ଉତ୍ତରପ୍ରଦେଶ: ଝିଅର ଗଣ୍ଡିରୁ ମୁଣ୍ଡକୁ ଅଲଗା କରି କେନାଲରେ ଫୋପାଡ଼ିଦେଲା ମାଆ। ଏଭଳି ଏକ ଭୟଙ୍କର ଘଟଣା ଦେଖିବାକୁ ମିଳିଛି ଉତ୍ତରପ୍ରଦେଶର ମିରଟରେ। ବାହାଦୁରପୁର ଗାଁ ନିକଟ ଗଙ୍ଗା ନାଳରେ ଜଣେ ନାବାଳିକାଙ୍କ ମୁଣ୍ଡ ନଥିବା ଏକ ମୃତଦେହ ମିଳିଥିଲା, ଯାହା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଥିଲା। ଗାଁ ଲୋକଙ୍କ ଠାରୁ ସୂଚନା ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଯାଞ୍ଚ କରିବା ସମୟରେ ମୃତଦେହର ପକେଟରୁ ଏକ ପର୍ସ ମିଳିଥିଲା। ସେଥିରେ ପ୍ରେମିକଙ୍କ ମୋବାଇଲ୍ ନମ୍ବର ଏବଂ ଠିକଣା ଲେଖାଯାଇଥିଲା। ଏହି ସୁରାକ ଆଧାରରେ ପୋଲିସ ପ୍ରେମିକଙ୍କ ପାଖରେ ପହଞ୍ଚିଥିଲା ଏବଂ ତା’ପରେ ସମ୍ପୂର୍ଣ୍ଣ ହତ୍ୟା ମାମଲା ସାମ୍ନାକୁ ଆସିଥିଲା। ପୋଲିସ କହିବା ଅନୁସାରେ, ମୃତ ଯୁବତୀଙ୍କ ନାମ ଆସ୍ଥା, ଯାହାଙ୍କ ବୟସ ୧୭ବର୍ଷ। ଆସ୍ଥାଙ୍କ ମାଆ, ତାଙ୍କ ମାମୁଁ ଏବଂ ଭାଇଙ୍କ ସହ ମିଶି ତାଙ୍କୁ ନିର୍ମମ ଭାବରେ ହତ୍ୟା କରିଥିଲେ।
ହତ୍ୟାର କାରଣ ଥିଲା, ଅମନ ନାମକ ଜଣେ ଯୁବକଙ୍କ ସହ ଆସ୍ଥାଙ୍କ ପ୍ରେମ ସମ୍ପର୍କ। ମେ ୨୮ ତାରିଖରେ ଯେତେବେଳେ ଆସ୍ଥାଙ୍କ ମାଆ ଜଣେ ସମ୍ପର୍କୀୟଙ୍କ ଘରୁ ଫେରିଥିଲେ, ସେ ଆସ୍ଥାଙ୍କୁ ତାଙ୍କ ପ୍ରେମିକ ଅମନଙ୍କ ସହ ଏକାକୀ ଘରେ ଥିବା ଦେଖିଥିଲେ। ଏହାକୁ ନେଇ ଘରେ ବହୁତ ଝଗଡ଼ା ମଧ୍ୟ ହୋଇଥିଲା। ତା ପରେ ତାଙ୍କ ମାଆ ଝିଅକୁ ଅମନଙ୍କଠାରୁ ଅଲଗା ହେବାକୁ ଧମକ ଦେଇଥିଲେ। କିନ୍ତୁ ଯେତେବେଳେ ଆସ୍ଥା ଶୁଣି ନଥିଲେ, ସେତେବେଳେ ଆସ୍ଥାଙ୍କ ମାଆ ତାଙ୍କ ମାମୁଁ ଏବଂ ଭାଇମାନଙ୍କୁ ଡାକି ଏକ ଭୟଙ୍କର ଷଡ଼ଯନ୍ତ୍ର ରଚିଥିଲେ। ସମସ୍ତେ ମିଶି ଆସ୍ଥାଙ୍କ ମୁଣ୍ଡ ଶରୀରରୁ ଅଲଗା କରି ମୁଣ୍ଡ ନଥିବା ଶରୀର ଗଙ୍ଗାନହର କେନାଲରେ ଫିଙ୍ଗି ଦେଇଥିଲେ ଏବଂ ମୁଣ୍ଡକୁ ଅଲଗା ଜାଗାରେ ଫୋପାଡ଼ି ଦେଇଥିଲେ। ଯାହା ଦ୍ୱାରା ମୃତଦେହ ଚିହ୍ନଟ କରିବା କଷ୍ଟକର ହେବ। ତଥାପି, ପ୍ରେମିକଙ୍କ ନମ୍ବର ଏବଂ ମୃତଦେହର ପକେଟରୁ ମିଳିଥିବା କିଛି ଟଙ୍କା ଆଧାରରେ ପୋଲିସ ଏହାର ତଦନ୍ତ କରିଥିଲା। ଅମନଙ୍କ ନମ୍ବର ପାଇବା ପରେ ଯେତେବେଳେ ପୋଲିସ ତାଙ୍କୁ ମୃତଦେହ ଦେଖାଇଥିଲା, ସେ ସଙ୍ଗେ ସଙ୍ଗେ ଆସ୍ଥାଙ୍କୁ ଚିହ୍ନି ଦେଇଥିଲେ।
