ହାତ ଭାଙ୍ଗିବାରୁ ସହାୟକ ନିର୍ଦ୍ଦେଶକ ହସ୍ପିଟାଲରେ ଭର୍ତ୍ତି
ପାର୍ଟିଅଫିସ୍ ସଟର୍ ବନ୍ଦକରି ଚୌକିରେ ପିଟିଦେଲେ
ଭୁବନେଶ୍ୱର: କେନ୍ଦ୍ର ଜଳଶକ୍ତି ଓ ଆଦିବାସୀ କଲ୍ୟାଣ ରାଷ୍ଟ୍ରମନ୍ତ୍ରୀ ତଥା ମୟୁରଭଞ୍ଜ ସାଂସଦ ବିଶେଶ୍ୱର ଟୁଡୁଙ୍କ ବିରୋଧରେ ସାଙ୍ଘାତିକ ଅଭିଯୋଗ ହୋଇଛି । ମୟୁରଭଞ୍ଜ ଜିଲ୍ଲା ଯୋଜନାବୋର୍ଡ଼ର ନିର୍ଦ୍ଦେଶକ ଓ ସହାୟକ ନିର୍ଦ୍ଦେଶକଙ୍କୁ ସମୀକ୍ଷା କରିବାକୁ ବିଜେପି ପାର୍ଟି ଅଫିସକୁ ଡ଼ାକି ଆକ୍ରମଣ କରିଛନ୍ତି । ଏଥିରେ ସହାୟକ ନିର୍ଦ୍ଦେଶକ ଦେବାଶିଷ ମହାପାତ୍ରଙ୍କ ହାତ ଭାଙ୍ଗିଯାଇଥିବାବେଳେ ନିର୍ଦ୍ଦେଶକ ଅଶ୍ୱିନୀ ମଲ୍ଲିକ ଅଳ୍ପକେ ବର୍ତ୍ତିଯାଇଛନ୍ତି । ଉଭୟଙ୍କୁ ବାରିପଦା ମେଡ଼ିକାଲ କଲେଜ ଓ ଚିକିତ୍ସାଳୟରେ ଭର୍ତ୍ତିି କରାଯାଇଛି । ଅନ୍ୟପକ୍ଷେ ଏହି ଅଭିଯୋଗକୁ ମନ୍ତ୍ରୀ ଖଣ୍ଡନ କରି କହିଛନ୍ତି, ମୋ ବିରୋଧରେ ଅଭିଯୋଗ ସଂପୂର୍ଣ୍ଣ ମିଥ୍ୟା । ନିର୍ବାଚନ ଥିବାରୁ ବଦ୍ନାମ କରିବା ପାଇଁ ଷଡ଼ଯନ୍ତ୍ର କରାଯାଇଛି । ସେମାନେ ସମୀକ୍ଷା କରିବାକୁ ଆସିଥିଲେ । ମୁଁ କାର୍ଯ୍ୟରେ ବ୍ୟସ୍ତ ଥିବାରୁ ମନା କରିଥିଲି । ପରେ ସେମାନେ ଫେରିଯାଇଥିଲେ ବୋଲି ଶ୍ରୀ ଟୁଡୁ କହିଛନ୍ତି ।
ଅଭିଯୋଗ ଅନୁସାରେ, ଜିଲ୍ଲାର ଉନ୍ନୟନ ମୂଳକ କାର୍ଯ୍ୟ ସମ୍ପର୍କରେ ସମୀକ୍ଷା କରିବା ପାଇଁ ମନ୍ତ୍ରୀ ମନ ବଳାଇଥିଲେ । ଏନେଇ ମନ୍ତ୍ରୀଙ୍କ ଅଫିସ ପକ୍ଷରୁ ଯୋଜନାବୋର୍ଡ଼ର ନିର୍ଦ୍ଦେଶକଙ୍କୁ ଯୋଗାଯୋଗ କରାଯାଇଥିଲା । ତେବେ ଯୋଜନାବୋର୍ଡ଼ ପକ୍ଷରୁ ନିର୍ଦ୍ଦେଶକ ଓ ସହାୟକ ନିର୍ଦ୍ଦେଶକ ମନ୍ତ୍ରୀଙ୍କ ପାଖକୁ ଯିବା ପାଇଁ ନିଷ୍ପତି ହୋଇଥିଲା । ସେମାନଙ୍କୁ ପ୍ରଥମେ ଜିଲ୍ଲା ସର୍କିଟ୍ ହାଉସ୍କୁ ଡକାଯାଇଥିଲା । ହେଲେ ପରେ କୌଣସି କାରଣକୁ ନେଇ ଦଳୀୟ କାର୍ଯ୍ୟାଳୟକୁ ଡକାଯାଇଥିଲା । ଏହି ଦୁଇ ଅଧିକାରୀ ଅଫିସ୍ରେ ସମୀକ୍ଷା କରାଯାଉ ବୋଲି କହିଥିଲେ । ହେଲେ ଏହି କଥାକୁ ନେଇ ମନ୍ତ୍ରୀ ବିଶ୍ୱେଶ୍ୱର ଟୁଡୁ ସେମାନଙ୍କ ଉପରେ ବିରକ୍ତି ପ୍ରକାଶ କରିଥିଲେ । ତେଣୁ ଶୁକ୍ରବାର ଯେତେବେଳେ ଏହି ଦୁଇ ଅଧିକାରୀ ମନ୍ତ୍ରୀଙ୍କ ଦଳୀୟ କାର୍ଯ୍ୟାଳୟରେ ପହଞ୍ଚିଥିଲେ । ସେହି କଥାକୁ ନେଇ ପ୍ରଥମେ ସାମାନ୍ୟ ଯୁକ୍ତିତର୍କ ହୋଇଥିଲା । ପ୍ରୋଟୋକଲ ଜଣାନାହିଁ କହି ମନ୍ତ୍ରୀ ଚିହିଁକି ଉଠିବା ସହିତ ସେମାନଙ୍କୁ ମାଡ଼ ମାରିଥିଲେ ।
ଏସମ୍ପର୍କରେ ଆହତ ସହାୟକ ନିର୍ଦ୍ଦେଶକ ଦେବାଶିଷ ମହାପାତ୍ର କହିଛନ୍ତି, ମନ୍ତ୍ରୀ ଆମକୁ ପ୍ରୋଟୋକଲ ଜଣାନାହିଁ ବୋଲି କହିଥିଲେ । ଆମେ କହିଥିଲୁ, ନିର୍ବାଚନ ସମୟରେ ଫାଇଲ୍ ଧରି ଏଠାକୁ ଆସିବା ବି ଠିକ୍ ନୁହେଁ । ଏତିକିରେ ସେ ରାଗି ଯାଇଥିଲେ । ପରେ ଜଣଙ୍କୁ ଦଳୀୟ କାର୍ଯ୍ୟାଳୟର ସଟର୍ ବନ୍ଦ କରିବାକୁ କହିଥିଲେ । ଏହାପରେ ସେ ପ୍ରଥମେ ଏକ ଲୁହାରଡ୍ ଉଠାଇଥିଲେ । ପରେ ଏକ ପ୍ଲାଷ୍ଟିକ୍ ଚୌକିରେ ମୋତେ ପିଟିଥିଲେ । ନିର୍ଦ୍ଦେଶକ ସାର୍ ମନ୍ତ୍ରୀଙ୍କୁ ଅଟକାଇବାକୁ ଉଦ୍ୟମ କରିଥିଲେ । ଏହାପରେ ସେ ତାଙ୍କୁ ବି ମାଡ଼ ମାରିଥିଲେ । ଯେଉଁ ଚୌକିରେ ଆମକୁ ପିଟିଥିଲେ, ତାକୁ ସେ ପୂରା ଭାଙ୍ଗି ଦେଇଛନ୍ତି । ଏନେଇ କେନ୍ଦ୍ରମନ୍ତ୍ରୀଙ୍କ ନାମରେ ବାରିପଦା ଟାଉନ୍ ଥାନାରେ ଏକ ମାମଲା ରୁଜୁ ହୋଇଛି ।