ମଦ ବିକ୍ରିକୁ ବିରୋଧ କରି ଶ୍ୱଶୁର – ବୋହୂ ଲହୁଲୁହାଣ

ନାଉଗାଁ : ନାଉଗାଁ ଥାନା ନନ୍ଦିଗ୍ରାମରେ ଚୋରାମଦ କାରବାରକୁ ବିରୋଧ କରିବାରୁ ଶ୍ୱଶୁର ଓ ବୋହୂଙ୍କୁ ଆକ୍ରମଣ କରାଯାଇଥିବା ଥାନାରେ ଲିଖିତ ଅଭିଯୋଗ ହୋଇଛି । ଅଭିଯୋଗ ଅନୁସାରେ ଉକ୍ତ ଗ୍ରାମର ନରୋତ୍ତମ ରାଉଳଙ୍କ ପଡ଼ୋଶୀ ରମେଶ ରାଉଳଙ୍କ ପରିବାର ଦୀର୍ଘଦିନ ଧରି ଗ୍ରାମରେ ଚୋରାମଦ କାରବାର କରି ଆସୁଛନ୍ତି । ଏହା ଦ୍ୱାରା ପ୍ରତ୍ୟହ ନିଶାଶକ୍ତ ବ୍ୟକ୍ତିମାନେ ଏଠାରେ ମଦ କିଣିବାକୁ ଆସି ଅସଭ୍ୟ ଭାଷାରେ କଥାବାର୍ତ୍ତା ହେଉଥିବା ନେଇ ନରୋତ୍ତମଙ୍କ ବୋହୂ ପ୍ରଗତି ଏଠାରେ ମଦ ବିକ୍ରି କରିବାକୁ ବାରଣ କରିବାରୁ ରମେଶଙ୍କ ପରିବାର ଲୋକମାନେ ମିଳିତ ଭାବରେ ତାଙ୍କୁ ଅଶ୍ଲୀଳ ଭାଷାରେ ଗାଳିଗୁଳଜ ସହିତ ତାଙ୍କୁ ମାରି ଟଣାଘୋଷରା କରିଥିଲେ । ଏହାକୁ ନରୋତ୍ତମ ବାରଣ କରିବାରୁ ଅପରପକ୍ଷ ଏକ କାଠଫାଳିଆରେ ନରୋତ୍ତମଙ୍କ ପିଟି ଦେବାରୁ ତାଙ୍କ ମୁହଁଫାଟି ପ୍ରଚୁର ରକ୍ତସ୍ରାବ ହୋଇଥିଲା । ଫଳରେ ଗ୍ରାମବାସୀ ତାଙ୍କୁ ୧୦୮ ଆମ୍ବୁଲାନ୍ସ ଯୋଗେ ନାଉଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ପରେ ନରୋତ୍ତମଙ୍କ ବୋହୂ ପ୍ରଗତି ଏହି ଘଟଣାକୁ ନେଇ ନାଉଗାଁ ଥାନାରେ ଏକ ଲିଖିତ ଅଭିଯୋଗ କରିବାପରେ ଅଭିଯୋଗକୁ ଭିତ୍ତିକରି ଥାନାରେ ଏକ ମାମଲା ରୁଜୁ କରାଯିବା ସହିତ ଘଟଣାର ଅଧିକ ତଦନ୍ତ କରାଯାଉଥିବା ଥାନା ଅଧିକାରୀ ସୂଚନା ଦେଇଛନ୍ତି ।