ନୂଆଦିଲ୍ଲୀ: ମଧ୍ୟ-ପ୍ରାଚ୍ୟରେ ଲାଗିରହିଥିବା ଉତ୍ତେଜନା ଏବଂ ହରମୁଜ୍ ଜଳପଥରେ ସମସ୍ୟା ଯୋଗୁଁ ତୈଳ ଓ ଗ୍ୟାସ୍ ଯୋଗାଣ ବାଧାପ୍ରାପ୍ତ ହୋଇଛି ଏଥିରେ କୌଣସି ସନ୍ଦେହ ନାହିଁ । କିନ୍ତୁ ଏହାରି ଭିତରେ ଏକ ବଡ଼ ଆଶ୍ୱସ୍ତିକର ଖବର ଦେଇଛନ୍ତି କେନ୍ଦ୍ର ସରକାର । ଭାରତ ସରକାରଙ୍କ ସତର୍କ ଏବଂ ଦୂରଦୃଷ୍ଟିସମ୍ପନ୍ନ ପଦକ୍ଷେପ ଯୋଗୁଁ ଦେଶରେ ଏଲପିଜି ସମସ୍ୟା ଶୀଘ୍ର ଶେଷ ହୋଇପାରେ । ଏହାର ଅର୍ଥ ଆପଣଙ୍କ ରୋଷେଇ ଘର ଯେମିତି ସୁରୁଖୁରୁରେ ଚାଲିବ, ତାହା ସୁନିଶ୍ଚିତ କରିବା ପାଇଁ ସରକାର ଏବେ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟ କରୁଛନ୍ତି ।
ବିଶ୍ୱ ବଜାରରେ କଞ୍ଚାତୈଳ ଓ ଗ୍ୟାସ୍ର ଚାପ ଥିଲେ ମଧ୍ୟ ଭାରତ ନିଜର ଆବଶ୍ୟକତା ପୂରଣ କରିବାରେ କିଛି ମାତ୍ରାରେ ବେଶ୍ ସଫଳ ହୋଇଛି । ପୂର୍ବରୁ ଦେଶ ନିଜର ଏଲ୍.ପି.ଜି. ଆବଶ୍ୟକତାର ପ୍ରାୟ ୯୦ ପ୍ରତିଶତ କେବଳ ଉପସାଗରୀୟ ଦେଶଗୁଡ଼ିକ ଉପରେ ନିର୍ଭର କରୁଥିଲା । କିନ୍ତୁ ଏବେ ସରକାର ଏହି ଏକପାଖିଆ ନିର୍ଭରଶୀଳତା କମାଇବା ପାଇଁ ଏକ ସୁଚିନ୍ତିତ ‘ପ୍ଲାନ୍-ବି’ କାର୍ଯ୍ୟକାରୀ କରିଛନ୍ତି । ଏହି ଯୋଜନା ଅନୁଯାୟୀ, ଦେଶର ଘରୋଇ ଏଲ୍.ପି.ଜି. ଉତ୍ପାଦନକୁ ପ୍ରାୟ ୨୦ ପ୍ରତିଶତ ବୃଦ୍ଧି କରାଯାଇଛି, ଯାହା ଏବେ ୪୬,୦୦୦ ଟନ୍ରେ ପହଞ୍ଚିଛି । ଏହାଦ୍ୱାରା ଦେଶର ଆଭ୍ୟନ୍ତରୀଣ ଚାହିଦାକୁ ବଜାୟ ରଖିବାରେ ବଡ଼ ସହାୟତା ମିଳିଛି ।
ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଗ୍ୟାସ୍ ଆମଦାନୀ ପାଇଁ ଭାରତ ଏବେ କେବଳ ୧୦ଟି ଦେଶ ନୁହେଁ, ବରଂ ୧୫ଟି ଭିନ୍ନ ଭିନ୍ନ ଦେଶ ଉପରେ ନିର୍ଭର କରୁଛି । ଏହି ତାଲିକାରେ ଆମେରିକା, ନରୱେ, କାନାଡ଼ା, ଅଲଜେରିଆ ଓ ରୁଷିଆ ଭଳି ଶକ୍ତିଶାଳୀ ରାଷ୍ଟ୍ରଗୁଡ଼ିକ ସାମିଲ ଅଛନ୍ତି । ଏହାଛଡ଼ା, ସରକାରୀ ତୈଳ କମ୍ପାନିଗୁଡ଼ିକ ଅନ୍ତର୍ଜାତୀୟ ବଜାରରୁ ସିଧାସଳଖ ‘ସ୍ପଟ୍ ମାର୍କେଟ’ ମାଧ୍ୟମରେ ଗ୍ୟାସ୍ କାର୍ଗୋ କିଣିବା ଆରମ୍ଭ କରିଛନ୍ତି, ଯାହା ଆସନ୍ତା ଜୁନ୍ ଓ ଜୁଲାଇ ମାସ ସୁଦ୍ଧା ଦେଶରେ ପହଞ୍ଚିବ । ପେଟ୍ରୋଲିୟମ ମନ୍ତ୍ରଣାଳୟର ସୂଚନା ଅନୁଯାୟୀ, ଦେଶରେ ଏଲ୍.ପି.ଜି. ଯୋଗାଣକୁ ସୁନିଶ୍ଚିତ କରିବା ପାଇଁ ପ୍ରାୟ ୮ ଲକ୍ଷ ଟନ୍ ଏଲ୍.ପି.ଜି. କାର୍ଗୋ ପୂର୍ବରୁ ସୁରକ୍ଷିତ କରାଯାଇଛି ।
