ଡିସେମ୍ବର ୨୬ ଓ ୨୭ରେ ଓସାର ୱେବ ବିଶ୍ୱ ମହୋତ୍ସବ

କାଲିଫର୍ଣ୍ଣିଆ/ ଲଣ୍ଡନ/କାନବେରା / ଲାଗୋସ / ଦୁବାଇ / ଭୁବନେଶ୍ୱର / ଜାକର୍ତ୍ତା / ବ୍ୟାଙ୍ଗକକ /ନୂଆଦିଲ୍ଲୀ : ଆସନ୍ତା ଡିସେମ୍ବର ୨୬ ଓ ୨୭ ତାରିଖରେ ଦୁଇଦିନ ଧରି ଓଡ଼ିଶା ସୋସାଇଟି ଅଫ ଆମେରିକାଜ଼ (ଓସା)ର ବିଶ୍ୱ ୱେବ ମହୋତ୍ସବ ଅନୁଷ୍ଠିତ ହେବାକୁ ଯାଉଛି | ନିକଟରେ ଓସାର ସଭାପତି କୁକୁ ଦାସଙ୍କ ଦ୍ୱାରା ଆହୂତ ଏକ ଆନ୍ତର୍ଜାତିକ ୱେବିନାର ରେ ଏହି ନିଷ୍ପତ୍ତି ନିଆଯାଇଛି | ପ୍ରଥମଥର ପାଇଁ ଆୟୋଜିତ ହେବାକୁ ଯାଉଥିବା ଏହି ବିଶ୍ୱ ପ୍ରବାସୀ ଓଡ଼ିଆ ଅନଲାଇନ ମହାକୁମ୍ଭ ରେ ଓଡ଼ିଶାର ଆର୍ଥିକ ଓ ବୌଦ୍ଧିକ ବିକାଶ ନେଇ ଆଲୋଚନାଚକ୍ର, ରାଜ୍ୟର କଳା,ସଂସ୍କୃତି, ଭାସ୍କର୍ଯ୍ୟ, ଐତିହ୍ୟ,ହସ୍ତକଳା,ସ୍ଥାପତ୍ୟ,ପର୍ଯ୍ୟଟନ, ପରିପାଟ୍ଟୀ, ଭାଷା ଓ ସାହିତ୍ୟର ଭବ୍ୟ ପ୍ରଦର୍ଶନ, ଓଡ଼ିଶୀ ସଂଗୀତ, ନୃତ୍ୟ, ଲୋକନୃତ୍ୟ, ଗୀତ ତଥା ବିଭିନ୍ନ ପାରମ୍ପରିକ କଳା ଚାତୁର୍ଯ୍ୟ ର ପରିବେଷଣ ତଥା ଇଣ୍ଟରନେଟ ଯୋଗେ ରାଜ୍ୟର ସ୍ୱାଦିଷ୍ଟ ବ୍ୟଞ୍ଜନ ରାଜି ଯଥା ପିଠା, ପଣାର ପ୍ରତିଯୋଗିତା ଆଦି ସ୍ଥାନ ପାଇବ ବୋଲି ଜଣାଯାଇଛି | ଡିଜିଟାଲ ସମାବେଶର ବିଶେଷ ଆକର୍ଷଣ ଭାବେ କୋଭିଡ ପରବର୍ତ୍ତୀ ପର୍ଯାୟରେ ସାରା ପୃଥିବୀରେ ବସବାସ କରୁଥିବା ଓଡ଼ିଆ ସଂପ୍ରଦାୟ ସମୂହଙ୍କ ସମ୍ମୁଖ ରେ ଉପୁଜିବାକୁ ଥିବା ଗମ୍ଭୀର ସମସ୍ୟା ଓ ଏଗୁଡ଼ିକର ସମ୍ଭାବ୍ୟ ସମାଧାନ ସଂପର୍କରେ ସଠିକ ଖସଡ଼ା ପ୍ରସ୍ତୁତ କରିବା ପାଇଁ ଏହି ଅବସରରେ ମାନସମନ୍ଥନ ଚର୍ଚ୍ଚା ହେବ ବୋଲି ପ୍ରାପ୍ତ ସୂଚନାରୁ ପ୍ରକାଶ | କୁକୁ ଦାସଙ୍କର ପୌରହିତ୍ୟ ରେ ଅନୁଷ୍ଠିତ ଏହି ଭାରଚୁଆଲ ପ୍ରସ୍ତୁତି ବୈଠକରେ ବିଶ୍ୱର ବିଭିନ୍ନ ଦେଶର ଓଡ଼ିଆ ସାଂସ୍କୃତିକ ଏବଂ ସାମାଜିକ ସଂଗଠନ ମାନଙ୍କର କର୍ମକର୍ତ୍ତା ମାନେ ଯୋଗ ଦେଇଥିଲେ |

୧୯ଟି ଶାଖା ଓ ୮୦ ହଜାର ସଦସ୍ୟ ବିଶିଷ୍ଟ ୫୨ ବର୍ଷର ପୁରୁଖା ସଂଗଠନ ଓସା, ଓଡ଼ିଶା ବାହାରେ ସର୍ବବୃହତ ଓ ସର୍ବପୁରାତନ ପ୍ରବାସୀ ଓଡ଼ିଆ ଅନୁଷ୍ଠାନର ମାନ୍ୟତା ହାସଲ କରିଥିବା, ଶ୍ରୀମତୀ ଦାସ ତାଙ୍କର ସ୍ୱାଗତ ଭାଷଣ ରେ ପ୍ରକାଶ କରିଥିଲେ | ୱେବିନାର କୁ ସମ୍ବୋଧନକରି ବରିଷ୍ଠ ସାମ୍ବାଦିକ ଓ ବନ୍ଦେ ଉତ୍କଳ ଫାଉଣ୍ଡେସନର ପ୍ରତିଷ୍ଠାତା ଅଧକ୍ଷ କିଶୋରେ ଦ୍ବିବେଦୀ, ଓସା ବିଶ୍ୱ ମହୋତ୍ସବ ପ୍ରସ୍ତାବକୁ ହାର୍ଦ୍ଦିକ ଅଭିନନ୍ଦନ ଜଣାଇଥିଲେ | ବର୍ତ୍ତମାନର ଘଡିସନ୍ଧି ମୁହୂର୍ତ୍ତରେ ସାରା ବିଶ୍ୱର ପ୍ରବାସୀ ଓଡ଼ିଆ ଏକଜୁଟ ହେବାର ଆବଶ୍ୟକତା ରହିଥିବା ଅଷ୍ଟ୍ରେଲିଆ ଓଡ଼ିଆ ସମାଜ ର ସଭାପତି ଡ଼ଃ ନଳିନୀ ପତି ମତବ୍ୟକ୍ତ କରିଥିଲେ | ଓଡ଼ିଶା ସମାଜ ୟୁ.ଏ.ଇ. ର ସାଧାରଣ ସଂପାଦକ ପ୍ରୀତିଶ ଦାଶ, ରାଜ୍ୟର କଳା, ସଂସ୍କୃତି, ଭାଷା ଓ ସାହିତ୍ୟ କୁ ପ୍ରଚାର,ପ୍ରସାର କରିବା ଦିଗରେ ଯୁବସମାଜ ଅଗ୍ରଣୀ ଭୂମିକା ଗ୍ରହଣ କରିବାକୁ ଆହ୍ବାନ ଜଣାଇଥିଲେ | ନୂଆଦିଲ୍ଲୀ ସ୍ଥିତ ଦି ଇଣ୍ଟେଲେକଟସ ର ଅଧ୍ୟକ୍ଷ ଦେବେନ୍ଦ୍ର ରାଉତ ସମଗ୍ର ପୃଥିବୀ ରେ ଓଡ଼ିଆ ପିଲାମାନଙ୍କୁ ଓଡ଼ିଆ ଭାଷା ଓ ସାହିତ୍ୟ ଅନଲାଇନ ଯୋଗେ ଶିକ୍ଷା ଦିଆଯିବା ଉପରେ ଗୁରୁତ୍ୱ ଆରୋପ କରିଥିଲେ | ବୈଠକରେ ଉଦବୋଧନ ଦେଇ ଓଡ଼ିଶା ସମାଜ ୟୁ.କେ. ର ସାଂସ୍କୃତିକ ସଂପାଦକ ଡ଼ଃ ଭାଗ୍ୟଶ୍ରୀ ସିଂହ ଆମର ଭବିଷ୍ୟତ ବଂଶଧର ମାନଙ୍କୁ ନିଜର ମାତୃପ୍ରଦେଶର ଜୀବନଶୈଳୀ ଓ ଚାଲିଚଳଣ ପ୍ରତି ସଚେତନ କରାଇବା ତଥା ଏ ବାବଦର ସେମାନଙ୍କ ମନରେ ଆଗ୍ରହ ସୃଷ୍ଟି କରିବା ଦିଗରେ ସବୁଠୁ ଅଧିକ ପ୍ରାଧାନ୍ୟ ଦିଆଯିବା ଦରକାର ବୋଲି କହିଥିଲେ |

ବାଙ୍ଗାଲୋର ଓଡ଼ିଆ ଶିଳ୍ପୋଦ୍ୟୋଗୀ ନେଟୱାର୍କ ର ପ୍ରତିଷ୍ଠାତା ମନୋଜ ପାତ୍ର, ଓସା ମହୋତ୍ସବ ଜରିଆରେ ସମଗ୍ର ବିଶ୍ୱର ଓଡ଼ିଆ ମାନଙ୍କୁ ଯୋଡ଼ିବାର ସାଧୁ ଉଦ୍ୟମ କୁ ସ୍ୱାଗତ କରିବା ସହିତ ୟୁରୋପ ଓ ଆଫ୍ରିକାର ଓଡ଼ିଆ ସଂଗଠନ ଗୁଡ଼ିକୁ ଏହି ସମାବେଶରେ ସାମିଲ କରିବାନେଇ ସେ ପ୍ରଚେଷ୍ଟା କରିବେ ବୋଲି ପ୍ରତିଶୃତି ଦେଇଥିଲେ| ଜାପାନ – ଭାରତ ମୈତ୍ରୀ କେନ୍ଦ୍ରର ସଭାପତି କୁନା ଦାଶ ବିଦେଶରେ ଓଡ଼ିଶାର ଉତଥାନପାଇଁ କାର୍ଯ୍ୟରତ ବ୍ୟକ୍ତିବିଶେଷଙ୍କୁ ସରକାରୀ ସ୍ତରରେ ବ୍ରାଣ୍ଡ ଆମ୍ବାସଡର ଭାବେ ସ୍ୱୀକୃତି ପ୍ରଦାନ କରିବାକୁ ପରାମର୍ଶ ଦେଇଥିଲେ | “ବସୁଧୈବ କୁଟୁମ୍ବକମ” ଶୀର୍ଷକ ଏହି ୱେବିନାର ରେ ଅନ୍ୟମାନଙ୍କ ମଧ୍ୟରେ ଓସାର ଉପସଭାପତି ଅନୀଲ ପଟ୍ଟନାୟକ, କୋଷାଧ୍ୟକ୍ଷ ଉତ୍କଳ ନାୟକ, ୟୁ.କେ. ର ସୁସ୍ମିତା ରାଜହଂସ, ସୁଇଜରଲ୍ୟାଣ୍ଡ ରୁ ଡ଼ଃ ବିଜୟଶ୍ରୀ ସାମଲ,ଭୁବନେଶ୍ୱର ରୁ ସଂଗୀତା ଗୋସାଇଁ, ନୂଆଦିଲ୍ଲୀ ରୁ ଡ଼ଃ ବିକ୍ରମ ମହାନ୍ତି, ଥାଇଲ୍ୟାଣ୍ଡରୁ ଡ଼ଃ ଆଦ୍ର୍ରିସ ବ୍ରହ୍ମଦତ୍ତ, ମାୟାନମାରରୁ ଡ଼ଃ ସୀତଳ କୁମାର, ନାଇଜେରିଆ ରୁ ରମେଶ ବିଶ୍ୱାଳ, ବାହାରିନରୁ ଅରୁଣ କୁମାର ପ୍ରହରାଜ ଏବଂ ଜାକାର୍ତ୍ତାରୁ ଦେବର୍ଷୀ ମଲ୍ଲିକ ପ୍ରମୁଖ ଅଂଶଗ୍ରହଣ କରିଥିଲେ |

LEAVE A REPLY

Please enter your comment!
Please enter your name here