ଆମେରିକା ଏବଂ ଇରାନ ମଧ୍ୟରେ ଉତ୍ତେଜନା ପୁଣି ଥରେ ବୃଦ୍ଧି ପାଇଛି। ଶାନ୍ତି ଚୁକ୍ତି କେବଳ ଆଲୋଚନା ଟେବୁଲ ଉପରେ ରହିଯାଇଛି। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନକୁ କଡ଼ା ଚେତାବନୀ ଦେଇ କହିଛନ୍ତି ଯେ, ଯଦି ଇରାନ ଅସ୍ତ୍ରବିରତି ଉଲ୍ଲଂଘନ ଜାରି ରଖେ ଏବଂ ଆମେରିକାକୁ ସାମରିକ କାର୍ୟ୍ୟାନୁଷ୍ଠାନ ଆରମ୍ଭ କରିବାକୁ ବାଧ୍ୟ କରାଯାଏ, ତେବେ ଇସଲାମିକ ଗଣରାଜ୍ୟ ଇରାନର ଅସ୍ତିତ୍ୱ ଶେଷ ହୋଇଯିବ। ବିଶ୍ୱ ମାନଚିତ୍ରରୁ ଇରାନ ଲିଭିଯିବ। ଏହି ବିବୃତି ଏପରି ଏକ ସମୟରେ ଆସିଛି ଯେତେବେଳେ ଆମେରିକା ଲଗାତାର ଦ୍ୱିତୀୟ ଦିନ ପାଇଁ ଅନେକ ଇରାନୀ ସାମରିକ ଘାଟି ଉପରେ ବିମାନ ଆକ୍ରମଣ କରିଛି। ଏହାର ଜବାବରେ ବାହାରିନ ଏବଂ କୁଏତ ଉପରେ ଆକ୍ରମଣ କରି ଇରାନ ପ୍ରତିଶୋଧ ନେଇଛି।
ଟ୍ରମ୍ପ ତାଙ୍କ ସୋସିଆଲ ମିଡିଆ ପ୍ଲାଟଫର୍ମ, ଟ୍ରୁଥ୍ ସୋସିଆଲରେ କହିଛନ୍ତି ଯେ ଆମେରିକାର ଲଢୁଆ ବିମାନଗୁଡ଼ିକ ଇରାନୀ କ୍ଷେପଣାସ୍ତ୍ର ଏବଂ ଡ୍ରୋନ୍ ପ୍ରତିଷ୍ଠାନ ଏବଂ ଉପକୂଳବର୍ତ୍ତୀ ରାଡାର ସିଷ୍ଟମକୁ ଟାର୍ଗେଟ କରିଛନ୍ତି। ସେ ଅଭିଯୋଗ କରିଛନ୍ତି ଯେ, ଇରାନ ପୁଣି ଥରେ ଅସ୍ତ୍ରବିରତି ଚୁକ୍ତିନାମା ଉଲ୍ଲଂଘନ କରିଛି। ଟ୍ରମ୍ପ କହିଛନ୍ତି, ଆମେରିକା ଏପର୍ୟ୍ୟନ୍ତ ସଂଯମତା ଅବଲମ୍ବନ କରିଆସୁଛି, କିନ୍ତୁ ଯଦି ଇରାନ ଆକ୍ରମଣ ବନ୍ଦ ନ କରେ, ତେବେ ଆମେରିକା କଠୋର ପଦକ୍ଷେପ ଗ୍ରହଣ କରିବ ଯାହାର ଗମ୍ଭୀର ପରିଣାମ ହେବ। ଆମେରିକାର ସେନାର କେନ୍ଦ୍ରୀୟ କମାଣ୍ଡ ସେଣ୍ଟକମ୍ କହିଛି ଯେ ରାଷ୍ଟ୍ରପତିଙ୍କ ନିର୍ଦ୍ଦେଶରେ ଏହି ଅଭିଯାନ କରାଯାଇଥିଲା। ଆମେରିକା ଦାବି କରିଛି ଯେ ଇରାନ ଏକ ଆତ୍ମଘାତୀ ଡ୍ରୋନ୍ ସାହାଯ୍ୟରେ ପାନାମା-ପତାକାଯୁକ୍ତ ତୈଳ ଟ୍ୟାଙ୍କର୍ ଏମ/ଟି କିକୁ ଉପରେ ଆକ୍ରମଣ କରିଥିଲା। ଜାହାଜଟି ହର୍ମୁଜ୍ ପ୍ରଣାଳୀ ଦେଇ ଗତି କରୁଥିଲା ଏବଂ ୨ ନିୟୁତ ବ୍ୟାରେଲ ଅଶୋଧିତ ତୈଳ ବୋହି ନେଉଥିଲା।
