– ପ୍ରଥମ ଦିନର ବ୍ୟବସାୟ 15 ଲକ୍ଷରୁ ଅଧିକ
– ବିଶେଷ ଆକର୍ଷଣ ହେଉଛି ଲାଖ ଉତ୍ପାଦ, ପେପର ମାଚେ, କାଠ ହସ୍ତଶିଳ୍ପ, କାଠ ମୂର୍ତ୍ତି, ଗୋଲଡେନ ଘାସ, ସବାଇ ହସ୍ତଶିଳ୍ପ ଏବଂ ମାଟିପତ୍ରର ଲାଇଭ ଡେମୋ ଷ୍ଟଲ
ଭୁବନେଶ୍ୱର: ପ୍ରଥମ ଦିନରେ ମାନ୍ୟବର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀଙ୍କ କରକମଳରେ ଭବ୍ୟ ଉଦ୍ଘାଟନ ପରେ, ସୁଭଦ୍ରା ଶକ୍ତି ମେଳା ୨୦୨୫ର ଦ୍ୱିତୀୟ ଦିବସ ଏହାର ଚମତ୍କାର ପ୍ରଦର୍ଶନୀ, ମନମୋହକ ଷ୍ଟଲ୍ ଏବଂ ସାଂସ୍କୃତିକ କାର୍ଯ୍ୟକ୍ରମ ସହିତ ଦର୍ଶକମାନଙ୍କୁ ମନ୍ତ୍ରମୁଗ୍ଧ କରିଥିଲା । ଭୁବନେଶ୍ୱରର ଜନତା ମଇଦାନରେ ଦର୍ଶକ ଓଡ଼ିଶାର ବିଭିନ୍ନ ପ୍ରାନ୍ତରୁ ଆସିଥିବା ସ୍ୱୟଂ ସହାୟକ ଗୋଷ୍ଠୀ ଏବଂ ଉତ୍ପାଦକ ଗୋଷ୍ଠୀମାନଙ୍କ ଦ୍ୱାରା ପ୍ରସ୍ତୁତ ଉତ୍ପାଦର କ୍ରୟ କରିବା ସହ ମେଳାର ଆନନ୍ଦ ଉଠାଇଥି୍ଲେ।
ଏହା ସହ ସୁଭଦ୍ରା ଶକ୍ତି ମେଳାର ବିଶେଷ ଆକର୍ଷଣ ହେଉଛି ଲାଇଭ ଡେମୋ ମାଧ୍ୟମରେ ସ୍ଵୟଂ ସହାୟକ ଗୋଷ୍ଠୀ ଓ ପିଜିମାନଙ୍କ ଉତ୍ପାଦ ପ୍ରସ୍ତୁତ କରିବା ପ୍ରକ୍ରିୟା ଦେଖାଇବାର ଷ୍ଟଲଗୁଡିକ । ବାଲେଶ୍ବର ଜିଲ୍ଲା ରେମୁଣାରୁ ଆସିଥିବା ବମାପଡ଼ା ଜଉକଣ୍ଢେଇ ଏସଏଚଜି ଲାଖ ଉତ୍ପାଦ ପ୍ରସ୍ତୁତ କରିବାର କଳା ପ୍ରଦର୍ଶନ କରୁଛନ୍ତି ତ ଆନନ୍ଦପୁର, କେଉଁଝରରୁ ଆସିଥିବା ଶ୍ରୀ ଜଗନ୍ନାଥ ପିଜି ପେପର ମାଚେ ପ୍ରସ୍ତୁତ କରିବାର କୌଶଳ ପ୍ରଦର୍ଶନ କରୁଛନ୍ତି । ନୂଆପଡ଼ାରୁ ଆସିଥିବା ମା ବୈଭବ ଲକ୍ଷ୍ମୀ ଏସଏଚଜି କାଠ ତିଆରି କ୍ରାଫ୍ଟ, ମୂର୍ତ୍ତି ଓ କଳାକୃତି ପ୍ରଦର୍ଶନ କରୁଛନ୍ତି ଓ କେନ୍ଦ୍ରାପଡ଼ାର ସତ୍ୟସାଇ ପିଜି ଗୋଲଡେନ ଗ୍ରାସ ପ୍ରସ୍ତୁତ ଉତ୍ପାଦ କଳା ପ୍ରଦର୍ଶନ କରୁଛନ୍ତି । ମୟୂରଭଞ୍ଜର ସ୍ଵୟଂ ସହାୟିକା ଦଳ ଏସଏଚଜି ସବାଇ କ୍ରାଫ୍ଟ ପ୍ରସ୍ତୁତ କଳା ଦେଖାଉଛନ୍ତି ଓ ସୁବର୍ଣ୍ଣପୁରର କୁଲିବାହାଲ ଟେରାକୋଟ ପିଜି ମାଟିପତ୍ର ପ୍ରସ୍ତୁତ କରିବାର ପ୍ରଦର୍ଶନ କରୁଛନ୍ତି ।
ମେଳାରେ ରାଜ୍ୟର ସମସ୍ତ ଜିଲ୍ଲାରୁ ଭାଗ ନେଇଥିବା ୭୦୦ ରୁ ଅଧିକ ସ୍ୱୟଂ ସହାୟକ ଗୋଷ୍ଠୀ ଉଦ୍ୟୋଗୀ ମା’ ମାନଙ୍କ ଦ୍ୱାରା ୩୦୦ଷ୍ଟଲ୍ରେ ପ୍ରଦର୍ଶିତ ହସ୍ତଶିଳ୍ପ, ହସ୍ତତନ୍ତ, ମାଣ୍ଡିଆରୁ ପ୍ରସ୍ତୁତ ଖାଦ୍ୟ, ଜୈବିକ ଉତ୍ପାଦ ଏବଂ ଘରୋଇ ଆବଶ୍ୟକୀୟ ସାମଗ୍ରୀ ପ୍ରଭୃତି ବେଶ ଲୋକ ପ୍ରିୟ ହୋଇଥିଲା । ଏଥି ସହିତ ଡୋକରା, ସବାଇ ଘାସ ଉତ୍ପାଦ ଏବଂ କୋଟପାଡ଼ ହସ୍ତତନ୍ତ ଭଳି ପାରମ୍ପରିକ ଉତ୍ପାଦ ଦର୍ଶକମାନଙ୍କଠାରୁ ବିପୁଳ ପ୍ରଶଂସା ପାଇଥିଲାବେଳେ, ଆରିସା, ମଣ୍ଡା ଭଳି ପାରମ୍ପରିକ ପିଠାପଣା ଠାରୁ ଆରମ୍ଭ କରି ବିସ୍ମୃତ ଖାଦ୍ୟ ମା’ ମାନଙ୍କର ହାତ ରନ୍ଧା ସ୍ୱାଦିଷ୍ଟ ବ୍ୟଞ୍ଜନ ଦର୍ଶକ ତଥା କ୍ରେତାମାନଙ୍କ ପାଇଁ ଏକ ପ୍ରମୁଖ ଆକର୍ଷଣ ଥିଲା ।ମେଳାର ଦ୍ଵିତୀୟ ସନ୍ଧ୍ୟାରେ ସ୍ୱୟଂ ସହାୟକ ଗୋଷ୍ଠୀ ଦ୍ୱାରା ପରିଚାଳିତ ଫୁଡ୍ କୋର୍ଟ ଏକ ମୁଖ୍ୟ ଆକର୍ଷଣ ହୋଇ ରହିଥିଲା ।
କେବଳ ଦ୍ୱିତୀୟ ଦିନରେ ସ୍ୱୟଂ ସହାୟକ ଗୋଷ୍ଠୀ ଷ୍ଟଲଗୁଡ଼ିକ ଦ୍ୱାରା ସୃଷ୍ଟି ହୋଇଥିବା ମୋଟ ବ୍ୟବସାୟ ୧୫ ଲକ୍ଷ ଟଙ୍କାରେ ପହଞ୍ଚିଥିଲା, ଯାହା ମେଳାର ଆର୍ଥିକ ପ୍ରଭାବ ଏବଂ ସ୍ୱୟଂ ସହାୟକ ଗୋଷ୍ଠୀ-ଉତ୍ପାଦିତ ସାମଗ୍ରୀ ପାଇଁ ବଢ଼ୁଥିବା ବଜାର ଚାହିଦାକୁ ପ୍ରଦର୍ଶିତ କରିଥିଲା। ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ଦର୍ଶକମାନଙ୍କୁ ମନ୍ତ୍ରମୁଗ୍ଧ କରିଥିଲା ସତ୍ୟବାଦୀ ସଙ୍ଗୀତ ମହାବିଦ୍ୟାଳୟର ଛାତ୍ରଛାତ୍ରୀମାନେ ଓଡ଼ିଶାର ସମୃଦ୍ଧ କଳାତ୍ମକ ଐତିହ୍ୟକୁ ଚମତ୍କାର ଓଡ଼ିଶୀ ନୃତ୍ୟ ପରିବେଷଣ ମାଧ୍ୟମରେ ବଖାଣିଥିଲେ । ସାଂସ୍କୃତିକ କାର୍ଯ୍ୟକ୍ରମ ଶଶାଙ୍କ ଶେଖର, ଲିପ୍ସା ମହାପାତ୍ର ଏବଂ ସେମାନଙ୍କ ଦଳ ଦ୍ୱାରା ମନମୁଗ୍ଧକର ମେଲୋଡି ନାଇଟ୍ ସହିତ ସମାପ୍ତ ହୋଇଥିଲା। ଦ୍ୱିତୀୟ ଦିନରେ ଜନସମାଗମ ସହିତ, ଆଗାମୀ ଦିନଗୁଡ଼ିକରେ ଏହି ଉତ୍ସାହ ଜାରି ରହିବ । ଓଡ଼ିଶାର ମହିଳାମାନଙ୍କର ପ୍ରେରଣାଦାୟୀ ଉଦ୍ୟୋଗିତାର ଯାତ୍ରାକୁ ଦେଖିବା ଏବଂ ସଶକ୍ତିକରଣର ଏହି ମହାନ ଉତ୍ସବର ଅଂଶବିଶେଷ ହେବା ପାଇଁ ସମସ୍ତ ଦର୍ଶକମାନଙ୍କୁ ଆନ୍ତରିକ ନିମନ୍ତ୍ରଣ ।
