ୱାଶିଂଟନ୍: ଆମେରିକା ନିଜର ଏକ ନୂଆ ନିୟମ ଆରମ୍ଭ କରିବା ପୂର୍ବକ ସମସ୍ତ ବିଦେଶୀ ବାଣିଜ୍ୟିକ ଟ୍ରକ୍ ଚାଳକମାନଙ୍କ ପାଇଁ ଭିସା ପ୍ରଦାନ ବ୍ୟବସ୍ଥାକୁ ବନ୍ଦ କରିଦେଇଛି । ଏନେଇ ଆମେରିକା ରାଜ୍ୟ ସଚିବ ମାର୍କୋ ରୁବିଓ ସାମାଜିକ ଗଣମାଧ୍ୟମ ‘ଏକ୍ସ’ରେ ସୂଚନା ଦେଇଛନ୍ତି । ସେ କହିଛନ୍ତି, ଆମେରିକୀୟ ରାସ୍ତାରେ ବଡ଼ ଟ୍ରାକ୍ଟର-ଟ୍ରେଲର ଟ୍ରକ୍ ଚଳାଉଥିବା ବିଦେଶୀ ଚାଳକଙ୍କ ସଂଖ୍ୟା ବୃଦ୍ଧି ପାଉଥିବାରୁ ଆମେରିକୀୟଙ୍କ ଜୀବନ ବିପଦରେ ପଡୁଛି ଏବଂ ଆମେରିକୀୟ ଟ୍ରକ୍ ଚାଳକମାନଙ୍କ ଜୀବିକା ହ୍ରାସ ପାଉଛି । ଲୋକଙ୍କ ସୁରକ୍ଷା ଚିନ୍ତା ଏବଂ ଆମେରିକୀୟଙ୍କୁ ଚାକିରିର ସୁରକ୍ଷା ଦେବାର ଆବଶ୍ୟକତାକୁ ଆଖି ଆଗରେ ରଖି ଏଭଳି ନିଷ୍ପତ୍ତି ନିଆଯାଇଛି । ବିଦେଶୀ ଟ୍ରକ୍ ଚାଳକମାନଙ୍କୁ ନିୟନ୍ତ୍ରଣ କରୁଥିବା ନିୟମଗୁଡ଼ିକୁ କଠୋର କରିବା ପାଇଁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରଶାସନ ଦ୍ୱାରା ଏହି ପଦକ୍ଷେପ ନିଆଯାଇଛି ।
ଗତ ଏପ୍ରିଲରେ, ଟ୍ରମ୍ପ୍ ଏକ କାର୍ଯ୍ୟନିର୍ବାହୀ ନିର୍ଦ୍ଦେଶରେ ସ୍ୱାକ୍ଷର କରିଥିଲେ ଯେଉଁଥିରେ କର୍ତ୍ତୃପକ୍ଷଙ୍କୁ ଆମେରିକାରେ ବାଣିଜ୍ୟିକ ଟ୍ରକ୍ ଚାଳକମାନେ ଇଂରାଜୀ-ଦକ୍ଷତା ମାନଦଣ୍ଡ ପୂରଣ କରିବା ପାଇଁ ଦୀର୍ଘକାଳୀନ ଆବଶ୍ୟକତାକୁ ଲାଗୁ କରିବାକୁ ନିର୍ଦ୍ଦେଶ ଦିଆଯାଇଥିଲା । ଫ୍ଲୋରିଡାରେ ହରଜିନ୍ଦର ସିଂହ ନାମକ ଜଣେ ଭାରତୀୟ ଟ୍ରକ୍ ଚାଳକଙ୍କୁ ନେଇ ହୋଇଥିବା ଏକ ଭୟଙ୍କର ଦୁର୍ଘଟଣା (୩ ଆମେରିକୀୟ ନାଗରିକ ପ୍ରାଣ ହରାଇଥିଲେ) ପରେ ଏହି ସପ୍ତାହରେ ଏହି ପ୍ରସଙ୍ଗ ଉପରେ ଆମେରିକା ସରକାରଙ୍କ ଚିନ୍ତା ବୃଦ୍ଧି ପାଇଛି । ସେ ମେକ୍ସିକୋ ଦେଇ ବେଆଇନ ଭାବରେ ଆମେରିକାରେ ପ୍ରବେଶ କରିଥିବା ଅଭିଯୋଗ ହୋଇଛି । ତେବେ ଆମେରିକାର ଏପ୍ରକାର ନିଷ୍ପତ୍ତି ଫଳରେ ଭାରତ ସମେତ ଅନେକ ଦେଶର ଡ୍ରାଇଭରମାନେ ଯେଉଁମାନେ କି ଇଂରାଜୀ କହିପାରୁନାହାନ୍ତି କିମ୍ବା ଆଇନ୍ଗତ ଭାବେ ଆମେରିକାରେ ବସବାସ କରୁନାହାନ୍ତି ସେମାନଙ୍କ ଜୀବିକା ଏବେ ସଂକଟରେ ପଡ଼ିଯାଇଛି ।
