ନୂଆଦିଲ୍ଲୀ: ଆଗ୍ରା ଜିଲ୍ଲା ପିନାହଟ୍ ଥାନା ଅନ୍ତର୍ଗତ କ୍ୟୁରୀ ମଧ୍ୟରେ ରବିବାର ହୋଇଥିବା ବର୍ଷା କାରଣରୁ ଛାତ ଉପରେ ପାଣି ଜମି ରହିଥିଲା । ତେବେ ପାଣି ନିଷ୍କାସନ ନେଇ ଦୁଇ ପରିବାର ମଧ୍ୟରେ ଗୋଷ୍ଠୀ ସଂଘର୍ଷ ହୋଇଛି । ରାତି ପର୍ଯ୍ୟନ୍ତ ଏହି ସଂଘର୍ଷ ଜାରି ରହିଥିବା ବେଳେ ଲାଠି ଓ ଠେଙ୍ଗା ମାଡ ମଧ୍ୟ ହୋଇଥିବା ସୂଚନା ମିଳିଛି । ଏହି ସଂଘର୍ଷରେ ମୁକେଶ ସିଂ ଙ୍କ ୧୮ ବର୍ଷୀୟ ପୁଅ ବିକେଶର ମୃତ୍ୟୁ ଘଟିଥିବା ସୂଚନା ମିଳିଛି । ଅନ୍ୟପଟେ ଦୁଇ ଗୋଷ୍ଠୀର ୫ ଜଣ ସଦସ୍ୟ ଆହତ ହୋଇଛନ୍ତି । ପୋଲିସ ସେମାନଙ୍କୁ ହସ୍ପିଟାଲରେ ଭର୍ତ୍ତି କରାଇଛି । ଅନ୍ୟପଟେ ମୃତ ବାଳକର ଶବ ଜବତ କରି ବ୍ୟବଚ୍ଛେଦ ପାଇଁ ପଠାଯାଇଛି । ମୃତକଙ୍କ ପରିବାର ଲୋକେ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ କରିଛନ୍ତି ।
ସୂଚନା ଅନୁସାରେ, ବର୍ଷା ହେବା ପରେ ଉକ୍ତ ଗାଁର ମୁକୁଟ ସିଂଙ୍କ ଝିଅ ଭାରତୀ ଛାତ ଉପରେ ବର୍ଷା ପାଣି ବାହାର କରୁଥିଲା । ହେଲେ ଏହାରି ଭିତରେ ପାଣି ଛିଟା ମୁକୁଟ ସିଂଙ୍କ ଭାଇ ମୁକେଶଙ୍କ ଟ୍ରାକ୍ଟର ଉପରେ ପଡିଥିଲା । ଏହାକୁ ନେଇ ମୁକୁଟ ଏବଂ ମୁକେଶଙ୍କ ମଧ୍ୟରେ ଝଗଡା ଆରମ୍ଭ ହୋଇଯାଇଥିଲା । ଦୁଇ ଭାଇ ଲଢୁଥିବା ଦେଖି ତାଙ୍କ ପରିବାର ଲୋକ ମଧ୍ୟ ଆସିଯାଇଥିଲେ । ଦେଖୁ ଦେଖୁ ଝଗଡା ଉଗ୍ର ରୂପ ଧାରଣ କରିଥିଲା । ଶେଷରେ ଠେଙ୍ଗା ବାଡିର ପ୍ରହାର ବି ଚାଲିିଲା ଦୁଇ ପରିବାର ଭିତରେ । ଏଥିରେ ମୁକେଶ ସିଂ, ତାଙ୍କ ପୁଅ ବିକେଶ, ଅରୁଣ, ବଣ୍ଟି, ଧର୍ମେନ୍ଦ୍ର ସିଂ ଆଉ ଅନ୍ୟ ପକ୍ଷର ମୁକୁଟ ସିଂ ଆହତ ହୋଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଂଚି ସେମାନଙ୍କୁ ତୁରନ୍ତ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଇଥିଲା । ହେଲେ ବିକେଶର ଅବସ୍ଥା ଗୁରୁତର ହେବାରୁ ତାକୁ ଆଗ୍ରା ସ୍ଥାନାନ୍ତର କରିବା ପାଇଁ ଡାକ୍ତର କହିଥିଲେ । ହେଲେ ବାଟରେ ତାଙ୍କର ମୃତ୍ୟୁ ହୋଇଥିଲା । ଗାଁ ଲୋକଙ୍କ କହିବାନୁସାରେ, ୧ ବର୍ଷ ଧରି ଦୁଇ ଭାଇଙ୍କ ମଧ୍ୟରେ ଜମିବାଡିକୁ ନେଇ ବିବାଦ ଲାଗି ରହିଛି । ତେବେ ଅଭିଯୁକ୍ତକୁ ତୁରନ୍ତ ଗିରଫ କରାଯିବ ବୋଲି ପୋଲିସ କହିଛି ।
ପାଣି ଛିଟା ପଡିବା ନେଇ ଦୁଇ ପରିବାର ମଧ୍ୟରେ ସଂଘର୍ଷ, ୧୮ ବର୍ଷୀୟ ଯୁବକର ହତ୍ୟା, ପଢନ୍ତୁ ସଂପୂର୍ଣ୍ଣ ଘଟଣା
