ନୂଆଦିଲ୍ଲୀ: ୧୯୬୦ ମସିହାର ସିନ୍ଧୁ ଜଳ ଚୁକ୍ତିନାମାକୁ ଭାରତ ଅସ୍ଥାୟୀ ଭାବରେ ସ୍ଥଗିତ କରିବା ପରେ ପାକିସ୍ତାନ ବାରମ୍ବାର ନିଜର ରାଗ ପ୍ରକାଶ କରୁଛି। ପ୍ରତିଦିନ ପାକିସ୍ତାନର ସାମରିକ ଅଧିକାରୀଙ୍କଠାରୁ ଆରମ୍ଭ କରି ନେତା ପର୍ଯ୍ୟନ୍ତ ବୟାନ ଦେଉଛନ୍ତି। ସିନ୍ଧୁ ଜଳ ଚୁକ୍ତିନାମା ଉପରେ ବିଲାୱଲ ଭୁଟ୍ଟୋଙ୍କ ସାମ୍ପ୍ରତିକ ବୟାନ ପରେ, ଏବେ ପାକ ପ୍ରଧାନମନ୍ତ୍ରୀ ଶେହବାଜ ଶରିଫ ମଧ୍ୟ ଭାରତ ବିରୋଧରେ ବିଷ ଓଗାଳିଛନ୍ତି। ସେ ଧମକ ଦେଇଛନ୍ତି,ପାକିସ୍ତାନ ଭାରତଠାରୁ ତା’ର ହକଦାର ପାଣିର ଗୋଟିଏ ବୁନ୍ଦା ମଧ୍ୟ ଛଡ଼ାଇ ନେବାକୁ ଦେବ ନାହିଁ। ନିକଟରେ, ପାକ ସେନା ମୁଖ୍ୟ ଜେନେରାଲ ଅସୀମ ମୁନିର ଆମେରିକା ଗସ୍ତରେ ଯାଇ ଏହା ମଧ୍ୟ କହିଥିଲେ, ଯଦି ଭାରତ ଏକ ବନ୍ଧ ର୍ନିମାଣ କରେ, ତେବେ ପାକିସ୍ତାନ ଏହାକୁ ମିଶାଇଲ ଦ୍ୱାରା ଧ୍ୱଂସ କରିବ।
ଯଦି ଆମେ ବୁଡ଼ିବୁ, ତେବେ ଆମେ ଅଧା ବିଶ୍ୱକୁ ଆମ ସହିତ ନେଇଯିବୁ। ଏହା ବ୍ୟତୀତ ପୂର୍ବତନ ବୈଦେଶିକ ମନ୍ତ୍ରୀ ବିଲାୱଲ ଭୁଟ୍ଟୋ ମଧ୍ୟ ସିନ୍ଧୁ ଜଳ ଚୁକ୍ତିନାମା ସମ୍ବନ୍ଧୀୟ ପ୍ରସଙ୍ଗରେ ବୟାନ ଦେଇଛନ୍ତି। ଏହି ସମୟରେ, ଭାରତ ଜମ୍ମୁ ଓ କଶ୍ମୀରର ସିନ୍ଧୁ ଗ୍ରାମ ନିକଟରେ ଚେନାବ ନଦୀରେ ଜାତୀୟ ଜଳ ବିଦ୍ୟୁତ ପ୍ରକଳ୍ପ ପାଇଁ ଟେଣ୍ଡର ପ୍ରକ୍ରିୟା ଆରମ୍ଭ କରିଛି। ପାକିସ୍ତାନ ଭୟ କରୁଛି,ଭାରତ ଏହି ପ୍ରକଳ୍ପରୁ ପାଣି ବନ୍ଦ କରିପାରେ ଏବଂ ଏହାର କୃଷି, ଜଳସେଚନ ଏବଂ ବିଦ୍ୟୁତ ଉତ୍ପାଦନ ଗୁରୁତର ଭାବରେ ପ୍ରଭାବିତ ହେବ। ତଥାପି ଭାରତର ମତ ସ୍ପଷ୍ଟ, ଏହି ପ୍ରକଳ୍ପ ଅନ୍ତର୍ଜାତୀୟ ମାନଦଣ୍ଡ ଏବଂ ଭାରତର ଅଧିକାର କ୍ଷେତ୍ର ଅଧୀନରେ ଆସେ। ଭାରତ ପୂର୍ବରୁ ସତଲେଜ, ବ୍ୟାସ ଏବଂ ରବି ନଦୀ ଉପରେ ନିୟନ୍ତ୍ରଣ ରଖିଥିବାରୁ ପାକିସ୍ତାନର ଚିନ୍ତା ମଧ୍ୟ ବୃଦ୍ଧି ପାଉଛି ଏବଂ ଏବେ ଯଦି ଭାରତ ସିନ୍ଧୁ ଅବବାହିକାର ଅନ୍ୟ ନଦୀ ଉପରେ ସକ୍ରିୟ ହୁଏ, ତେବେ ଏହାର ଜଳ ସଙ୍କଟ ଗମ୍ଭୀର ହୋଇଯିବ।
