ଢ଼ାଲିଙ୍କ ନିଆଁରେ ଘିଅ ଢ଼ାଲିଲେ ଅମର

ଭୁବନେଶ୍ୱର : ବିଜେଡ଼ିକୁ ନେଇ ଢ଼ାଲିଙ୍କ ମନ୍ତବ୍ୟରେ ଘିଅ ଢ଼ାଳିଲେ ଅମର ଶତପଥୀ । ଦଳର ଆମୂଳଚୁଳ ସଂଗଠନ ଠିକ ନକଲେ ଆଗକୁ ଅନେକ ଅଘଟଣା ଘଟିବ ବୋଲି ବିଜେଡି ନେତା ଶ୍ରୀ ଶତପଥୀ କହିଛନ୍ତି । ଏ ଦିଗରେ ଆମ ସମସ୍ତଙ୍କର ଅନୁଭବ ରହିଛି । ସଂଗଠନ ଠିକ କରିବାକୁ ପ୍ରଚେଷ୍ଟା ଆରମ୍ଭ ହୋଇଛି, ଦେଖାଯାଉ କ’ଣ ହେଉଛି ବୋଲି ଶ୍ରୀ ଶତପଥୀ କହିଛନ୍ତି । ପ୍ରକାଶଯେ ବିଜେଡିର ବସା ଖାଲି ହୋଇଯିବ ବୋଲି ବିଜେପି ନେତା ଅରବିନ୍ଦ ଢ଼ାଲି କହିଥିଲେ । ମମତା ମହାନ୍ତ ଗତକାଲି ବିଜେପିରେ ମିଶିବା ପରେ ବିଜେଡିକୁ ଟାର୍ଗେଟ କରି ଶ୍ରୀ ଢ଼ାଲି ଏଭଳି କହିଥିଲେ । ଏହାଛଡ଼ା ସେ କହିଥିଲେ ଯେ ଭବିଷ୍ୟତରେ ବିଜେଡି ରହିବନି, ଚାହିଁଲେ ବି ଆଉ ରଖିପାରିବେନି । ଜାତୀୟ ଦଳର ବିଲୟ ହୁଏନାହିଁ, କିନ୍ତୁ ଆଞ୍ଚଳିକ ଦଳର ବିଲୟ ହୁଏ । ଯେ ଆଞ୍ଚଳିକ ଦଳ ଗଢ଼ିଥାଏ, ଅସୁସ୍ଥ ବା ଆଉ କିଛି ହେଲେ ଦଳ ରୁହେନି । ବିଜେଡିରେ ବାକ ସ୍ୱାଧୀନତା ନାହିଁ । ସୁପ୍ରିମୋଙ୍କୁ ଦେଖା କରିପାରିବେ ନାହିଁ । ବିଜେଡିରେ ସମସ୍ତେ ଅସନ୍ତୁଷ୍ଟ ଥିଲେ । ପାଣ୍ଡିଆନ ସର୍ବେସର୍ବା ଥିଲେ ବୋଲି ବିଜେପି ନେତା ଅରବିନ୍ଦ ଢ଼ାଲି କହିଥିଲେ ।