ନୂଆଦିଲ୍ଲୀ: ହିଂସାକାଣ୍ଡ ଉପୁଜିଥିବା ବାଂଲାଦେଶରେ “ଅସ୍ଥିର ପରିସ୍ଥିତି” କାରଣରୁ ସେଠାରେ ଥିବା ସମସ୍ତ ଭାରତୀୟ ଭିସା ଆବେଦନ କେନ୍ଦ୍ରକୁ ବନ୍ଦ କରାଯାଇଥିବା ସୂଚନା ରହିଛି । ଭାରତୀୟ ଭିସା ଆବେଦନ କେନ୍ଦ୍ର ୱେବସାଇଟରେ ଆବେଦନକାରୀଙ୍କୁ ସୂଚନା ଦିଆଯାଇଛି ଯେ ପରବର୍ତ୍ତୀ ତାରିଖ ଏସଏମଏସ ମାଧ୍ୟମରେ ଜଣାଯିବ ଏବଂ ପରବର୍ତ୍ତୀ କାର୍ଯ୍ୟ ଦିବସରେ ପାସପୋର୍ଟ ସଂଗ୍ରହ କରାଯିବା ଉଚିତ । ଅସ୍ଥିର ପରିସ୍ଥିତି ହେତୁ ପରବର୍ତ୍ତୀ ସୂଚନା ତାରିଖ ପର୍ଯ୍ୟନ୍ତ ସମସ୍ତ ଭାରତୀୟ ଭିସା ଆବେଦନ କେନ୍ଦ୍ର ବନ୍ଦ ରହିବ ।
ପରବର୍ତ୍ତୀ ଆବେଦନ ତାରିଖ ଏସଏମଏସ ମାଧ୍ୟମରେ ଜଣାଯିବ ଏବଂ ପରବର୍ତ୍ତୀ କାର୍ଯ୍ୟ ଦିବସରେ ପାସପୋର୍ଟ ନେବାକୁ ଅନୁରୋଧ କରାଯାଇଛି ବୋଲି ଏକ ବିଜ୍ଞପ୍ତିରେ କୁହାଯାଇଛି । ସୋମବାର ଶେଖ ହସିନାଙ୍କ ନେତୃତ୍ୱାଧୀନ ସରକାରର ପତନ ପରେ ଢାକାରେ ଥିବା ଭାରତୀୟ ଉଚ୍ଚ ଆୟୋଗରୁ ୧୯୦ କର୍ମଚାରୀ ଏବଂ ସେମାନଙ୍କ ପରିବାର ସଦସ୍ୟଙ୍କୁ ସ୍ଥାନାନ୍ତର କରିବା ପରେ ଏହି ଘୋଷଣା କରାଯାଇଛି ।
ତେବେ ସମସ୍ତ କୂଟନୀତିଜ୍ଞ ବାଂଲାଦେଶରେ ରହିଛନ୍ତି ଏବଂ ମିଶନଗୁଡିକ କାର୍ଯ୍ୟକ୍ଷମ ବୋଲି ସୂତ୍ରରୁ ପ୍ରକାଶ । ଅଶାନ୍ତି ପରିବେଶ ଜାରି ରଖିଥିବା ବେଳେ ବାଂଲାଦେଶ ଆଜି ନୋବେଲ ବିଜେତା ମହମ୍ମଦ ୟୁନୁସଙ୍କ ନେତୃତ୍ୱରେ ମଧ୍ୟବର୍ତ୍ତୀକାଳୀନ ସରକାର ଗଠନ କରିବ । ଚିକିତ୍ସା ପ୍ରକ୍ରିୟା ପାଇଁ ପ୍ୟାରିସରେ ଥିବା ୮୪ ବର୍ଷୀୟ ୟନୁସ ଏବେ ଢାକା ଅଭିମୁଖେ ଯାଉଛନ୍ତି । ଦେଶର ସାମରିକ ମୁଖ୍ୟ କହିଛନ୍ତି ଯେ କାର୍ଯ୍ୟନିର୍ବାହୀ ସରକାର ଆଜି ରାତି ୮ଟାରେ ଶପଥ ଗ୍ରହଣ କରିବେ ।
