କାବୁଲ: ଆଫଗାନିସ୍ତାନର ହେଲମଣ୍ଡ ପ୍ରଦେଶ ଅନ୍ତର୍ଗତ ଲସ୍କର ଗାହ ସହର ଉପରେ ଗତକାଲି ଆଫଗାନିସ୍ତାନର ବାୟୁସେନା ପକ୍ଷରୁ ଏୟାର ଷ୍ଟ୍ରାଇକ୍ କରାଯାଇଛି । ଏଥିରେ ୩୦ ଜଣ ପାକିସ୍ତାନୀ ଆତଙ୍କବାଦୀ ସମେତ ୧୧୨ ଜଣ ତାଲିବାନ ନିହତ ହୋଇଛନ୍ତି । ଏହି ପାକ୍ ଆତଙ୍କୀମାନେ ଭାରତୀୟ ଉପମହାଦେଶ ପାଇଁ ଗଠିତ ଅଲ୍କାଏଦା ଆତଙ୍କୀ ଗୋଷ୍ଠୀର ସଦସ୍ୟ ବୋଲି ଆଫଗାନ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି ।
ପାକିସ୍ତାନ ଆତଙ୍କବାଦୀଙ୍କୁ ତାଙ୍କ ଦେଶକୁ ପଠାଉଛି ଏବଂ ସେମାନେ ତାଲିବାନ ସହ ମିଶି ଆଫଗାନ ସରକାରୀ ସେନା ବିରୋଧରେ ଯୁଦ୍ଧ କରୁଛନ୍ତି ବୋଲି ଆଫଗାନିସ୍ତାନ ଲଗାତାର ଭାବେ ଅଭିଯୋଗ କରିଆସୁଛି । ଏପରିକି ଏହାର ପ୍ରମାଣ ରହିଛି ଏବଂ ଆବଶ୍ୟକ ପଡିଲେ ତାହା ସୁରକ୍ଷା ପରିଷଦକୁ ଦିଆଯିବ ବୋଲି ଜାତିସଂଘରେ ଅବସ୍ଥାପିତ ଆଫଗାନ ରାଷ୍ଟ୍ରଦୂତ ଗୁଲାମ ଇସାକଜାଇ କହିଛନ୍ତି ।
