ନୂଆଦିଲ୍ଲୀ: ଫ୍ରୋଜେନ୍ ସୋଲ୍ଡର୍, କାନ୍ଧର ଏକ ସମସ୍ୟା ଯେଉଁଥିରେ କାନ୍ଧ ଷ୍ଟିଫ୍ ଅର୍ଥାତ୍ କଠିନ ହୋଇଯାଏ । ଫଳରେ ଜଣେ ବ୍ୟକ୍ତିଙ୍କୁ ଚଳପ୍ରଚଳ କରିବା କଷ୍ଟକର ହୋଇପଡେ । ଏହି ଅବସ୍ଥାରେ ଜଣେ ବ୍ୟକ୍ତିଙ୍କୁ ଅତି ସରଳ କାର୍ୟ୍ୟ ପାଇଁ ମଧ୍ୟ ଅନ୍ୟମାନଙ୍କ ଉପରେ ନିର୍ଭର କରିବାକୁ ପଡେ । ତେବେ ଏହି ରୋଗ ବାବଦରେ ସ୍ବାସ୍ଥ୍ୟ ବିଶେଷଜ୍ଞ କଣ କହୁଛନ୍ତି, ଜାଣନ୍ତୁ…
ଜୟପୁରର ଅର୍ଥୋପେଡିକ୍ ପରାମର୍ଶଦାତା ଡକ୍ଟର ସଞ୍ଜୟ ରଥୀ ସ୍ପଷ୍ଟ କରିଛନ୍ତି ଯେ, ଫ୍ରୋଜେନ୍ ସୋଲ୍ଡର୍ ଆଡେସିଭ୍ କ୍ୟାପସୁଲାଇଟିସ୍ ଭାବରେ ମଧ୍ୟ ଜଣାଶୁଣା । ଏହା କାନ୍ଧ ଗଣ୍ଠିର ସମସ୍ୟା । କାନ୍ଧରେ ତିନୋଟି ହାଡର ଗଣ୍ଠି ଅଛି, ହ୍ୟୁମରସ୍ ଯଥା ଉପର ବାହୁ ହାଡ, ସ୍କାପୁଲା ଯଥା କାନ୍ଧ ବ୍ଲେଡ୍ ଏବଂ କଲର୍ବୋନ୍, ଯାହାକୁ ‘ବଲ୍-ଏଣ୍ଡ୍-ସୋକେଟ୍’ ଗଣ୍ଠି କୁହାଯାଏ । କାନ୍ଧର ଗଣ୍ଠିକୁ ଘେରି ରହିଥିବା ଟିସୁକୁ ସୋଲ୍ଡର୍ କ୍ୟାପସୁଲ କୁହାଯାଏ । ଫ୍ରୋଜେନ୍ ସୋଲ୍ଡରରେ, କାନ୍ଧରେ ଥିବା ସୋଲ୍ଡର୍ କ୍ୟାପସୁଲ୍ ଧୀରେ ଧୀରେ ମୋଟା ହୋଇଯାଏ ଏବଂ ପ୍ରଦାହ ହେତୁ କଠିନ ହୁଏ, ଯାହା କାନ୍ଧର ଗତିବିଧିକୁ ପ୍ରତିବନ୍ଧିତ କରେ କିମ୍ବା ହ୍ରାସ କରେ । ଏହି ଅବସ୍ଥା ବେଳେବେଳେ ବହୁତ ଯନ୍ତ୍ରଣାଦାୟକ ହୋଇପାରେ ।
ଯେତେବେଳେ ଫ୍ରୋଜେନ୍ ସୋଲ୍ଡର୍ ସମସ୍ୟା ଅଧିକ ଦେଖାଦିଏ, କାନ୍ଧ ସହିତ ଜଡିତ କୌଣସି କାମ କରିବା ରୋଗୀଙ୍କ ପାଇଁ କଷ୍ଟକର ହୋଇପଡେ । ମୁଣ୍ଡ ଧୋଇବା, ଦାନ୍ତ ଘଷିବା, ପୋଷାକ ପିନ୍ଧିବା, ଗାଡି ଚଳାଇବା ଆଦି କାର୍ୟ୍ୟ କଷ୍ଟକର ହୋଇପଡେ । ବେଳେବେଳେ ରୋଗୀ ମଧ୍ୟ ହାତ ବଢାଇ କୌଣସି ଜିନିଷ ଆଣିପାରନ୍ତି ନାହିଁ । ଏଥିପାଇଁ ସେମାନଙ୍କୁ ଅନ୍ୟମାନଙ୍କ ଉପରେ ନିର୍ଭର କରିବାକୁ ପଡେ । ଡକ୍ଟର ସଞ୍ଜୟ କହିଛନ୍ତି ଯେ, ଫ୍ରୋଜେନ୍ ସୋଲ୍ଡର ସମସ୍ୟା ଗୋଟିଏ ଥରରେ ଗୋଟିଏ କାନ୍ଧରେ ଦେଖାଯାଏ, କିନ୍ତୁ ଏହା ଏକାସାଙ୍ଗରେ ଉଭୟ କାନ୍ଧରେ ମଧ୍ୟ ହୋଇପାରେ ।
ଫ୍ରୋଜେନ୍ ସୋଲ୍ଡର୍ ପାଇଁ ଅନେକ କାରଣ ଦାୟୀ ହୋଇପାରେ, ଯେପରିକି କୌଣସି ଆଘାତ, ମଧୁମେହ, ହରମନ୍ ଅସନ୍ତୁଳନ, ଷ୍ଟ୍ରୋକ୍, ହୃଦ୍ରୋଗ, ହାଇପୋଥାଇରଏଡିଜିମ୍ ଏବଂ ପାର୍କିନ୍ସନ୍ ରୋଗ ଇତ୍ୟାଦି । ବେଳେବେଳେ ଦୁର୍ବଳ ପ୍ରତିରକ୍ଷା ପ୍ରଣାଳୀ ଯୋଗୁଁ ଏହି ସମସ୍ୟା ମଧ୍ୟ ହୋଇପାରେ । ଏହା ବ୍ୟତୀତ ଯଦି ବ୍ୟକ୍ତି ଦୁର୍ଘଟଣା କିମ୍ବା ଅନ୍ୟ କୌଣସି କାରଣରୁ ଅତ୍ୟଧିକ ସକ୍ରିୟ ଜୀବନଯାପନ କରୁନାହାଁନ୍ତି, ଅର୍ଥାତ୍ ସେ ଦୀର୍ଘ ସମୟ ଧରି ହାତ ଏବଂ କାନ୍ଧ ସହ ଜଡିତ କାର୍ୟ୍ୟ କରୁନାହାଁନ୍ତି, ତେବେ ଏହି ସମସ୍ୟା ମଧ୍ୟ ହୋଇପାରେ ।
ସାଧାରଣତଃ ଏହି ସମସ୍ୟା ୪୦ ବର୍ଷରୁ ଅଧିକ ଲୋକଙ୍କ ଠାରେ ଅଧିକ ଦେଖାଯାଏ । ଅନ୍ୟପକ୍ଷରେ, ପୁରୁଷଙ୍କ ଅପେକ୍ଷା ମହିଳାଙ୍କ ଠାରେ ଫ୍ରୋଜେନ୍ ସୋଲ୍ଡର୍ ଅଧିକ ଦେଖାଯାଏ । ଅନେକ ଲୋକ ଭାବନ୍ତି ଯେ, ଏହା ଏକ ପ୍ରକାର ଆର୍ଥ୍ରାଇଟିସ୍ । ମାତ୍ର ଏହା ଆର୍ଥ୍ରାଇଟିସ୍ ନୁହେଁ । ଆର୍ଥ୍ରାଇଟିସ୍ ସମସ୍ୟା ଶରୀରର ସମସ୍ତ ଗଣ୍ଠିରେ ଦେଖାଯାଏ, କିନ୍ତୁ ଫ୍ରୋଜେନ୍ ସୋଲ୍ଡର୍ ସମସ୍ୟା କେବଳ କାନ୍ଧରେ ଦେଖାଯାଏ ଏବଂ ଏହି ସମସ୍ୟା ଉପଶମ ହୋଇପାରେ ।
