୭୪ ଦେଶରେ ମାଇକ୍ରୋସଫ୍ଟ ସେବାରେ ବିଭ୍ରାଟ

ନୂଆଦିଲ୍ଲୀ: ବିଶ୍ୱର ୭୪ଟି ଦେଶରେ ମାଇକ୍ରୋସଫ୍ଟର ବିଭିନ୍ନ ଡିଜିଟାଲ୍‌ ସେବାରେ ଦେଖାଦେଇଥିବା ବିଭ୍ରାଟ ଦ୍ୱିତୀୟ ଦିନରେ ମଧ୍ୟ ଜାରି ରହିଛି। ଏହାଦ୍ୱାରା ହଜାର ହଜାର ବ୍ୟବହାରକାରୀ ଅସୁବିଧାରେ ସାମନା କରୁଛନ୍ତି। ମାଇକ୍ରୋସଫ୍ଟ ୩୬୫, ଆଉଟଲୁକ୍‌, ଟିମ୍‌ସ ଓ କୋପାଇଲଟ୍‌ ଭଳି ସେବା ବ୍ୟବହାର କରିବାରେ ସମସ୍ୟା ହେଉଛି। ଗୁରୁବାର ନଭେମ୍ବର ୧୨ରୁ ଏହି ସମସ୍ୟା ଆରମ୍ଭ ହୋଇଥିବା ବେଳେ ଶୁକ୍ରବାର ସୁଦ୍ଧା ଏହାର ସମ୍ପୂର୍ଣ୍ଣ ସମାଧାନ ହୋଇପାରିନାହିଁ।ଏହି ବିଭ୍ରାଟ ଯୋଗୁଁ ଅନେକ ଉପଭୋକ୍ତା ନିଜ ଇ-ମେଲ୍‌ ଖୋଲିବା, ଇ-ମେଲ୍‌ ପଠାଇବା ଓ ଗ୍ରହଣ କରିବାରେ ସମସ୍ୟା କରୁଛନ୍ତି। ୱାର୍ଡ, ଏକ୍ସେଲ୍‌, ପାୱାରପଏଣ୍ଟ, ସେୟାରପଏଣ୍ଟ ଓ ୱାନ୍‌ଡ୍ରାଇଭ୍‌ ଭଳି ସେବା ମଧ୍ୟ ପ୍ରଭାବିତ ହୋଇଛି। ଟିମ୍‌ସରେ ଅନଲାଇନ୍‌ ବୈଠକ ଓ ମେସେଜ୍‌ ପଠାଇବା ଭଳି ମୁଖ୍ୟ ସୁବିଧା ଅଧିକାଂଶ କ୍ଷେତ୍ରରେ କାମ କରୁଥିଲେ ମଧ୍ୟ ବୈଠକର ସମୟ ନିର୍ଦ୍ଧାରଣ ଓ କ୍ୟାଲେଣ୍ଡର ବ୍ୟବହାରରେ ସମସ୍ୟା ହେଉଛି। ଓପନ୍‌ଏଆଇ ଓ ଆନ୍ଥ୍ରୋପିକ୍‌ର ଏଆଇ ସେବା ମଧ୍ୟ ଏହାଦ୍ୱାରା ପ୍ରଭାବିତ ହୋଇଛି। ଚାଟ୍‌ଜିପିଟି ଓ କ୍ଲଡ୍‌ ଭଳି ଏଆଇ ଟୁଲ୍‌ର କେତେକ ସୁବିଧା ଠିକ୍‌ ଭାବେ କାମ କରୁନାହିଁ। ଭାରତରେ ମଧ୍ୟ ଏହାର ପ୍ରଭାବ ପଡ଼ିଛି। ଇଣ୍ଡିଗୋ ବିମାନ କମ୍ପାନିର ଇମେଲ୍‌ ଗ୍ରାହକ ସେବା ମଧ୍ୟ ପ୍ରଭାବିତ ହୋଇଥିବା ଜଣାଇଛି।