ପାକିସ୍ତାନ: ମଙ୍ଗଳବାର ଏବଂ ବୁଧବାର ରାତିରେ ପାକିସ୍ତାନୀ ସେନା ଏକ ବଡ଼ ଆକ୍ରମଣର ଶିକାର ହୋଇଛି। ତେହେରିକ-ଏ-ତାଲିବାନ ପାକିସ୍ତାନର ଏହି ଆକ୍ରମଣରେ ଏଗାର ପାକିସ୍ତାନୀ ସୈନିକଙ୍କ ମୃତ୍ୟୁ ହୋଇଥିଲାବେଳେ ଅନେକ ଗୁରୁତର ଆହତ ହୋଇଛନ୍ତି। ମୃତକଙ୍କ ମଧ୍ୟରେ ଦୁଇ ଜଣ ଅଧିକାରୀ ମଧ୍ୟ ଥିଲେ। ରିପୋର୍ଟ ଅନୁଯାୟୀ, ପାକିସ୍ତାନୀ ସେନା ଆଫଗାନିସ୍ତାନ ସୀମାରେ ଟିଟିପି ବିରୋଧରେ ଏକ ଅଭିଯାନ ଚଳାଇଥିଲା ଏବଂ ଏହି ଅଭିଯାନ ସମୟରେ ଏହି ଏନକାଉଣ୍ଟର ଘଟିଥିଲା। ପାକିସ୍ତାନୀ ସେନା ସହିତ ସଂଘର୍ଷରେ ୧୯ ଜଣ ଟିଟିପି ଆତଙ୍କବାଦୀ ମଧ୍ୟ ନିହତ ହୋଇଛନ୍ତି। ସୂଚନାଯୋଗ୍ୟ ଗତ କିଛି ମାସ ମଧ୍ୟରେ ଟିଟିପି ପାକିସ୍ତାନୀ ସୁରକ୍ଷା ବାହିନୀ ଉପରେ ଆକ୍ରମଣକୁ ତୀବ୍ର କରିଛି। ଟିଟିପି ଆତଙ୍କବାଦୀମାନେ ପ୍ରଥମେ ଉତ୍ତର-ପଶ୍ଚିମ କୁର୍ମ ଜିଲ୍ଲାରେ ରାସ୍ତାପାର୍ଶ୍ଵ ବୋମା ବିସ୍ଫୋରଣ କରିଥିଲେ ଏବଂ ପରେ ଗୁଳିଚାଳନା କରିଥିଲେ।
ପାକିସ୍ତାନୀ ସେନା ଏକ ବିବୃତ୍ତିରେ କହିଛି ଯେ ଅପରେସନ ସମୟରେ ଆତଙ୍କବାଦୀମାନେ ମଧ୍ୟ ନିହତ ହୋଇଥିଲେ। ପାକିସ୍ତାନୀ ତାଲିବାନ ଆକ୍ରମଣରେ ଜଣେ ଲେଫ୍ଟନାଣ୍ଟ କର୍ଣ୍ଣେଲ ଏବଂ ଜଣେ ମେଜର ମଧ୍ୟ ପ୍ରାଣ ହରାଇଥିଲେ। ଲେଫ୍ଟନାଣ୍ଟ କର୍ଣ୍ଣେଲ ଜୁନୈଦ ଆରିଫ୍ ମେଜର ତୈୟବ ରାହତଙ୍କ ସହିତ ଏହି ଅପରେସନର ନେତୃତ୍ୱ ନେଉଥିଲେ। ତେହରିକ-ଏ-ତାଲିବାନ ପାକିସ୍ତାନ (ଟିଟିପି) ଏହି ଆକ୍ରମଣ ପାଇଁ ଦାୟୀ ବୋଲି ଦାବି କରାଯାଇଛି। ଏହି ଗୋଷ୍ଠୀ ପାକିସ୍ତାନ ସରକାରଙ୍କୁ ପରାସ୍ତ କରି ଏହାର କଠୋର ଇସଲାମିକ ଶାସନ ପ୍ରତିଷ୍ଠା କରିବାକୁ ଚାହୁଁଛି। ଅନ୍ୟପକ୍ଷରେ, ପାକିସ୍ତାନ ଦାବି କରୁଛି ଯେ ଏହି ଆତଙ୍କବାଦୀମାନେ ଆଫଗାନିସ୍ତାନରେ ତାଲିମ ନିଅନ୍ତି ଏବଂ ପାକିସ୍ତାନରେ ଆକ୍ରମଣ କରନ୍ତି, ଏହି ଦାବିକୁ କାବୁଲ ବାରମ୍ବାର ଖଣ୍ଡନ କରୁଛି।
