ମଧ୍ୟପ୍ରଦେଶ: ମଧ୍ୟପ୍ରଦେଶର ବେତୁଲ ଜିଲ୍ଲାରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଶନିବାର ଦିନ ଜଣେ ସ୍ୱାମୀ-ସ୍ତ୍ରୀ ଏକ ଡ୍ୟାମକୁ ଡେଇଁ ଆତ୍ମହତ୍ୟା କରିଛନ୍ତି। ଆତ୍ମହତ୍ୟା କରିବା ପୂର୍ବରୁ, ଦମ୍ପତି ସେମାନଙ୍କର ଦୁଇ ବର୍ଷର ପୁଅକୁ ରାସ୍ତା କଡ଼ରେ ଛାଡି ଦେଇଥିବା ନେଇ ମିଳିଛି ସୂଚନା। ମୁଲତାଇ ପୋଲିସ ଷ୍ଟେସନ୍ ପ୍ରଭାରୀ ଦେବକରଣ ଦେହାରିଆ କହିଛନ୍ତି, “ଏହି ଘଟଣା ଜିଲ୍ଲା ମୁଖ୍ୟାଳୟରୁ ପ୍ରାୟ ୭୦ କିଲୋମିଟର ଦୂର ବୁକାଖେଡି ଡ୍ୟାମରେ ଘଟିଛି। ଶୁଭମ କରଦାଟେ (୨୫) ଏବଂ ତାଙ୍କ ପତ୍ନୀ ରୋଶନି (୨୪) ଚାରି ବର୍ଷ ପୂର୍ବେ ପ୍ରେମ ବିବାହ କରିଥିଲେ ଏବଂ ପ୍ରାରମ୍ଭିକ ତଦନ୍ତରୁ ଜଣାପଡିଛି ଯେ ସେମାନଙ୍କର ପ୍ରାୟତଃ ପାରିବାରିକ ବିବାଦ ହେଉଥିଲା, ଯାହା ଫଳରେ ସେମାନେ ଏହି ପଦକ୍ଷେପ ନେଇଥାଇପାରନ୍ତି।”
ପୋଲିସ ଦେଇଥିବା ସୂଚନା ଅନୁଯାୟୀ, ଶନିବାର ସକାଳେ ଝଗଡ଼ା ପରେ, ରୋଶନି ପିଲାଟିକୁ ନେଇ ଘରୁ ବାହାରି ଯାଇଥିଲା, ତା’ପରେ ଶୁଭମ ତା’ର ପଛେ ପଛେ ଯାଇଥିଲା ଏବଂ ସେମାନେ ବୁକାଖେଡି ଡ୍ୟାମରେ ପହଞ୍ଚିଥିଲେ। ଶୁଭମ ତା’ପରେ ତାଙ୍କ ମାମୁଁ, ହଟନାପୁରର ବାସିନ୍ଦା ମୁନ୍ନା ପରିହାରଙ୍କୁ ଡାକି ପିଲାଟିକୁ ନେବା ପାଇଁ ଡ୍ୟାମକୁ ଆସିବାକୁ କହିଥିଲେ। ପରିହାର ତାଙ୍କ ମୋଟରସାଇକେଲରେ ଘଟଣାସ୍ଥଳରେ ପହଞ୍ଚିବା ମାତ୍ରେ, ଉଭୟେ ଏକାଠି ଡ୍ୟାମକୁ ଡେଇଁ ପଡ଼ିଥିଲେ। ପରିହାର ପିଲାଟିକୁ ନିଜ ଜିମାରେ ନେଇ ପୋଲିସକୁ ଖବର ଦେଇଥିଲେ। ରାଜ୍ୟ ବିପର୍ଯ୍ୟୟ ପ୍ରତିକ୍ରିୟା ବାହିନୀ (ଏସଡିଇଆରଏଫ୍)ର ଏକ ଦଳ ଦୁଇ ଘଣ୍ଟା ପରେ ମୃତଦେହଗୁଡ଼ିକୁ ବାହାର କରିଥିଲା। ଏକ ମାମଲା ରୁଜୁ କରାଯାଇଛି ଏବଂ ତଦନ୍ତ ଚାଲିଛି।
