ବଲାଙ୍ଗୀର : ରାସ୍ତାରେ ଯାଉଥିବା ୩ ଯୁବତୀଙ୍କ ଉପରେ କାର ଚଢାଇ ଦେଇଛି ମଦ୍ୟପ ଢାବା ମାଲିକ । ଫଳରେ ଜଣେ ଯୁବତୀଙ୍କର ମୃତ୍ୟୁ ଘଟିଥିବା ବେଳେ ୨ ଜଣ ଗୁରୁତର ହୋଇଛନ୍ତି । ଆଜି ସନ୍ଧ୍ୟା ବେଳେ ଏପରି ମର୍ମନ୍ତୁଦ ସଡ଼କ ଦୁର୍ଘଟଣା ବଲାଙ୍ଗୀର ଜିଲ୍ଲାରେ ଘଟିଛି । ଏହି ଘଟଣାକୁ ନେଇ ଦୁର୍ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଛି । ଅଭିଯୁକ୍ତଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବିରେ ପାଟଣାଗଡ଼-କଣ୍ଟାବାଞ୍ଜି ରାଜ୍ୟ ରାଜପଥ ଅବରୋଧ କରିଛନ୍ତି ଉତ୍ତ୍ୟକ୍ତ ଲୋକେ ।
ପାଟଣାଗଡ଼-କଣ୍ଟାବାଞ୍ଜି ରାଜ୍ୟ ରାଜପଥ ପାର୍ଶ୍ୱରେ ରହିଛି ସୁଶୀଳ କୁମାର ସହୁଙ୍କ ଢାବା । ଆଜି ସନ୍ଧ୍ୟା ବେଳେ ସେ ମଦ୍ୟପାନ କରିଥିବା ଅବସ୍ଥାରେ ଢାବାରୁ ନିଜ ନୂଆ କାର୍ ଚଲାଇ ଦ୍ରୁତ ଗତିରେ ଘରକୁ ଫେରୁଥିବା ବେଳେ ବେଲପଡ଼ା ନୁନ୍ହାଟ ଗାଁର ୩ ଜଣ ଯୁବତୀ ବୋଲେଶ୍ୱରୀ ମାଝୀ, ପ୍ରତିମା ମାଝୀ ଓ ଦେମତି ମଝୀଙ୍କ ଉପରେ ଚଢ଼ାଇ ଦେଇଥିଲେ । ଫଳରେ ଯୁବତୀମାନେ ଗୁରୁତର ଆହତ ହୋଇଥିଲେ । ସେମାନଙ୍କୁ ଉଦ୍ଧାର କରାଯାଇ ସ୍ଥାନୀୟ ମେଡିକାଲ୍ରେ ଭର୍ତ୍ତି କରାଯାଇଥିଲା ।
ସେଠାରେ ସେମାନଙ୍କ ସ୍ୱାସ୍ଥ୍ୟ ଅବସ୍ଥା ଗୁରୁତର ହେବାରୁ ଭୀମଭୋଇ ମେଡ଼ିକାଲ୍ କଲେଜ ଆଣ୍ଡ ହସ୍ପିଟାଲକୁ ସ୍ଥାନାନ୍ତରିତ କରାଯାଇଛି । ସେମାନଙ୍କ ଭିତରେ ବୋଲେଶ୍ୱରୀଙ୍କ ସ୍ୱାସ୍ଥ୍ୟ ଅବସ୍ଥା ସଙ୍କଟାପନ୍ନ ରହିଥିଲା । ପରେ ତାଙ୍କର ମୃତ୍ୟୁ ଘଟିଛି । କାର୍ଟି ୩ ଯୁବତୀଙ୍କୁ ଧକ୍କା ଦେଇ ରାସ୍ତା ପାର୍ଶ୍ୱରେ ଥିବା ବିଦ୍ୟୁତ ଖୁଣ୍ଟରେ ପିଟି ହୋଇଯାଇଥିଲା । ଦୁର୍ଘଟଣା ପରେ ସୁଶୀଳ କାର୍ ଛାଡ଼ି ପଳାଇ ଯାଇଥିଲା । ଏହି ଘଟଣା ପରେ ଉତ୍ତେଜନା ପ୍ରକାଶ ପାଇଥିଲା । ଉତ୍ତ୍ୟକ୍ତ ଲୋକେ କଣ୍ଟାବାଞ୍ଜି-ପାଟଣାଗଡ଼ ରାଜ୍ୟ ରାଜପଥକୁ ଅବରୋଧ କରିଥିଲେ । ଯାହାଫଳରେ ଗାଡ଼ି ଚଳାଚଳ ଏକ ପ୍ରକାର ଠପ୍ ହୋଇଯାଇଥିଲା । ଦୁର୍ଘଟଣା ଘଟାଇଥିବା କାର୍ ଚାଳକଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଓ ଗୁରୁତର ଆହତ ଯୁବତୀଙ୍କୁ ଚିକିତ୍ସା ସେବା ଯୋଗାଇଦେବାକୁ ଦାବିରେ ସେମାନେ ରାସ୍ତା ଅବରୋଧ କରିଥିଲେ । ଘଟଣା ସ୍ଥଳରେ ପୁଲିସ୍ ପହଞ୍ଚି ବୁଝାସୁଝା କରିଥିଲା । ପରେ ସେମାନେ ରାସ୍ତାରୁ ହଟି ଯାଇଥିଲେ ।
