ଶ୍ରୀନଗର: ଜମ୍ମୁ କଶ୍ମୀରରେ ଭୟଙ୍କର ସଡକ ଦୁର୍ଘଟଣା । ସୋମବାର ଦିନ ଜମ୍ମୁ ଓ କାଶ୍ମୀରର କାଗୋର୍ଟ ନିକଟରେ ରାମନଗର- ଉଧମପୁର ରାଜପଥରେ ଏକ ଯାତ୍ରୀବାହୀବସ ଓଲଟି ପଡିବାରୁ ୨୧ ଜଣଙ୍କ ମୃତ୍ୟୁ ହୋଇଥିବା ବେଳେ ୨୯ ଜଣ ଆହତ ହୋଇଥିବା ନେଇ ଜଣେ ଅଧିକାରୀ କହିଛନ୍ତି । ଉଦ୍ଧାର କାଯ୍ୟ ପାଇଁ କର୍ତ୍ତୃପକ୍ଷ ଘଟଣା ସ୍ଥଳରେ ପହଞ୍ଚିଛନ୍ତି । ସ୍ଥାନୀୟ ଲୋକଙ୍କ କହିବା ଅନୁସାରେ ରାମ ନଗର ଅଞ୍ଚଳର କାଗୋର୍ଟ ଗାଁ ନିକଟରେ ଡ୍ରାଇଭର ଗାଡିର ନିୟନ୍ତ୍ରଣ ହରାଇବାରୁ ରାସ୍ତାରୁ ଶହେ ଫୁଟ ତଳକୁ ଖସିପଡିଥିଲା । ଫଳରେ ବସଟି ଓଲଟି ପଡିଥିଲା । ଓଲଟିବା ଫଳରେ ୨୧ଜଣ ଯାତ୍ରୀଙ୍କ ମୃତ୍ୟୁ ହୋଇଥିଲା । ୨୯ ଜଣ ଆହତ ହୋଇଥିଲେ । ଗୋଟିଏ ଗାଁରୁ ଉଧମପୁର ଯାଉଥିବା ବସଟି ଦ୍ରୁତ ଗତିରେ ଆସିବାରୁ ଏହି ଦୁର୍ଘଟଣା ଘଟିଥିଲା । ସୂଚନା ପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । ସେଠାକାର ଏସଡିଏମ ଘଟଣାର ସୂଚନା ପାଇ ଆହତମାନଙ୍କୁ ଶୀଘ୍ର ଚିକିତ୍ସା ଯୋଗାଇବା ପାଇଁ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି । କେନ୍ଦ୍ରମନ୍ତ୍ରୀ ଡକ୍ଟର ଜିତେନ୍ଦ୍ର ସିଂହ ମଧ୍ୟ ଦୁର୍ଘଟଣା ବିଷୟରେ ଉଧମପୁର ଜିଲ୍ଲା କମିଶନର (ଡିସି) ମିଙ୍ଗା ଶେର୍ପାଙ୍କ ସହ କଥା ହୋଇ ଘଟଣା ଉପରେ ଦୁଃଖ ପ୍ରକାଶ କରିଛନ୍ତି। ଉଧମପୁରର ଲୋକସଭା ସାଂସଦ ସିଂହ କହିଛନ୍ତି ଯେ ପରିସ୍ଥିତି ସମୀକ୍ଷା କରିବା ପାଇଁ ସେ ସ୍ଥାନୀୟ କର୍ତ୍ତୃପକ୍ଷଙ୍କ ସହ ନିରନ୍ତର ଯୋଗାଯୋଗରେ ଅଛନ୍ତି।”ଉଦ୍ଧାର କାର୍ଯ୍ୟ ତୁରନ୍ତ ଆରମ୍ଭ କରାଯାଇଛି। ବହୁ କ୍ଷୟକ୍ଷତି ଆଶଙ୍କା କରାଯାଉଛି,” ସିଂହ ଟ୍ୱିଟର ରେ ପୋଷ୍ଟ କରିଛନ୍ତି। “ସମସ୍ତ ସମ୍ଭାବ୍ୟ ସହାୟତା ଯୋଗାଇ ଦିଆଯାଉଛି। ଆହତମାନଙ୍କୁ ଚିକିତ୍ସା ସହାୟତା ପାଇଁ ସ୍ଥାନାନ୍ତର କରାଯିବ। ଗୁରୁତର ଆହତମାନଙ୍କୁ ବିମାନରେ ସ୍ଥାନାନ୍ତର କରିବା ପାଇଁ ବ୍ୟବସ୍ଥା କରାଯାଉଛି।”ଜମ୍ମୁ ଏବଂ କାଶ୍ମୀରର ଉପରାଜ୍ୟପାଳ ମନୋଜ ସିହ୍ନା ମଧ୍ୟ ଦୁର୍ଘଟଣାରେ ଶୋକ ପ୍ରକାଶ କରିଛନ୍ତି ଏବଂ ଆହତମାନଙ୍କ ଶୀଘ୍ର ଆରୋଗ୍ୟ ପାଇଁ ପ୍ରାର୍ଥନା କରୁଛନ୍ତି ବୋଲି କହିଛନ୍ତି।
