ନୂଆଦିଲ୍ଲୀ: ମଧ୍ୟପୂର୍ବରେ ପୁଣି ବଢ଼ିଛି ଯୁଦ୍ଧର ଆଶଙ୍କା । ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନକୁ କଡ଼ା ଚେତାବନୀ ଦେଇ କହିଛନ୍ତି, ଯଦି ଇରାନ କିମ୍ବା ତାହାର ସମର୍ଥିତ ଗୋଷ୍ଠୀମାନେ ଆକ୍ରମଣ ଜାରି ରଖନ୍ତି, ତେବେ ଆମେରିକା ପକ୍ଷରୁ ବଡ଼ ଧରଣର ସାମରିକ ଜବାବ ଦିଆଯିବ । ଏହି ବୟାନ ପରେ ଅନ୍ତର୍ଜାତୀୟ ସ୍ତରରେ ଚିନ୍ତା ବଢ଼ିଛି । ନିକଟରେ ଲୋହିତ ସାଗରରେ ତୈଳବାହୀ ଜାହାଜ ଉପରେ ଡ୍ରୋନ୍ ଏବଂ କ୍ଷେପଣାସ୍ତ୍ର ଆକ୍ରମଣ ପରେ ଆମେରିକା ଇରାନ ସମର୍ଥିତ ଲକ୍ଷ୍ୟସ୍ଥଳୀ ଉପରେ ବାୟୁ ଆକ୍ରମଣ କରିଛି । ଏହାର ପ୍ରତିକ୍ରିୟାରେ ଇରାନ ମଧ୍ୟ ଆମେରିକୀୟ ସ୍ୱାର୍ଥକୁ ଟାର୍ଗେଟ କରିବାର ଚେତାବନୀ ଦେଇଛି ।
ଉଭୟ ଦେଶର ଏଭଳି ପଦକ୍ଷେପ ମଧ୍ୟପୂର୍ବରେ ତିବ୍ର ଉତ୍ତେଜନା ସୃଷ୍ଟି କରିଛି । ଟ୍ରମ୍ପ କହିଛନ୍ତି, ଆମେରିକା ନିଜର ସୁରକ୍ଷା ଓ ବିଶ୍ୱ ବାଣିଜ୍ୟିକ ଜାହାଜ ଚଳାଚଳର ସୁରକ୍ଷା ପାଇଁ ଆବଶ୍ୟକ ହେଲେ କଠୋର ସାମରିକ ପଦକ୍ଷେପ ନେବ । ଏହି ଘଟଣା ପରେ ବିଶ୍ୱ ବଜାରରେ ଅଶୋଧିତ ତୈଳ ଦର ମଧ୍ୟ ବୃଦ୍ଧି ପାଇଥିବା ଦେଖାଯାଇଛି । ଏପଟେ ଜାତିସଂଘ ସମେତ ବିଶ୍ୱର ଅନେକ ଦେଶ ଉଭୟ ପକ୍ଷକୁ ସଂଯମ ବର୍ତ୍ତାଇବା ଏବଂ କୂଟନୈତିକ ଆଲୋଚନା ମାଧ୍ୟମରେ ସମସ୍ୟାର ସମାଧାନ କରିବାକୁ ଆହ୍ୱାନ କରିଛନ୍ତି । ବର୍ତ୍ତମାନ ସମଗ୍ର ବିଶ୍ୱର ନଜର ମଧ୍ୟପୂର୍ବର ପରିସ୍ଥିତି ଉପରେ ରହିଛି ।
