ଜନଗଣନା–୨୦୨୭ ପାଇଁ ଜୋରଦାର ପ୍ରସ୍ତୁତି

ନୂଆଦିଲ୍ଲୀ:  ଦେଶବ୍ୟାପୀ ଜନଗଣନା–୨୦୨୭କୁ ସୁଚାରୁ ଓ ସଫଳ ଭାବେ ସମ୍ପନ୍ନ କରିବା ପାଇଁ ପ୍ରସ୍ତୁତି ଜୋରଦାର ହୋଇଛି । ଏହି ମହତ୍ୱପୂର୍ଣ୍ଣ କାର୍ଯ୍ୟକ୍ରମରେ ସମସ୍ତ ସରକାରୀ ବିଭାଗର ସକ୍ରିୟ ସହଯୋଗ ନିଶ୍ଚିତ କରିବାକୁ ସରକାର ପଦକ୍ଷେପ ନେଇଛନ୍ତି । ଏନେଇ ସମସ୍ତ ବିଭାଗକୁ ସରକାର ପକ୍ଷରୁ ଚିଠି ଲେଖାଯାଇ ସମନ୍ୱୟ ରକ୍ଷା କରିବା ସହ ଆବଶ୍ୟକ ସୂଚନା ଓ ସହଯୋଗ ଯୋଗାଇ ଦେବାକୁ କୁହାଯାଇଛି । ଜନଗଣନା କାର୍ଯ୍ୟକୁ ସମୟବଦ୍ଧ ଓ ନିର୍ଭୁଲ କରିବା ପାଇଁ ସମସ୍ତ ବିଭାଗର ଭୂମିକା ଗୁରୁତ୍ୱପୂର୍ଣ୍ଣ ରହିବ । ଏଥର ଜନଗଣନା ପ୍ରକ୍ରିୟାକୁ ଅଧିକ ଆଧୁନିକ ଓ ସ୍ୱଚ୍ଛ କରିବା ଲକ୍ଷ୍ୟରେ ଡିଜିଟାଲ ପ୍ଲାଟଫର୍ମର ବ୍ୟାପକ ବ୍ୟବହାର କରାଯିବ ।ତଥ୍ୟ ସଂଗ୍ରହ, ସତ୍ୟାପନ ଏବଂ ପରିଚାଳନା ପ୍ରକ୍ରିୟାକୁ ପ୍ରଯୁକ୍ତିଭିତ୍ତିକ କରାଯିବ, ଯାହା ଦ୍ୱାରା ତଥ୍ୟର ସଠିକତା ଓ କାର୍ଯ୍ୟର ଗତି ବଢ଼ିବ । ଜନଗଣନା କେବଳ ଜନସଂଖ୍ୟାର ହିସାବ ନୁହେଁ, ବରଂ ଦେଶର ଭବିଷ୍ୟତ ଯୋଜନା, ନୀତି ନିର୍ଦ୍ଧାରଣ ଏବଂ ବିକାଶମୂଳକ କାର୍ଯ୍ୟକ୍ରମ ପାଇଁ ଏହା ଏକ ମୂଳ ଆଧାର । ସେଥିପାଇଁ ଜନଗଣନା–୨୦୨୭କୁ ସଫଳ କରିବାକୁ ସରକାର ପ୍ରସ୍ତୁତିକୁ ଆହୁରି ତ୍ୱରାନ୍ୱିତ କରିଛନ୍ତି ।