ବିଜେପି ଅଧକ୍ଷ ଜେପି ନଡ୍ଡାଙ୍କୁ ଭେଟିଲେ ଅଭିନେତ୍ରୀ କଙ୍ଗନା

ନୂଆଦିଲ୍ଲୀ: ହିମାଚଳ ପ୍ରଦେଶର ମଣ୍ଡିରୁ ବିଜେପିର ପ୍ରାର୍ଥୀ ହୋଇଛନ୍ତି ଜଣାଶୁଣା ବଲିଉଡ ଅଭିନେତ୍ରୀ କଙ୍ଗନା ରାନାୱତ | ତେବେ କଙ୍ଗନା ମଙ୍ଗଳବାର ବିଜେପି ଅଧ୍ୟକ୍ଷ ଜଗତ ପ୍ରକାଶ ନଡ୍ଡାଙ୍କୁ ଭେଟିଛନ୍ତି | ଏହି ସମୟରେ ଦଳ ତାଙ୍କୁ ଏକ ବାର୍ତ୍ତା ଦେଇଥିଲା ଯେ ପାର୍ଟି ତାଙ୍କ ସହ ଦୃଢ ଭାବରେ ଠିଆ ହୋଇଛି । ଦିଲ୍ଲୀରେ ବିଜେପି ଅଧ୍ୟକ୍ଷଙ୍କ ବାସଭବନରେ ଅନୁଷ୍ଠିତ ଏହି ବୈଠକ ପ୍ରାୟ ୫୦ ମିନିଟ୍ ଧରି ଚାଲିଥିଲା। ଏହାପୂର୍ବରୁ ମଙ୍ଗଳବାର ଅପରାହ୍ନରେ କଙ୍ଗନା କହିଥିଲେ ଯେ ବିଜେପି ସଭାପତି ଜେପି ନଡ୍ଡା ତାଙ୍କୁ ଦିଲ୍ଲୀ ଡାକିଛନ୍ତି। ବୈଠକ ପରେ କଙ୍ଗନା ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଜେପି ନଡ୍ଡାଙ୍କ ସହ ଏକ ଫଟୋ ସେୟାର କରି ଏକ ପୋଷ୍ଟ କରିଥିଲେ।ଏହି ପୋଷ୍ଟରେ ସେ ଲେଖିଛନ୍ତି, “ଆଜି ମୁଁ ରାଷ୍ଟ୍ରୀୟ ଅଧ୍ୟକ୍ଷ ଜଗତ ପ୍ରକାଶ ନଡ୍ଡା ଜୀଙ୍କୁ ଭେଟିଥିଲି। ତାଙ୍କ ମାର୍ଗଦର୍ଶନ ଏବଂ ସମର୍ଥନ ପାଇଁ ମୁଁ ସର୍ବଦା କୃତଜ୍ଞ, ମୁଁ ମୋ ଅଞ୍ଚଳ ମଣ୍ଡିର ପ୍ରଗତି ତଥା ସମୃଦ୍ଧତା ପାଇଁ କଠିନ ପରିଶ୍ରମ କରିବି। ସେହିପରି କଂଗ୍ରେସ ମୁଖପାତ୍ର ସୁପ୍ରିୟା ଶ୍ରୀନେତଙ୍କ ସୋସିଆଲ ମିଡିଆ ପୋଷ୍ଟକୁ ନେଇ କଙ୍ଗନା କହିଛନ୍ତି ଯେ ସେ ଏହାର ଉତ୍ତର ଦେଇଛନ୍ତି। ଏହି ପ୍ରସଙ୍ଗରେ ଆଇନଗତ କାର୍ଯ୍ୟାନୁଷ୍ଠାନ କିମ୍ବା ଅନ୍ୟାନ୍ୟ ବିଷୟ ଉପରେ କଙ୍ଗନା କହିଛନ୍ତି ଯେ ବର୍ତ୍ତମାନ ସେ ବିଜେପିରେ ଅଛନ୍ତି ଏବଂ ତାଙ୍କୁ ଦଳର ନିର୍ଦ୍ଦେଶ ପାଳନ କରିବାକୁ ପଡ଼ିବ। ଉଲ୍ଲେଖ ଥାଉ କି ୨୦୨୪ ଲୋକସଭା ନିର୍ବାଚନ ପାଇଁ ବିଜେପି ୧୧୧ ଜଣ ପ୍ରାର୍ଥୀଙ୍କ ପଞ୍ଚମ ତାଲିକାରେ ବଲିଉଡ ଅଭିନେତ୍ରୀ କଙ୍ଗନା ରାନାୱତଙ୍କୁ ଟିକେଟ ଦିଆଯାଇଥିଲା । ସେ ହିମାଚଳପ୍ରଦେଶର ମଣ୍ଡିରୁ ନିର୍ବାଚନ ଲଢ଼ିବେ ।