ଉତ୍ତର ପ୍ରଦେଶ: ମହୋବା ଜିଲ୍ଲାର ମହୋବାକାନ୍ତ ଥାନା ଅଞ୍ଚଳର ଝାନ୍ସୀ-ମିର୍ଜାପୁର ରାଜପଥରେ ଗତକାଲି ବିଳମ୍ବିତ ରାତିରେ ଏକ ଭୟଙ୍କର ସଡକ ଦୁର୍ଘଟଣା ଘଟିଛିା ଏକ ଦ୍ରୁତଗାମୀ ବାଇକ୍ ସହ ଟ୍ରକ ଧକ୍କା ହୋଇଛି। ଏହି ଦୁର୍ଘଟଣାରେ ବାଇକ୍ ଆରୋହୀ ଦୁଇ ଛାତ୍ରଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ଦୁଇ ଜଣ ଗୁରୁତର ଆହତ ହୋଇଛନ୍ତି। ପୋଲିସ ତରନ୍ତ ଆହତମାନଙ୍କୁ ପାନୱାଡିର ସାମୁଦାୟିକ ସ୍ୱାସ୍ଥ୍ୟ କେନ୍ଦ୍ରକୁ ପଠାଇଥିଲା। ପ୍ରାଥମିକ ଚିକିତ୍ସା ପରେ ଉଭ୍ୟଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ ଝାନ୍ସୀ ମେଡିକାଲ କଲେଜକୁ ସ୍ଥାନାନ୍ତର କରାଯାଇଥିଲା।
ଏହି ଘଟଣାଟି ମହୋବାକାନ୍ତ ଥାନା ଅଞ୍ଚଳର ଧାୱର ଗାଁ ନିକଟରେ ଘଟିଛି। ରିପୋର୍ଟ ଅନୁଯାୟୀ, ଆଲିପୁରାରେ ଏକ ଘର ଭଡ଼ା ନେଇ ପାଠପଢ଼ୁଥିବା ଚାରି ଜଣ ଛାତ୍ର ସେମାନଙ୍କ ବାଇକ୍ ଯୋଗେ କୋଚିଂ ସାରି ଫେରୁଥିଲେ। ହଠାତ୍ ସାମ୍ନାରୁ ଆସୁଥିବା ଏକ ଟ୍ରାକ୍ଟର ସହିତ ସେମାନଙ୍କର ମୁହାଁମୁହିଁ ଧକ୍କା ହୋଇଥିଲା। ଧକ୍କା ଏତେ ଜୋରରେ ଥିଲା ଯେ ବାଇକ୍ ଟି ଭାଙ୍ଗି ଯାଇଥିଲା। ଅଭିଯୁକ୍ତ ଡ୍ରାଇଭର ଟ୍ରାକ୍ଟରଟିକୁ ଛାଡି ପଳାଇ ଯାଇଥିଲା।
ପଥଚାରୀଙ୍କ ସୂଚନା ପାଇ ପୋଲିସ ପହଞ୍ଚି ଆହତମାନଙ୍କୁ ଡାକ୍ତରଖାନାରେ ଭର୍ତ୍ତି କରିଥିଲା। ଡାକ୍ତରମାନେ ଦୁଲାରା ଗ୍ରାମର ବାସିନ୍ଦା କେଦାରନାଥଙ୍କ ପୁଅ ଭରତଙ୍କୁ ପରୀକ୍ଷା କରିବା ପରେ ମୃତ ଘୋଷଣା କରିଥିଲେ। ବ୍ୟାରଜୋ ଗ୍ରାମର ଆକାଶ ଓରଫ ବବଲୁଙ୍କ ଚିକିତ୍ସା ସମୟରେ ମୃତ୍ୟୁ ହୋଇଥିଲା। ଖବର ମିଳିଛି ଯେ ଦୁହେଁ ଭଲ ବନ୍ଧୁ ଥିଲେ ଏବଂ ସହପାଠୀ ଅନିଲ ଏବଂ ସତ୍ୟମଙ୍କ ସହ ରହୁଥିଲେ।
ହରିସିଂହଙ୍କ ପୁଅ ଅନିଲ ଏବଂ ରାଜୁ ପାଲଙ୍କ ପୁଅ ସତ୍ୟମ ପାଲଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ ଝାନ୍ସୀ ମେଡିକାଲ କଲେଜକୁ ରେଫର କରାଯାଇଛି। ପୋଲିସ ପହଞ୍ଚି ମୃତଦେହଗୁଡ଼ିକୁ ଜବତ କରି ପୋଷ୍ଟମର୍ଟମ ପାଇଁ ପଠାଇଛି। ରିପୋର୍ଟ ଅନୁଯାୟୀ ସମସ୍ତ ଛାତ୍ର ପାନୱାଡି ସହରର ବିଭିନ୍ନ ଇଣ୍ଟର କଲେଜରେ ପାଠପଢ଼ୁଥିଲେ ଏବଂ ଭଡା ଘରେ ଏକାଠି ରହୁଥିଲେ। ପୋଲିସ ଟ୍ରାକ୍ଟରକୁ ଜବତ କରିଛି ଏବଂ ଦୁର୍ଘଟଣାର କାରଣ ତଦନ୍ତ ଆରମ୍ଭ କରିଛି।
