ଭୁବନେଶ୍ୱର: ଚିକେନ ବ୍ୟବସାୟାକୁ କେନ୍ଦ୍ର କରି ତୁମୁଳ କାଣ୍ଡ । ଚାଲିଲା ଛୁରି । ଘାଇଲା ହେଲେ ଜଣଙ୍କ ପରେ ଜଣେ ବ୍ୟକ୍ତି । ଲହୁ ଲୁହାଣ ହୋଇ ହସ୍ପିଟାଲରେ ଭର୍ତ୍ତି ହେଲେ । ଶେଷରେ ବନ୍ଧା ହୋଇ ଜେଲ ଗଲେ । ପରସ୍ପରକୁ ଆକ୍ରମଣ ଅଭିଯୋଗରେ ଏୟାରଫିଲ୍ଡ ଥାନା ପୁଲିସ ୩ ଜଣଙ୍କୁ ଗିରଫ କରି କୋର୍ଟଚାଳାଣ କରିଛି । ଗିରଫ ଅଭିଯୁକ୍ତମାନେ ହେଲେ ସୁନ୍ଦରପଦା ତଳସାହିର ଅହମ୍ମଦ୍ ଖାନ୍ ଏବଂ ସୁନ୍ଦରପଦା ଆଜାଦ୍ ନଗର ଅଞ୍ଚଳର ଶେଖ୍ ଇବ୍ରାହିମ୍ ଏବଂ ଶେଖ୍ ଇସମାଇଲ୍ । ସୂଚନାଯୋଗ୍ୟ ଯେ, ଏୟାରଫିଲ୍ଡ ଥାନା ଅନ୍ତର୍ଗତ ସୁନ୍ଦରପଦା ହାଟରେ ଉଭୟ ପକ୍ଷର ଦୁଇଟି ଚିକେନ ସେଣ୍ଟର ଅଛି ।
ଘଟଣା ଦିନ ମଧ୍ୟାହ୍ନରେ ଚିକେନ ବ୍ୟବସାୟକୁ କେନ୍ଦ୍ରକରି ଉଭୟ ପକ୍ଷ ମଧ୍ୟରେ ପ୍ରଥମେ ଯୁକ୍ତିତର୍କ ଓ ପରେ ମାରପିଟ ହୋଇଥିଲା । ଏହା କ୍ରମଶଃ ଉଗ୍ର ରୂପ ନେବା ସହିତ ଉଭୟ ପକ୍ଷରୁ କିଛି ବ୍ୟକ୍ତି ମାରଣାସ୍ତ୍ର ସାହାଯ୍ୟରେ ପରସ୍ପରକୁ ମରଣାନ୍ତକ ଆକ୍ରମଣ କରିଥିଲେ । ଯାହାଫଳରେ ଏହି ଆକ୍ରମଣ ଦ୍ୱାରା ଉଭୟ ପକ୍ଷର କିଛି ବ୍ୟକ୍ତି ଗୁରୁତର ଆହତ ହୋଇ ଚିକିତ୍ସା ନିମନ୍ତେ ହସ୍ପିଟାଲକୁ ସ୍ଥାନାନ୍ତର ହୋଇଥିଲେ । ଏହି ଘଟଣାକୁ କେନ୍ଦ୍ରକରି ଉଭୟ ପକ୍ଷର ଅଭିଯୋଗ କ୍ରମେ ଏୟାରଫୀଲ୍ଡ ଥାନା ପୁଲିସ ମାମଲା ରୁଜୁ କରିବା ସହିତ ତଦନ୍ତ କରି ଚଢଉ ଜରିଆରେ ନିମ୍ନୋକ୍ତ ୩ଜଣ ଅଭିଯୁକ୍ତଙ୍କୁ ଗିରଫ କରିଥିଲେ । ତଦନ୍ତ ସମୟରେ ଅଭିଯୁକ୍ତମାନେ ନିଜ ଅପରାଧ ସ୍ୱୀକାର କରିଥିଲେ ।
