ନୂଆଦିଲ୍ଲୀ: ଇରାନର କେନ୍ଦ୍ରୀୟ ସାମରିକ କମାଣ୍ଡ ସୋମବାର ଏକ ବିବୃତ୍ତି ଜାରି କରି ଚେତାବନୀ ଦେଇଛି ଯେ, ଯଦି ପ୍ରତିଦ୍ୱନ୍ଦୀ ଦେଶଗୁଡିକ ବେସାମରିକ ଲକ୍ଷ୍ୟସ୍ଥଳକୁ ଟାର୍ଗେଟ କରନ୍ତି ତେବେ ଆମେ ଭୟଙ୍କର ବାବେ ଜବାବ ଦେବୁ । ଏହି ଚେତାବନୀ ଏପରି ଏକ ସମୟରେ ଆସିଛି ଯେତେବେଳେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନର ବେସାମରିକ ଭିତ୍ତିଭୂମିକୁ ନଷ୍ଟ କରିବାକୁ ଧମକ ଦେଇଛନ୍ତି ।ଏହି ସମୟରେ, ଏକ ନୂତନ ରିପୋର୍ଟ ଅନୁଯାୟୀ, ଆମେରିକା, ଇରାନ ଏବଂ ଆଞ୍ଚଳିକ ମଧ୍ୟସ୍ଥତା ଗୋଷ୍ଠୀ ଏକ ସମ୍ଭାବ୍ୟ ୪୫ ଦିନିଆ ଅସ୍ତ୍ରବିରତିର ସର୍ତ୍ତାବଳୀ ଉପରେ ଆଲୋଚନା କରୁଛନ୍ତି। ମଧ୍ୟସ୍ଥିମାନେ ୪୫ ଦିନିଆ ଅସ୍ତ୍ରବିରତି ପାଇଁ ଶେଷ ପ୍ରୟାସ କରୁଛନ୍ତି। ଏହି ପ୍ରସ୍ତାବିତ ଅସ୍ତ୍ରବିରତିକୁ ସଂଘର୍ଷର ସ୍ଥାୟୀ ସମାଧାନ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବରେ ଦେଖାଯାଉଛି। ମଧ୍ୟସ୍ଥିମାନେ ଏକ ଅସ୍ତ୍ରବିରତି କାର୍ଯ୍ୟକାରୀ ହେବା ନିଶ୍ଚିତ କରିବା ପାଇଁ କାର୍ଯ୍ୟ କରୁଛନ୍ତି, ଯାହା ଏକ ସ୍ଥାୟୀ ଶାନ୍ତି ପାଇଁ ପଥ ପ୍ରଶସ୍ତ କରିବ।
ରିପୋର୍ଟ ଅନୁଯାୟୀ, ଆଲୋଚନାରେ ସାମିଲ ଥିବା ଆମେରିକୀୟ, ଇସ୍ରାଏଲୀ ଏବଂ ଆଞ୍ଚଳିକ ସୂତ୍ରଗୁଡ଼ିକ ଏହାକୁ ନିଶ୍ଚିତ କରିଛନ୍ତି। ସୂତ୍ରଗୁଡ଼ିକ କହିଛନ୍ତି ଯେ, ଆଗାମୀ ୪୮ ଘଣ୍ଟା ମଧ୍ୟରେ ଆଂଶିକ ଚୁକ୍ତି ହେବାର ସମ୍ଭାବନା ବହୁତ କମ୍। ତଥାପି, ଏହି ପ୍ରୟାସକୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି କାରଣ ଏହା ଏକ ପୂର୍ଣ୍ଣ-ସ୍ତରର ସଂଘର୍ଷକୁ ଏଡାଇବା ପାଇଁ ଶେଷ ସୁଯୋଗ ହୋଇପାରେ। ଟ୍ରମ୍ପଙ୍କ ଧମକ ଉପରେ ତୀବ୍ର ପ୍ରତିକ୍ରିୟା ପ୍ରକାଶ କରି ଇରାନର ବୈଦେଶିକ ମନ୍ତ୍ରଣାଳୟର ମୁଖପାତ୍ର ଏସମାଇଲ ବାଘାଇ କହିଛନ୍ତି ଯେ ତେହେରାନ ଯେକୌଣସି ଆକ୍ରମଣର ଦୃଢ଼ ଜବାବ ଦେବ। “ଆମର ସଶସ୍ତ୍ର ବାହିନୀ ସ୍ପଷ୍ଟ କରିଦେଇଛି ଯେ ଯଦି ଇରାନର ଭିତ୍ତିଭୂମି ଉପରେ ଆକ୍ରମଣ ହୁଏ, ତେବେ ଆମେ ମଧ୍ୟ ସେହିପରି ପ୍ରତିକ୍ରିୟା ଦେବୁ,” ସେ ଚେତାବନୀ ଦେଇ କହିଛନ୍ତି ଯେ ଆମେରିକା ସହିତ ଜଡିତ ଲକ୍ଷ୍ୟସ୍ଥଳଗୁଡ଼ିକୁ ମଧ୍ୟ ଆକ୍ରମଣ କରାଯାଇପାରେ।
