଯାଇଥିଲା। ସ୍ପେସ୍ ଏକ୍ସ’ର ଫାଲ୍କନ-୯ ରକେଟ୍ରୁ ଅଲଗା ହେବା ପରେ ଟେକ୍ସାସରେ ଥିବା ସ୍ପେସ୍ଏକ୍ସ ମିଶନ ଅପରେସନ୍ ସେଣ୍ଟର୍ ପକ୍ଷରୁ ଏହାର ଗତିବିଧି ଉପରେ ନଜର ରଖାଯାଇଥିଲା।
